1 SAMWELI 25
25
Ogokwa gwa Samweli
1Samweli agakwa, na Abaisraeli bagasangererekana, bakagenda komoreera; bakamotindeka ase enka yaye agwo Rama.
Daudi na Abigaeli
Erio Daudi akaimoka, agatirimboka gochia ase erooro ya Parani. 2Narenge omonto oyomo korwa Maoni obwate amaicho aye agwo Karimeli. Ere nigo arenge omonda mono; nabwate ching’ondi chilifu isato ne chimbori elifu eyemo. Igo arenge koba okonacha ching’ondi chiaye amarionya agwo Karimeli. 3Omonto oyio noyo bw’ororeria rwa Kalebu, nigo arenge korokwa Nabali, na mokaye Abigaeli. Omokungu oyio nigo arenge omong’aini mono na omonyakieni, korende omosacha oria nigo arenge omonto omotindi na omonyandamwamu.
4Ekero Daudi arenge ase erooro akaigwa ng’a Nabali nkonacha arenge ching’ondi chiaye amarionya. 5Erio agatoma abamura ikomi ase Nabali, akabatebia, “Genda ase Nabali agwo Karimeli, momoirere ogokwania kwane, 6momotebie amang’ana aya aane: Omorembe obe asore, na ase enyomba yao, na ase binde bionsi obwate. 7Naigure ng’a nkonacha ore ching’ondi chiao amarionya. Bono abarisia bao nigo barenge amo naintwe; titwabakorerete bobe bonde. Barabwo tibaiberetwe gento kende gionsi ase engaki yonsi barenge Karimeli. 8Boria abasomba bao, nabarabwo mbakoenekerie bo. Ngochia koba tore nomoyega bwe Rituko Rinene; ase ayio tiga abamura abwo natomire asore banyore ogwancherwa ase obosio bwao. Ase ayio, obae barabwo amo nainche Daudi, omwana oo, gento kende obwate ogotoa.”
9Ekero abamura abwo Daudi atomete baigete ase Nabali, bakamotebia amang’ana onsi a Daudi. Erio bakaganya. 10Nabali akabairaneria, agateba, “Daudi oyio, nere ng’o? Oyio omwana o Yese, nere ng’o? Ase amatuko aya abasomba abange nigo bagotama korwa ase abanene babo. 11Inee! Ninyare koimokia endagera yane, na ekenyugwa kiane, na enyama ye ching’iti chiane nanyenyeire abanto bakonachera ching’ondi amarionya, na kobia abanto ntamanyeti aase bakorua?”
12Abamura baria Daudi atomete bakairana gochia asare, bakamotebia amang’ana ayio onsi Nabali abatebetie. 13Erio Daudi akabatebia, “Kera omonto eboeranie omoyio oye o birende.” Na kera oyomo akeboerania omoyio oye, na Daudi nere boigo.
Abanto amagana aane bagatiira amo na Daudi, na abanto amagana abere bagatigara nyuma korenda ebinto.
14Oyomo bw’abasomba ba Nabali agatebia Abigaeli, moka Nabali, amang’ana ng’a, “Daudi natoma abanto korwa ase erooro gocha gokwania omonene oito, korende ere akabatogonyera. 15Abanto aba nigo bakorete amaya asetore, titwanyoretwe na bobe bonde. Ekero twarenge amo nabarabwo gotaara ase ebitii titwaiberetwe gento kende gionsi. 16Ase engaki yonsi twarenge amo nabarabwo korisia ching’ondi, barabwo nigo barenge asetore buna orwaki, omobaso na obotuko. 17Bono omanye amang’ana ayio, na orengererie inki orakore, ekiagera omonene oito ngochia are gokorerwa bobe, amo nabanto b’enka yaye. Ere nomotindi mono, onde tari oranyare gokwana nere.”
18Erio agwo Abigaeli agasangereria emegati amagana abere na ebirandi bibere bi’amasankwa biichire nedivai, ne chinyama chie ching’ondi isano chiyekire, na ebigara bisambire ebitita ebinene bitano, na amasabibu amomo amabomba rigana erimo, na amako amomo amabomba amagana abere. Erio akabiberekia chitigere. 19Abigaeli agatebia abasomba baye, “Tang’ana mogende, nainche nkobabwatia inde.” Korende tatebetie Nabali, omosacha oye.
20Ekaba Abigaeli kariinire etigere yaye na ngoeta arenge ase egekengano kiarenge inse y’egetunwa, Daudi na abanto baye bagacha korwa bosio, ekaba goika aumerane nabarabwo. 21Daudi konya otebire ng’a, “Amaene, mbosa narenge korenda enibo y’omonto oyo aiga ase erooro. Ende tiyasira nonya neyemo ase chinibo chiaye chionsi. Na bono ong’akanire amabe ase amaya. 22Ekeene, Nyasae ang’e egesusuro bono na kogenderera onye mambia kobogokia tekonyora naitire na gosiria abanto abasacha bonsi bare amo na Nabali.”
