1 SAMWELI 26
26
Daudi ogotiga taita Saulo eria kabere
1Abanto bande ba Sifu bakagenda ase Saulo agwo Gibea, bakamotebia ng’a Daudi igo akebisete ase ekegoro gia Hakila kororia Yesimoni. 2Erio Saulo akaimoka amo n’Abaisraeli bande chilifu isato abachoretwe korigia Daudi ase erooro ya Sifu. 3Saulo agatoora ase ekegoro kia Hakila kororia Yesimoni ang’e nenchera, korende Daudi akagenderera kobeera agwo ase erooro, na ekero aigwete ng’a Saulo omobwatirie gocha ase erooro, 4agatoma chirooti na igo akamanya na koenekia ng’a Saulo konya oikireo. 5Daudi akaimoka, akagenda aase aria Saulo atoorete. Akarora aase aria Saulo araire amo n’Abineri, mosinto o Neri; omochiki bw’abarwani baye. Saulo nigo araire aase chigari chiabekire chikengete, na abarwani bamoetanaine.
6Erio Daudi akaboria Ahimeleki Omohiti, na Abisai, momura omwabo Yoabu, omomura bw’omokungu Seruya, “Ning’o oranche gotirimboka amo nainche gochia ase Saulo ase egetwori kiaye?”
Abisai akamoiraneria, “Ninche ndagende amo naye.”
7Ase igo ase obotuko obwo Daudi na Abisai bakagenda agwo ase abanto b’egetwori keria, bakanyora Saulo oraire aase chigari chiabekire chikengete. Saulo nigo asimisetie ritimo riaye ang’e nomotwe oye, na Abineri na abarwani bande b’esegi nigo baraire, bamoetanaine. 8Abisai agatebia Daudi, “Rora Nyasae obekire omobisa oo ase okoboko kwao, ase ayio ing’a ribaga imobete ritimo erimo rioka, imobwateranie riroba, gose tinkomobeta kabere.”
9Daudi agakania Abisai, akamotebia, “Tokomoita, naki ning’o oranyare korambora okoboko kwaye igoro y’omoakwa amaguta bw’Omonene amoite, na taegwa egesusuro?” 10Naende Daudi akabora, “Ekeene, buna Omonene are moyo, Omonene omonyene nere oraite Saulo, gose rituko ri’ogokwa kwaye nariike, gose nagende ase esegi na goitwa akwe. 11Korende Omonene antange; tindambora okoboko kwane ase ogoita omoakwa amaguta oye. Imokia ritimo erio rire ang’e ase omotwe oye amo nekerandi keria ki’amache, togende.” 12Ase ayio Daudi akaimokia ritimo na ekerandi keria ki’amache korwa ensemo y’omotwe o Saulo. Erio Daudi na Abisai bakagenda. Monto onde taroche aya kagokorekana, gose koyamanya, na onde tatabobogete. Bonsi nigo baraire chitoro chindito, ekiagera Omonene abarenterete chitoro echio chindito.
13Erio Daudi akaamboka gochia eng’umbu ende, agatenena aare ase ekegoro keria, bokaba oboare botari boke ase egati yabo. 14Daudi akarangeria abarwani abwo b’esegi, na Abineri, mosinto o Neri, akabora, “Abineri, tori goitaba?”
Abineri akairaneria, “Naye ng’o okorangeria omoruoti?”
15Daudi akaboria Abineri, “Aye tori omonto etuoni? Ning’o ore omoremu buna aye ase egati y’Abaisraeli? Nase ki rende otarendete omonene oo omoruoti? Omonto oyomo nacheteo goita Omonene oo omoruoti. 16Eke gwakorire nigo kere ekebe. Ekeene, buna Omonene are moyo, nigo mogwenerete goitwa, ekiagera mwasinyirwe korenda omonene oino, oyore omoakwa amaguta bw’Omonene. Bono ritimo ri’omoruoti, na ekerandi keria ki’amache kiarenge ang’e nomotwe oye, ng’ai bikare?”
17Erio Saulo akamanya eriogi ria Daudi, akamoboria, “Naye Daudi, omwana one, eriogi eri neriao?”
Daudi akamoiraneria, “Ee omoruoti, omonene one, neriane.” 18Naende akabora, “Aye omonene one, nase ki okona‐kondigia inche omosomba oo ng’a ong’ite? Ninki nakorire. Nkomocha ki inde nakwo? 19Bono aye omoruoti, omonene one, igwa amang’ana aane, inche omosomba oo. Onye n’Omonene ogoseegetire ondigia ase ogonsiria, rirorio tiga anchere ekeng’wanso ekio, korende onye nabanto bakogoseegeta igoro asende, rirorio Omonene abaragererie, ekiagera rero iga banseririe ng’a tinyora omwando korwa ase Omonene, bagantebia: Genda okorere chinyasae ching’ao. 20Gaki bono, totiga amanyinga aane aiteke aare korwa ase obosio bw’Omonene. Omoruoti bw’Abaisraeli ochire kondigia inche inde ensona, buna omonto okorigia chinkware ase ebitunwa.”
21Erio Saulo akamotebia “Nakorire ebibe! Aye Daudi, omwana one, irana. Tinkogokorera amabe naende, ekiagera rituko ria rero obogima bwane nigo bwaba bw’engencho enene asore. Nakorire ayare oboriri, na igo nakorire okomocha okonene.”
22Daudi akamoiraneria, “Aye omoruoti, rora ritimo riao eri, toma omosae oyomo amboke arioyie. 23Omonene nigo agoakana kera omonto buna oboronge bwaye bore, na obwegenwa boigo. Ase rituko ria rero Omonene nigo akobegete ase okoboko kwane, korende nkaanga korambora okoboko kwane igoro ase omoakwa amaguta bw’Omonene. 24Ase ayio, buna obogima bwao bwabete obw’engencho enene asende rituko ria rero, naboigo obogima bwane bore ase obosio bw’Omonene; ere nantoorie korwa ase emechando yonsi.”
25Erio Saulo agatebia Daudi, “Aye Daudi, omwana one, nosesenigwe. Aye nokore ebinto ebinge mono na kobua.”
Daudi akabwatia enchera yaye, na Saulo akairana nka bwoye.
Currently Selected:
1 SAMWELI 26: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
