1 SAMWELI 22
22
Saulo ogoita abakuani
1Daudi akarua agwo, agatama gochia ase rikuruma ri’Adulamu. Ekero abamwabo, na eamate yaye bonsi, baigwete ayio, bakagenda agwo ase arenge. 2Abanto bachandegete, na abwo babwate chisira, na abwo bataisanegete nobogima bwabo, bakamochera, nere akaba omotang’ani obo. Abanto abasacha abarenge amo nere nigo barenge koreng’ana amagana ane.
3Naende Daudi akarua agwo, akagenda Misipa o Moabu; agatebia omoruoti o Moabu, “Koranche oe tata na baba ribaga bache kobeera aa, goika imanye aya Nyasae arankorere.” 4Daudi agatiga ise na ng’ina bare agwo ase omoruoti o Moabu; barabwo bakagenderera komenya agwo ase engaki yonsi Daudi abete bwebisete ase rikuruma.
5Erio Gadi omobani agatebia Daudi, “Tokogenderera kobeera ase rikuruma eri; karueo, ogende ase ense ya Yuda.” Ase ayio Daudi akaruao akagenda ase rinani ria Hereti.
6Rituko erimo Saulo nigo aikaransete inse y’omote onga buna ekerachuoki ase ekegoro agwo Gibea, obwate ritimo ase okoboko kwaye, na abasomba baye nigo bateneine bamoetanaine. Erio agatebigwa ng’a Daudi amo nabanto barenge komo barorekanire. 7Saulo agakwana nabasomba baye, akabora, “Igwa inwe Ababenjamin! Inee! Mosinto o Yese nae kera oyomo oino emegondo y’endagera amo ney’emesabibu? Nakore inwe mwensi mobe abatang’ani b’abarwani chilifu na ab’amagana? 8Ayio naro agerire inwe mwensi mwakorire emeroberio ya bobisi ere mamincha yane? Onde tari ogontebia ng’a omwana one okorire okobwatana na mosinto o Yese, gose onde tari okondorera amabera antebie ng’a omwana one oseegetire abasomba baane babeire mamincha yane, erio bamboere buna ere rero iga.”
9Erio Doegi Omoedomu, oyo oteneine amo nabasomba ba Saulo, akairaneria, akabora, “Narora mosinto o Yese okogenda ase Ahimeleki, mosinto bw’Ahitubu, agwo Nobu. 10Ahimeleki akamoboreria ase Omonene, akamoa endagera airane ase orogendo rwaye; boigo akamoa na omoyio oria o Goliato Omofilisti.”
11Erio omoruoti agatoma abanto korangeria Ahimeleki omokuani, mosinto bw’Ahitubu, amo nabanto bonsi b’eamate yaye, na abakuani bonsi abarenge agwo Nobu. Abwo bonsi bakagenda ase omoruoti. 12Saulo akabora, “Aye mosinto bw’Ahitubu, tegerera, oigwe.”
Ere agaitaba, “Nao inde aa, Omonene one.”
13Saulo akamoboria, “Nase ki aye na mosinto o Yese mwabeire mamincha yane? Aye nkwamoa endagera, na omoyio o birende naende okaboria Nyasae ase engencho yaye? Ere obeire mamincha yane na okomboera buna ere rero iga.”
14Ahimeleki akairaneria omoruoti, “Ning’o ase abasomba bao ore omwegenwa buna Daudi? Naende aye omoruoti igo ore ise biara. Daudi boigo nomoteneneri bw’abarendi bao. Nigo asikire mono ase enyomba yao. 15Inee! Eye nengaki entang’ani nabeire nkomoboreria korwa ase Nyasae? Taibo aye omoruoti tobaisa kombarera inche, omosomba oo, gose eamate ya tata bobe bonde, ekiagera timanyeti gento kende gionsi ase ayio, kebe ekenene gose egeke.”
16Korende omoruoti agatebia Ahimeleki, “Aye amo nabanto bonsi b’eamate ya iso goika mokwe.” 17Erio omoruoti agatebia abarendi abwo bamoetanaine, “Imoka, moite abakuani abwo b’Omonene, ekiagera nigo babwataine na Daudi. Boigo barabwo mbamanyete ng’a otamire na tibantebetie.” Korende abasomba b’omoruoti bakaanga korambora amaboko abo ase ogoita abakuani b’Omonene. 18Erio omoruoti agatebia Doegi, “Aye imoka oite abakuani abwo,” na Doegi, Omoedomu, akaimoka, akabaita. Ase rituko erio agaita abanto emerongo etano na etato, na batano, abwo babegete ebisibao bi’egatani. 19Boigo Saulo agaita nomoro abanto bonsi barenge agwo Nobu, omochie bw’abakuani. Agaita abasacha, na abakungu, na abana amo nabwo bakogonka, ne chiombe, ne chitigere, ne ching’ondi.
20Korende Abiatari bweka ase basinto b’Ahimeleki bw’Ahitubu, nere agatooreka, agatama gochia ase Daudi. 21Abiatari agatebia Daudi ng’a Saulo oitire abakuani b’Omonene. 22Erio Daudi agatebia Abiatari, “Rituko riria Doegi Omoedomu arenge aaria, inche nabo namanyete ng’a goika atebie Saulo; ase ayio ninche nagerete abanto b’eamate yao bonsi bagaitwa. 23Menya aiga amo nainche, tibwoboa. Saulo nigo akorigia obogima bwane, na obwao boigo. Aye koramenye asende, tokonyorwa na bobe bonde.”
Currently Selected:
1 SAMWELI 22: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
