EKEKIELI6 33
33
Nyasae ogochora Ezekieli abe omorendi
(Ezek 3:16–21)
1Ring’ana ri’Omonene rigacha asende, rigantebia: 2“Aye mwanyabanto, tebia abanto bamino ng’a ekero ndarente omoro igoro ase ense, na abanto b’ense eyio bachore omonto oyomo obo, bamobeke abe omorendi obo, 3omonto oyio kararore omoro oyio ogocha igoro ase ense, abugie egetureri ki’ogokurera abanto. 4Omonto onde bwensi oraigwe eriogi ri’egetureri ekio, korende taigwera ogokurerwa okwo, omoro koramonyore omoite, okomocha kw’ogoiteka kw’amanyinga aye, nakobarwe igoro yaye. 5Ere nigo aigwete eriogi ri’egetureri, korende taigwera ogokurerwa okwo, ase ayio okomocha kw’ogoiteka kw’amanyinga aye nakobarwe igoro yaye. Korende karaigwere ogokurerwa okwo, natoorie obogima bwaye. 6Korende omorendi oria kararore omoro ogocha, na tabugia egetureri, erinde abanto bakurerwe, na omoro oria ochiche oite omonto onde obo, omonto oyio nakwe ore ase ebibe biaye, korende inche ninganie amanyinga ’omonto oyio korwa ase okoboko kw’omorendi oria.
7“Ase ayio, aye mwanyabanto, nakobekire obe omorendi bw’Abaisraeli. Kero kende gionsi oraigwe ring’ana rikorwa ase omonwa one, obakurere ribaga riane. 8Kondatebie omonto omokori amabe: Aye omokori amabe, goika okwe, na aye okire tokwana omokurere ng’a aonchoke korwa ase enchera yaye embe, omokori amabe oria nakwe ore ase ebibe biaye, korende ninganie amanyinga aye korwa ase okoboko kwao. 9Korende korakurere omokori amabe ng’a aonchoke atige enchera yaye, na ere aange koyetiga, oyio nakwe ore ase ebibe biaye, korende aye notoorie omoyo oo.
Aya kera omonto agwenerete gokora
10“Ase ayio aye mwanyabanto, inyoria Abaisraeli aya bagokwana, bateba: Ogosaria gwaito, na ebibe biaito biatoritoeire, na ebio bigendererete gotochanda na gotoreyia. Naki rende toranyare koba moyo? 11Batebie ng’a inche Omonene Nyasae nigo ngoteba iga: Ekeene, buna inche inde moyo, tindi kogokera ogokwa kw’omokori amabe, korende nigo nganetie omokori amabe aonchoke, atige enchera yaye embe abe moyo. Ase ayio onchoka, onchoka, motige chinchera chiaino chimbe! Inwe Abaisraeli, nase ki moganetie mokwe?
12“Aye mwanyabanto, tebia abanto bao ng’a ekero omonyaboronge aratige oboronge bwaye akore ebibe, oboronge boria bwaye tibokomotooria; na ekero omokori amabe araonchoke atige obobe bwaye, obobe boria bwaye tibokomoita, kareitie na kobotiga. Omonyaboronge takoba moyo ase engencho y’oboronge bwaye rituko riria arakore ebibe. 13Kondatebie omonyaboronge ng’a nabe moyo, korende ere asemerie oboronge bwaye na akore aya atari ay’oboronge, rirorio ogokora kwaye konde gwonsi kw’oboronge akorete tigokoinyorwa; ere nakwe ase engencho y’ayio atari oboronge akorire. 14Naende, kondatebie omokori amabe: Aye goika okwe, korende karaonchoke atige ebibe biaye, akore ayare ay’ekeene na oboronge, 15ere karairanie egento airete gekaba intenenera, naende airanie eki aureretie, na abwatie emeroberio echikire ey’obogima atari gokora ebibe, omonto oyio, ekeene nabe moyo, tagokwa. 16Ase ebibe ebio akorete takobarerwa nonya nekemo; ere okorire ayare ay’ekeene na oboronge, ekeene goika abe moyo.
