1 SAMWELI 18
18
Yonathani okoba omosani o Daudi
1Ekero Daudi akoorire gokwana na Saulo, Yonathani akang’useka na Daudi akaba okomwancha mono, amwanchete buna eanchete ere omonyene. 2Korwa rituko riria Saulo akaa Daudi ribaga komenya asare, gose tamotigete airane gochia nka o ise. 3Erio Yonathani agakora okobwatana kw’ogotianania na Daudi, ekiagera nigo amwanchete buna eanchete ere omonyene. 4Yonathani akarusia egetambaa kiaye gi’okwambara agakea Daudi, akamoa nebirwanero biaye, na omoyio o birende, na obota, na orokini. 5Aande onsi ase Saulo arenge gotoma Daudi, Daudi nigo arenge konyora obobui. Ase ayio Saulo akamobeka akaba omotang’ani bw’abarwani. Daudi igo anyorete ogwancherwa kw’abanto bonsi na okw’abasomba ba Saulo.
Saulo okororera Daudi ribero
6Ekaba ekero Daudi are koirana, ekero aitire Omofilisti oria, na abarwani b’esegi bakoirana boigo, abakungu bagacha korwa ase emechie yonsi bakana‐gotera na gotenga bare nomogoko, bakobugia ebikonu ne chinchigiri. 7Abakungu bakaba bagotera, bakobora, “Saulo oitire chilifu chiaye, korende Daudi oitire chilifu chiaye emerongo na emerongo.” 8Ayio akagechia Saulo, goika akaba nendamwamu enene, agateba, “Abakungu aba batebire ng’a Daudi oitire chilifu emerongo na emerongo, korende asende, batebire ng’a ne chilifu rioka. Ninki rende giatigaire batamoeti goika bono otatiga oboruoti?” 9Korwa ase rituko riria na kogenderera Saulo akarorera Daudi ribero.
10Rituko ria kabere omoika omobe okorwa ase Nyasae ogacha igoro ase Saulo, na ere akaba okobaboka buna ebarimo agwo nyomba mwaye. Daudi nigo arenge kobugia obokano buna anarete kera rituko, na Saulo nabwate ritimo koboko kwaye.
11Saulo akarengereria ase enkoro yaye agetebia, “Nigo nkoruta ritimo, mbete Daudi imobwateranie enyasi.” Erio akamoruta Daudi ritimo ara kabere, korende Daudi akebacha.
12Saulo akairoka Daudi mono, ekiagera Omonene nigo arenge amo na Daudi, korende konya otigire Saulo. 13Ase ayio Saulo akamorusia korwa asare, akamobeka akaba omotang’ani bw’abarwani baye b’esegi elifu eyemo, na Daudi akaba ogotang’ana abanto aande onsi ase baare kogenda na koirana. 14Daudi nigo arenge konyora obobui ase chinchera chiaye chionsi, ekiagera Omonene nigo arenge amo nere. 15Ekero Saulo aroche ng’a Daudi onyorire obobui, akamwoboa mono kobua. 16Korende Abaisraeli na Abayuda bonsi bakamwancha Daudi mono, ekiagera arenge kobatang’ana kogenda aande onsi ase baare kogenda na koirana.
Daudi okonyuoma omoiseke o Saulo
17Erio Saulo agatebia Daudi, “Rora, ninkoe Merabu, omoiseke one omotangi, abe mokao, onye kogonkorera buna omonto omoremu, erinde orwane esegi y’Omonene.” Saulo igo arengereretie ng’a Daudi nigo agochia goitwa n’Abafilisti, ng’a ere omonyene tabaisa komoita.
18Daudi akairaneria Saulo, “Inche ninki ng’isaine na obogima bwane ninki boisaine, gose eamate ya tata inki eisaine ase egati y’Abaisraeli, erinde aye omoruoti obe tata biara?” 19Korende ekero engaki yaigete, Saulo arenge koa Daudi Merabu, omoiseke oye, akaonchora ebirengererio biaye, akaa Adirili Omomehola omoiseke oria akaba mokaye.
20Mikali, omoiseke o Saulo, agancha Daudi, na ekero Saulo aigwete amang’ana ayio akagokigwa mono. 21Bono Saulo akarengereria iga, “Nigo ndae Daudi omoiseke oyo, nere orabe okomotega, erinde agwe ase amaboko ’Abafilisti, nabarabwo bamoite.” Ase ayio Saulo agatebia Daudi eria kabere, “Bono onyuome omoiseke one, erinde inche imbe iso biara.” 22Erio Saulo agachika abasomba baye, akabora, “Kwana na Daudi bobisi, momotebie ng’a inche omoruoti nigo ngokirie nere, na abasomba baane bonsi nigo bamwanchete. Ase ayio bono momotebie ng’a inche imbe ise biara.”
23Ase igo abasomba ba Saulo bagatebia Daudi amang’ana ayio bobisi. Nere akabairaneria, “Inee! Inwe nigo moroche ng’a nering’ana rike omoruoti abe tata biara. Inche igo inde omonto omotaka mono, naende tindi na bonene bonde.”
24Abasomba abwo bagachia gotebia Saulo aya Daudi akwanete, 25na Saulo akabachika batebie Daudi ng’a, “Omoruoti taganeti omoe enibo ende yonsi ase okomonyuomera omoiseke oye, otatiga aganetie omorentere amasankwa a isiko ay’ebiimo bi’obosacha bi’Abafilisti rigana erimo bakwete, na igo omoruserie egesiomba ase ababisa baye.” Ase enchera eyio Saulo nigo arengereretie ng’a Daudi agwe ase amaboko ’Abafilisti. 26Ekero abasomba baria batebetie Daudi amang’ana aria Saulo atebete, Daudi akagokigwa naro ng’a omoruoti abe ise biara. Ekero engaki eria konya etaraika, 27Daudi akaimoka, akagenda nabanto baye, agaita Abafilisti amagana abere, akabutora amasankwa abo a isiko ay’ebiimo bi’obosacha, akayarenta onsi ase omoruoti, erinde omoruoti abe ise biara. Erio Saulo akaa Daudi Mikali, akaba mokaye.
28Saulo akarora na akamanya ng’a Omonene nigo arenge amo na Daudi, naende ng’a Mikali, omoiseke oye, nigo amwanchete Daudi. 29Ase ayio Saulo akoboa Daudi mono kobua, naende akaba omobisa oye kogenderera ase obogima bwaye bwonsi.
30Abanene b’Abafilisti bakaba bagocha korwana esegi, korende ase engaki ende yonsi Daudi akaba okonyora obobui kobua abasomba bonsi ba Saulo. Ase igo erieta riaye rigakuma mono na gotogigwa.
Currently Selected:
1 SAMWELI 18: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
