1 SAMWELI 20
20
Yonathani ogokonya Daudi
1Daudi agatama korwa Nayoti agwo Rama, akagenda ase Yonathani, akamoboria, “Ninki nakorire? Okomocha kwane, na ebibe biane mbiribi ase obosio bwa iso? Nase ki arigetie kong’ita?”
2Yonathani akamoiraneria, “Taibo, togokwa. Tata tari gokora gento kende gionsi, ekenene gose egeke, atantebeti. Nase ki tata arambise ring’ana erio, atamanyia? Ayio takoba bo.”
3Daudi akairaneria ase ogotiana, agateba, “Iso igo amanyete buya ng’a aye nonyanchete mono, na ororire ng’a tari buya akomanyie ring’ana erio, ekiagera nigo riragoichanie mono. Korende ekeene, buna Omonene are moyo, na buna aye ore moyo, ngetigarete egetambokero ekemo gioka egati yane na amakweri.”
4Erio Yonathani akamotebia, “Gento kende gionsi oganetie ningokorere.”
5Daudi agatebia Yonathani, “Ankio ne Rituko Rinene ri’Omotienyi Omoyia, nigo embetereretie ng’a ng’ikaranse koragera amo nomoruoti, korende ing’a ribaga ngende kwebisa agwo ase omogondo goika ankio ende mogoroba. 6Kerabe ng’a iso tandochi ase omoyega oyio, omotebie: Daudi nigo ansaba ribaga ng’a aminyoke gochia Bethlehemu, omochie oye, ase okorua ekeng’wanso ki’omwaka amo neamate yaye yonsi. 7Aise goteba: Ayio mbuya, rirorio inche, omosomba oo, ninyare koba nomorembe, korende karabe nendamwamu ase ayio, rirorio omanye ng’a bwerure gokora amabe. 8Gaki onkorere inche, omosomba oo, amaya, ekiagera gwakorire okobwatana kw’ogotianania amo nainche ase obosio bw’Omonene. Korende onye okomocha kore asende, rirorio aye omonyene ong’ite? Nase ki okong’ira ase iso, erinde ere ang’ite?”
9Yonathani akairaneria, “Taibo! Takoba bo. Onye ndiria imanyete ekeene ng’a tata narengereretie kogokorera bobe, Inee, nanga rirorio tinagotebia amang’ana ayio.”
10Daudi akamoboria, “Iso karakoiranerie amang’ana amakong’u, Inee, ning’o orache gontebia ayio?”
11Erio Yonathani akamotebia, “Inchuo togende ase egetii.” Bonsi babere bakagendao, 12na Yonathani akamotebia Daudi. “Omonene, Nyasae bw’Abaisraeli, abe kirori ase aya. Ase chinsa buna echi, ankio gose ankio ende, nindigie komanya ebirengererio bia tata buna bire igoro yao, na kondabimanye, ningotomere amang’ana, erinde obimanye. 13Konye tata bwerure kogokorera bobe, rirorio Omonene ang’e inche Yonathani egesusuro onye tinkogotebia okogania gwa tata, na ngotige otame na bwetoorie. Omonene abe amo naye buna arenge na tata. 14Onye ngendererete koba moyo, oorokie obwanchani bw’Omonene asende, erinde tinkwa, 15gose tobaisa korusia obwanchani obwo korwa ase ororeria rwane nonya ng’ake, nonya nekero Omonene arasirie kera omobisa oo arue ase ense. 16Agwo Yonathani agakora okobwatana kw’ogotianania neamate ya Daudi, agateba, Omonene nae ababisa ba Daudi egesusuro.”
17Erio Yonathani akaboria Daudi arie eira na gotiana naende ng’a namwanche, ekiagera Yonathani nigo anchete Daudi buna eanchete ere omonyene. 18Erio Yonathani agatebia Daudi, “Ankio ne Rituko Rinene ri’Omotienyi Omoyia, na ekiagera togochi‐gocha koba ase omoyega, ekerogo kiao nigo keratigare bosa. 19Ankio ende otirimboke bwango gochia aase aria kwebisete rituko riria kwaganeirie. Obeere aroro, moino y’etui y’amagena aria. 20Nindute emegwe etato gochia ang’e netui eria, buna negento nkorasa. 21Erio nintome omosomba one arigie emegwe eria. Kondatebie omosomba oria: Rigereia, emegwe nigo ere magega ao, gocha ensemo yane, genda oyerente, rirorio aye Daudi ochiche, obe nomorembe. Ekeene, buna Omonene are moyo, togokorerwa bobe bonde. 22Korende onye ngotebia omwana oria: Rigereria, emegwe eyio bosio bwao aaria moino, rirorio aye Daudi otame, ekiagera n’Omonene okogotebia ogende. 23Nase amang’ana aria twakwanete, inche naye, tiga Omonene abe kirori ase egati yaito kogenderera botambe.”