17“Abanto b’egesaku kiao nigo bagoteba: Chinchera chi’Omonene tichiri echi’ekeene, korende chinchera chiabo nachio chitari echi’ekeene. 18Ekero omonyaboronge aratige oboronge bwaye akore aya atari ay’oboronge, oyio nakwe ase engencho y’ayio. 19Na omokori amabe karaonchoke, atige amabe aye, erio akore ayare ay’ekeene na oboronge, nabe moyo ase engencho y’ayio. 20Korende inwe Abaisraeli nigo mogendererete goteba: Chinchera chi’Omonene tichiri echi’ekeene. Ninachere kera omonto ekina koreng’ana nogokora kwaye.”
Amang’ana igoro y’okogwa kwa Yerusalemu
21Ase rituko ria gatano, omotienyi o ikomi, omwaka o ikomi na kabere, nyuma gotwairirwe ase obosomba, omonto konya otamire korwa Yerusalemu, agacha asende, agantebia, “Omochie oria obuirwe.” 22Mogoroba ekero omonto oyio ataracha asende, okoboko kw’Omonene konya gwachire igoro yane, na ase emambia eria omonto oria otamete konya ataraika asende, Omonene konya omaanoire omonwa one, na tinagendererete koba rimama.
Ebibe bi’abanto
23Naende ring’ana ri’Omonene rigacha asende, rigantebia: 24“Aye mwanyabanto, abanto abwo bamenyete ase amaturi aaria ase ense y’Abaisraeli, nigo bagokwana, bateba: Ibrahimu nigo arenge omonto oyomo, na ere akanyora ense eye ekaba eyaye; korende intwe nigo tore abange, ekeene, ense eye nero twaeirwe ebe eyaito.
25“Ase ayio, batebie ng’a aya naro Omonene Nyasae agoteba: Inwe nigo mokoria enyama ere namanyinga, naende nigo mokorigereria emegwekano yaino mogosasima, boigo inwe nigo mogoitera amanyinga ’abanto. Inee! Naki moranyare koira ense eye ebe eyaino? 26Inwe nigo mwegenete emioro yaino; nigo mogokora ay’okogechia, kera oyomo oino nigo agotomana nomokungu bw’omonto onde. Inee! Naki moranyare koira ense eye ebe eyaino?
27“Aye goika obatebie ng’a aya naro Omonene Nyasae agoteba: Ekeene, buna inche inde moyo, abanto abwo bamenyete ase amaturi mbaitwe nemioro, na abare isiko nintome ching’iti chi’orosana chibarie; abwo bamenyete ase ebitare na ime ase amakuruma, amarwaire amabe nabaite. 28Ninsarie ense eyio ebe bosa kegima, ne chinguru chiabo echio chibaenenetie nchiere pi. Ebitunwa bi’Abaisraeli mbitigare bosa, monto onde takoba ogoetera aroro. 29Ekero ndabe nasaririe kegima ense eyio yabo ebe bosa, ase engencho y’ebibe biabo bionsi bi’okogechia bakorire, erio mbamanye ng’a inche ninche Omonene.
Ayabete nyuma Ezekieli kabanire
30“Aye mwanyabanto, abanto bao nigo bagosangererekana amo agwo ase chinyasi, na ase ebisieri bie chinyomba, bagamba igoro yao, na kera omonto okwana nomogisangio oye, batebania: Inchuo togende, toigwe ng’a naki ring’ana rikorwa ase Omonene rigoteba. 31Ase ayio nigo bagocha asore buna abagocha ase omosangererekano, baikaransa ase obosio bwao buna abanto baane, barabwo baigwa amang’ana ogokwana, korende tibari koyakorera. Nigo bakworokia obwanchani obonge ase ebikoba igoro, korende ime ase chinkoro chiabo nigo bakwerigeria ebitoki. 32Naama! Aye kwabeire asebare buna omonto obwate eriogi rigiya ogotera amatera ay’okogokia, naende okobugia obokano buya. Nigo bakoigwa amang’ana ayio ao, korende tibari koyakorera. 33Korende ekero amang’ana ayio araikeranigwe (ekiagera goika aikeranigwe), erio nario baramanye ng’a omobani narenge ase egati yabo.”
Currently Selected:
EKEKIELI6 33: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
