1 SAMWELI 19
19
Daudi ogochandwa na Saulo
1Saulo agakwana na Yonathani, omomura oye, na abasomba baye bonsi ng’a naganetie goita Daudi, korende Yonathani nigo anchete Daudi mono. 2Yonathani agatebia Daudi, “Saulo tata nigo aganetie kogoita. Ase ayio bwerende mono ankio mambia; ogende aase are bobisi, bwebise. 3Inche ningende ntenene ang’e ase tata ase egetii, aria ase orabeere, nkwane nere igoro yao, kondanyore amang’ana buna are, ningotebie.”
4Yonathani agakwana na Saulo ise amang’ana amaya igoro ya Daudi, akamotebia “Aye omoruoti, tobaisa gokorera Daudi, omosomba oo, bobe, ekiagera ere tana gokomochera, korende ase aya onsi abeire ogokora nigo agokonyete mono. 5Ere taboraarete obogima bwaye, ekero aitete Omofilisti oria, na Omonene akanyorera Abaisraeli obobui obonene mono. Aye nkwaroche amang’ana ayio, na okagoka ase ayio. Nase ki rende orakore ebibe na goitera amanyinga omonto otari na komocha, ase ogoita Daudi?”
6Saulo akaigwera amang’ana a Yonathani, agatiana agateba, “Ekeene, buna Omonene are moyo, Daudi tagoitwa.” 7Erio Yonathani akarangeria Daudi, akamotebia amang’ana ayio onsi. Nyuma y’ayio akamoira ase Saulo, na Daudi akaba ogokorera Saulo buna agwo ritang’ani.
8Esegi egatuboka naende, na Daudi akagenda korwania Abafilisti, akababua obobui obonene mono. Barabwo bagatama korwa asare.
9Rituko erimo ekero Saulo aikaransete nyomba mwaye, obwate ritimo ase okoboko kwaye, na Daudi nigo agendererete kobugia obokano, omoika omobe okorwa ase Nyasae ogaika igoro ase Saulo, 10Saulo agateema kobeta Daudi ritimo amobwateranie enyasi, korende Daudi akebacha, ne ritimo riria rikabeta enyasi. Daudi agatama, agatooreka ase obotuko obwo.
11Ase obotuko obwo Saulo agatoma abanto ase enyomba ya Daudi komoboera, erinde bamoite mambia kagosoka. Korende Mikali, moga Daudi, akamokurera, akamotebia, “Otetooreti ase obotuko obo, mambia goika oche oitwe.” 12Erio Mikali agaikeria Daudi goetera ase ekebao, na Daudi agatama agetooria. 13Mikali akaimokia omogwekano bw’ogosasimwa orenge nyomba ime, akaywareria borere, akabeka amanya e chimbori asisire ase omotwe bw’omogwekano oria, erio akayobisia egetambaa. 14Erio abanto batometwe na Saulo kwoyia Daudi bachete, na Mikali akabatebia, “Orwarire.” 15Saulo akabatoma naende ase Daudi, akabatebia, “Momobogorie noborere, momorente asende, erinde imoite.” 16Ekero abanto abwo basoete nyomba, bakarora omogwekano oria bw’ogosasimwa ore borere, na amanya e chimbori asisire abekire ase omotwe oye. 17Erio Saulo akaboria Mikali, “Nase ki kwang’aina ase enchera buna eye, na ogatiga omobisa one agatama agetooria?”
Mikali akamoiraneria, “Ere nigo antebetie: Ntiga ngende, timbaisa kogoita.”
18Ekero Daudi atamire na gwetooria, akagenda ase Samweli agwo Rama, akamotebia amang’ana onsi Saulo konya amokoreire. Erio Samweli na Daudi bakagenda Nayoti, bakamenyao. 19Saulo agatebigwa ng’a Daudi nigo amenyete Nayoti aria Rama. 20Ase ayio Saulo agatoma abanto boyie Daudi. Korende ekero abanto aba baigeteo, bakarora ekeombe ki’ababani bakobaboka ase okobana, na Samweli oteneineo buna omotang’ani obo. Omoika o Nyasae ogaika igoro asebare, nabarabwo boigo bagachaka kobana. 21Ekero Saulo aigwete aya abanyorire, agatoma abanto bande, nabarabwo boigo bagachaka kobaboka ase okobana. Na ekero Saulo atomete abanto eria gatato nabwo bagachaka kobana. 22Erio Saulo omonyene akagenda Rama, agaika ase ensoko enene y’amache yare agwo Seku, akaboria, “Ng’ai Samweli na Daudi bare?” Agatebigwa ng’a nao bakare Nayoti agwo Rama. 23Ase igo akagenda gochia Nayoti agwo Rama. Korende Omoika o Nyasae ogaika nonya nigoro yaye, na ere akaba okobana kagendererete nchera goika Nayoti agwo Rama. 24Ere boigo akarusia chianga chiaye akababoka ase okobana ase obosio bwa Samweli, akagwa inse, akarara agwo rituko rigima, omobaso na obotuko, ore getirianda. Ase ayio amang’ana nigo agotebwa: “Inee! Saulo nere nabeire oyomo bw’ababani?”
Currently Selected:
1 SAMWELI 19: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
