1 SAMWELI 23
23
Daudi ogotooria omochie o Keila
1Abanto bagatebia Daudi, “Abafilisti nkorwania bakare omochie o Keila, na basakoire chindagera chinyia korwa ase ebiooreri.” 2Ase ayio Daudi akaboria Omonene, “Nkogenda nde korwania Abafilisti abwo esegi?”
Na Omonene akamotebia, “Genda obarwanie, na otoorie Keila.”
3Korende abanto ba Daudi bakamotebia, “Rora ekero tore aiga ase ense ya Yuda nigo tokwoboa. Inee! Naki erabe rende onye tokogenda Keila korwania abarwani b’Abafilisti esegi? Titokwoboa kobua?” 4Erio Daudi akaboria Omonene naende, na Omonene akamoiraneria, “Imoka, ogende Keila, ekiagera nimbeke Abafilisti ase okoboko kwao.” 5Ase igo Daudi na abanto baye bakagenda Keila, bakarwania Abafilisti, bakababua. Bagaita Abafilisti abange mono, bagoosa chiombe chiabo. Igo Daudi agatooria abanto bamenyete agwo Keila.
6Ekero Abiatari, mosinto o Ahimeleki, atamete gochia ase Daudi agwo Keila, nigo arentete egesibao ki’obokuani.
7Saulo agatebigwa ng’a Daudi osoire Keila. Erio agateba, “Nyasae obekire Daudi ase okoboko kwane, igo bwebwatire ere bweka, ekiagera osoire ase omochie obwate ebiita na ebisiekero.” 8Saulo akarangeria abanto bonsi bagende Keila koboera Daudi amo nabanto baye, na kobarwania esegi.
9Daudi agachia komanya ng’a Saulo okorire omoroberio bw’ogocha komosiria, agatebia Abiatari omokuani, “Renta egesibao ekio ki’obokuani aiga.” 10Erio Daudi akabora, “Aye Omonene, Nyasae bw’Abaisraeli, inche, omosomba oo, naigure ng’a Saulo ngocha are aiga Keila gosaria omochie ase engencho yane. 11Inee! Abanto ba Keila nigo barandue, bambeke ase amaboko aye? Saulo nachiche buna inche omosomba oo, naigure? Aye Omonene, Nyasae bw’Abaisraeli, nagosoroire, koranche ontebie inche omosomba oo ekerabe.”
Na Omonene akamoiraneria, “Ee, nachiche.”
12Naende Daudi akamoboria, “Inee! Abanto ba Keila nigo bagochia kondua inche amo nabanto baane, erinde batobeke ase okoboko gwa Saulo?”
Omonene, akamoiraneria, “Ee, nababarue.”
13Erio Daudi na abanto baye abarenge koreng’ana amagana atano na rimo, bakaimoka, bakarua agwo Keila, bakana‐koong’anya gochia aande onsi ase baare konyara kogenda.
Daudi ore ase ense y’ebitunwa
14Ase igo Daudi akagenderera komenya ase amabwago ’ebitunwa ase erooro ya Sifu; na Saulo akagenderera kona‐komorigia kera rituko, korende Omonene tabegete Daudi ase amaboko aye. 15Ekero Daudi arenge agwo Horesi, ase erooro ya Sifu, akaigwa ng’a Saulo konya ochire agwo korigia gosiria obogima bwaye.
16Yonathani, mosinto o Saulo, akaimoka akagenda ase Daudi, aria Horesi, akamoremia na komobeka chinguru ase Nyasae. 17Akamotebia, “Toiroka, ekiagera Saulo tata, tagokonyora agokorere bobe aye nobe omoruoti bw’Abaisraeli, nainche nimbe oyo kabere asore. Tata namanyete ayio.” 18Erio abwo babere bagakora okobwatana kw’ogotianania ase obosio bw’Omonene. Daudi agatigara omenyete agwo Horesi, na Yonathani akairana gochia nka.
19Abanto bande ba Sifu bakagenda ase Saulo agwo Gibea, bakamotebia, “Daudi nigo ebisete ase orogongo rwaito ase amabwago ’ebitunwa bia Horesi, ase ekegoro kia Hakila, irianyi ya Yesimoni. 20Ase ayio, aye omoruoti, inchuo erinde okore buna kwaganetie, naintwe ntomobeke ase okoboko kwao.”
21Saulo akabairaneria, “Tiga Omonene abasesenie, ekiagera mwandoreire amabera. 22Genda morore na koenekia ase amenyete, naende ng’a ning’o omororire oreo. Natebigwe ng’a ere nigo are omwoge mono ase okong’ainereria. 23Ase ayio genda momanyererie buya aase onsi obwebiso bore, erio moirane asende montebie amaene, nainche ngende amo nainwe. Onye ore ase orogongo orwo, nimorigie ase egati ye chilifu chionsi chi’Abayuda.”
24Barabwo bakaimoka bagatang’anera Saulo, bakagenda Sifu, korende Daudi amo nabanto baye nao barenge ase erooro ya Maoni, agwo ase Ekerubo Ekiomo, irianyi ya Yesimona. 25Saulo na abanto baye bakagenda korigia Daudi, korende Daudi agatebigwa amang’ana ayio. Ase ayio akagenda ase egetare kiarenge ase erooro ya Maoni, akabeerao. Ekero Saulo aigwete ng’a Daudi ogendire agwo akamobwatia gochiao. 26Saulo akagenda ensemo eyemo y’egetunwa, na Daudi na abanto baye bakagenda ensemo ende. Daudi nigo abete okoayerera gotama Saulo, na Saulo na abanto baye konya bachakire konaaria Daudi na abanto baye, ase okobabwata.
27Erio omonto agacha ase Saulo akamotebia, “Irana, ayerera bwango, ekiagera Abafilisti bachire mobosokano korwania ense yaito.” 28Ase igo Saulo agatiga kobwatia Daudi, akairana, akagenda korwania Abafilisti. Ase ayio aase agwo akarokwa “Egetare ki’Ogwatananeka.” 29Daudi akarua aase agwo, akagenda, akamenya ase amakuruma ime ase ebitare bia Eni‐Gedi.
Currently Selected:
1 SAMWELI 23: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