23Ekero Abigaeli aroche Daudi agaika bwango korwa ase etigere, agekumba inse, akaumama ase obosio bwa Daudi. 24Ekero atungaime inse ase amagoro a Daudi agateba, “Omonene one, okomocha okwo tiga kobarwe igoro yane; koranche ontige inche omosomba oo omokungu nkwane, naye otegerere amang’ana aane. 25Omonene one, tobaisa kobara Nabali, omonto oyo omobe, ng’a nomonto ogwenerete. Nere okorokwa Nabali, na engencho y’erieta eri noboriri. Naboigo are omonto omoriri. Bono inche, omosomba oo omokungu, tinaroche abanto aba aye, omonene one, gwatomete. 26Aye omonene one, Omonene nere ogotangire tigwaitera amanyinga na kweruseria egesiomba nokoboko kwao omonyene. Bono buna Omonene are moyo, na buna aye ore moyo, tiga ababisa bao, abwo bakorigia kogokora bobe, babe buna Nabali. 27Na bono, omonene one, ebiegwa ebi inche omosomba oo nakorenteire, tiga biegwe abanto aba bakogotunyana aye omonene one. 28Nasabire, onyabere okomocha kwane, inche omosomba oo omokungu. Ekeene, Omonene nakore enyomba yao egenderere kobao, ekiagera aye nigo okorwana esegi yaye; na amabe takonyorekana asore ase obogima bwao bwonsi. 29Onye abanto bagokoimokera na korigia obogima bwao kobosiria, Omonene, Nyasae oo, narende obogima bwao, na gokobeka obeere amo nabare moyo, korende natugute obogima bw’ababisa bao buna rigena rikorutwa gochia aare nenduruche. 30Omonene one, ekero Omonene agakoreire amaya ayio onsi akorierete eira ng’a nagokorere, naende okobekire obe omoruoti bw’Abaisraeli, 31aye, omonene one, tokoba nomoichano gose nenkoro egokogambia, ng’a ngwaiterete amanyinga ’abanto batari na komocha, gose ng’a nkweruseretie egesiomba. Bono kerabe Omonene ogokoreire amaya ayio, ong’inyore inche omosomba oo.”
32Erio Daudi agatebia Abigaeli, “Atogigwe Omonene, Nyasae bw’Abaisraeli, oyio ogotoma gwacha koumerana nainche ase rituko ria rero. 33Obong’aini bwao botogigwe, naye boigo otogigwe, ekiagera rituko ria rero gwantangire ting’itera amanyinga na imbe nokomocha gose kweruseria egesiomba inche omonyene. 34Ekeene buna Omonene, Nyasae bw’Abaisraeli, are moyo, oyontangire tinakora amabe asore, onye otaimogete bwango na koumerana nainche, monto onde tarenge nonya noyomo bw’abasacha b’enyomba ya Nabali anga ore gocha koba moyo goika mambia kobogokiamoka.” 35Erio Daudi agancha ebinto biria omokungu oria amoirerete, akamotebia, “Irana gochia bwoo nomorembe. Rora, naigure amang’ana ao, nanchire okoboria kwao.”
36Ekero Abigaeli aigete nka, akanyora Nabali obwate omoyega omonene oyoisaine omoruoti agokora. Nabali nigo arenge nomochengo ase enkoro yaye ime, ekiagera konya otindire mono. Ase ayio Abigaeli tamotebetie gento kende, korende akaganya goika bogakia mambia. 37Kobwakiire mambia, na Nabali gatindokire, Abigaeli akamotebia amang’ana ayio. Erio enkoro yaye ekarianyeka, ekoma pa, ekaba buna rigena. 38Naende nyuma y’amatuko ikomi kaerire Omonene agaaka Nabali, na ere agakwa.
39Ekero Daudi aigwete ng’a Nabali okure, akabora, “Omonene atogigwe, ekiagera onduseirie egesiomba ase Nabali ase amabe onsi aya ere ankoreire; naende ontangire inche, omosomba oye, tinakora ebibe. Omonene oakanire obobe obwo, na kobobeka igoro ase Nabali omonyene.”
Erio Daudi agatoma abanto bakwane n’Abigaeli, erinde amonyuome abe mokaye. 40Ekero abasomba ba Daudi baigete ase Abigaeli agwo Karimeli, bakamotebia, “Daudi nigo atotomire asore, erinde tokoire obe mokaye.”
41Abigaeli akaimoka, agatung’ama inse, akabora, “Rora, inche omosomba oye omokungu nigo inde ang’e gosibia amagoro ’abasomba b’omonene one.” 42Abigaeli akebeka ang’e bwango, akaimoka akariina etigere, akagenda amo nabasomba baye abaiseke batano. Bagatunyana abanto abwo Daudi atomete, na omosubati oyio akaba moga Daudi.
43Daudi konya onyuomire Ahinoamu korwa Yesireeli; ase igo abwo babere bakaba abakungu baye. 44Saulo konya orure Mikali, omosubati oye, oyorenge moga Daudi, ase Paliti, mosinto o Laisi bw’omochie o Galimu.
Currently Selected:
1 SAMWELI 25: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
