1 SAMWELI 24
24
Daudi okonyora Saulo ase rikuruma ria Eni‐Gedi, korende tamoita
1Ekero Saulo airanete korwa ase okobwatia Abafilisti, agatebigwa ng’a Daudi nao are ase erooro ya Eni‐Gedi. 2Erio Saulo akaira abarwani chilifu isato abachoretwe korwa ase Abaisraeli bonsi, akagenda korigia Daudi, na abanto baye ase Ebitare bie Chimori chi’Orosana. 3Agaika ase amakuruma e ching’ondi agwo ase enchera, na agwo ase rikuruma erimo agasoa ase ogwekonya. Daudi amo nabanto baye nao baikaransete ime y’ekenunchi kie rikuruma erio. 4Abanto ba Daudi bakamotebia, “Rituko eri ndiria Omonene agotebetie ng’a nabeke omobisa oo ase okoboko kwao, naye omokore buna oranche.” Erio Daudi agachoba ng’ora‐ng’ora, akabutora omokoba bw’eganchwa ya Saulo bobisi. 5Korende nyuma y’ayio enkoro ya Daudi egachaka komogambia, ekiagera konya abutoire omokoba bw’eanga ya Saulo. 6Agatebia abanto baye, “Tiga Omonene antange, timbaisa gokora obobe obwo ase omonene one, ekiagera ere nigo are omoakwa amaguta bw’Omonene.” 7Daudi akaebereria abanto baye ase okobatebia amang’ana ayio, na tabaa ribaga baumokere Saulo.
Erio Saulo akaimoka korwa ase rikuruma erio, akagenderera orogendo rwaye. 8Daudi nere akaimoka agasoka korwa ase rikuruma riria, akabwatia Saulo, akarangeria neriogi, agateba, “Aye omoruoti, omonene one!” Ekero Saulo eonchorete korigereria, Daudi agatung’ama inse, akaumama, akorokia amasikani. 9Erio Daudi akaboria Saulo, “Nase ki okoigwera amang’ana abanto bagoteba ng’a inche Daudi ngokorigia inde ngokore bobe? 10Rigereria orore, rituko ria rero, agwo ase rikuruma ime, Omonene nigo akobeka ase okoboko kwane, na abanto bande nigo bambetereria ng’a ngoite, korende inche nagotiga kore moyo. Nigo nateba ng’a tinkorambora okoboko kwane kogokore aye omonene one bobe, ekiagera aye nomoakwa amaguta bw’Omonene. 11Aye tata, rigereria orore omokoba bw’eanga yao, ore koboko kwane; nigo nayobutora, korende nkagotiga kore moyo, erio nario oramanye ng’a obobe gose ogosaria tibiri asende; inche tindakora ebibe asore, nonya gokorigia kong’ita. 12Tiga Omonene arore oyore nokomocha, ninche gose naye. Omonene anduserie egesiomba, korende okoboko kwane tikogokora bobe. 13Abanto abakoro nigo bagokwana iga: Obobe nigo bogosoka korwa ase abakori amabe. Ase ayio amaboko aane takogokorera bobe bonde. 14Ning’o aye omoruoti bw’Abaisraeli gwachicheire? Ning’o okobwatia? Inee! Nesese ekwete okobwatia, gose nensona. 15Tiga Omonene anache ekina ase egati yane naye, erio andwanerere na gontooria korwa ase okoboko kwao.”
16Ekero Daudi akoorire gokwana amang’ana aya, Saulo akamoboria, “Eri neriogi riao aye Daudi, omwana one!” Erio Saulo akarera, 17agatebia Daudi, “Aye nigo ore omonyaboronge kombua, ekiagera kwang’akanire amaya ase amabe, korende inche nagoakanire amabe ase amaya. 18Ase rituko ria rero kwaorokirie buna gwakorire amaya asende, ekiagera otang’ita ekero Omonene ambeka ase okoboko kwao. 19Inee! Onye omonto onyorire omobisa oye, nanyare komotiga ore moyo? Ase ayio Omonene tiga akoe eng’eria yao ase amaya aya gwankoreire ase rituko ria rero. 20Bono inche namanyire ng’a naye orabe omoruoti, na oboruoti bw’Abaisraeli mbogenderere koba ase okoboko kwao. 21Gaki bono tiana ase obosio bw’Omonene ng’a togosiria ororeria rwane, naende ng’a togosiria erieta riane rirue ase enyomba ya tata, riebwe.” 22Ase ayio Daudi agatiana buna igo. Erio Saulo akagenda bwoye, na Daudi na abanto baye bakagenda komenya ase amakuruma ’egetare.
Currently Selected:
1 SAMWELI 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