24Ase igo Daudi akebisa mogondo na ekero ki’Omotienyi Omoyia omoruoti agaikaransa koragera. 25Omoruoti agaikaransa ase ekerogo kiaye, ang’e nenyasi, buna botambe; na Yonathani agatenena bosio bwaye, na Abineri agaikaransa ensemo ya Saulo. Korende ekerogo gia Daudi kegatigara bosa. 26Saulo takwanete gento kende ase rituko riria, ekiagera nigo arengereretie ng’a ring’ana gete riamonyorire Daudi; ande tagachenegeti. 27Ase rituko ria kabere ri’omoyega bw’Omotienyi Omoyia, ekerogo gia Daudi nigo kiagendererete gotigara bosa, na Saulo akaboria Yonathani momura oye, “Nase ki momura o Yese atachete koragera igoro gose rero?”
28Yonathani akairaneria Saulo, “Daudi nigo amboria ribaga agende Bethlehemu, 29agateba: Abanto b’eamate yane ngochia bare korua ekeng’wanso agwo ase omochie, na momura ominto onchikire ng’a imbeo. Ase ayio, onye nanyorire ogwancherwa asore, ing’a ribaga ngende korora abaminto. Aya naro agera atachicha ase endagera yao, aye omoruoti.”
30Erio Saulo akaba nendamwamu enene ase Yonathani, akamotebia, “Aye omwana bw’omokungu omosaria, nimanyete ng’a kwabwatanire na mosinto o Yese, ase okwerentera obosooku, na obosooku bw’obogetirianda bwa nyoko. 31Nomanyete ng’a ekero mosinto o Yese agendererete koba moyo ase ense, aye tokonyara koba nomorembe, gose oboruoti tibokoba obwao. Ase ayio, toma abanto bamondetere; ere goika akwe.”
32Erio Yonathani akamoboria, “Nase ki araitwe akwe? Ngento ki akorire?”
33Agwo Saulo akaimokia ritimo akamoruta amobete. Bono Yonathani akamanya ng’a ise narigetie goita Daudi. 34Yonathani akaimoka korwa ase emesa ore nendamwamu enene na tariete gento ase rituko erio ria kabere ri’Omotienyi Omoyia. Nigo abete oichanete ase engencho y’obosooku ise amokorerete ase okogania goita Daudi. 35Emambia ya kabere, Yonathani amo nomwana oria omomura, bakagenda mogondo, ase engaki konya bachikanire na Daudi. 36Agatebia omwana oria, “Minyoka origie emegwe eria nkoruta.” Ekero omwana oria arenge kominyoka, Yonathani akaruta omogwe, noro ogaeta igoro yaye, okagwa bosio bwaye. 37Na ekero omwana oria aigete aase omogwe oria ogwete, Yonathani agaaka eriogi, akamotebia, “Omogwe oyio ore bosio bwao, aaria moino.” 38Erio Yonathani akarangeria omomura oria, akamotebia, “Minyoka bwango, tobaisa gotebana.” Na omwana oria agasangereria emegwe eria, erio akairana gocha ase omonene oye. 39Omwana oria tamanyete ng’a ninki engencho y’amang’ana ayio, korende Yonathani na Daudi mbayamanyete. 40Yonathani akaa omosae oria ebirwanero biaye akamotebia, “Genda, obiire ase omochie.”
41Ekero omwana oria achiire, Daudi akaoroka korwa ase etui aase ebisete, agatung’ama inse, akaumama na agekumba ara gatato. Erio Daudi na Yonathani bakanyunyuntana na korererana, korende Daudi akamenta korera mono. 42Erio Yonathani akamotebia, “Genda nomorembe, na abe buna twatiananirie ase erieta ri’Omonene togateba: Omonene abe kirori ase egati yao nainche, na ase egati y’ororeria rwao na orwane, kogenderera botambe.” 43Erio Daudi akaimoka, akarua agwo, akagenda, na Yonathani akairana ase omochie.
Currently Selected:
1 SAMWELI 20: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
