1 कुरिन्थियों 5
5
कलीसिया च अनैतिकता
1इतणा तक सुणने च आया, भई तुहां च व्यभिचार हुआं, वल्कि येढ़ा व्यभिचार सै जे होरीं जातियां च बी नीं हुन्दा, भई इक माहणु अपणी बासना मिटाणे खातर सौतेली माता जो बी नीं छडदा। 2कने तुहें इसा गल्ला पर दुख नीं मनान्दे, पर इस पर गर्व कराँ ये! येढ़ा कुकर्म करने औल़े माहणुये जो तुहांरे बिच्चा ते बाहर कड्डया जाणा चाहिन्दा था।
3हलाँकि हऊँ तुहां सौगी नींआ, पर हऊँ अपणिया आत्मा च तुहां सौगी आ। कने हऊँ येढ़े काम्म करने औल़यां रे बारे च न्याय करी चुक्कीरा मन्नो भई हकीकत च हऊँ तित्थी मौजूद आ। 4ताहली जे तुहें अहांरे प्रभु यीशुये रे नौआं ते इकट्ठा हुआं ये, तां हऊँ बी आत्मा च तुहां सौगी आ, कने अहांरे प्रभु यीशु मसीह रिया सामर्था नेआ, 5येढ़े माहणुये जो शैतान्ना जो सौंपया जाओ, ताकि तिसरा शरीर नाश हुईजो कने तिसरी आत्मा प्रभु यीशुये रे वापस औणे रे दिना च छुटकारा पाई सक्को।
6तुहांरा घमण्ड करना ठीक निआं; क्या तुहें नीं जाणदे, भई थोड़ा जेआ खमीर पूरे गुन्हीरे आट्टे जो खमीर करी देआं? तियां इ ये पाप खमीरा साई दुज्या लोकां च बी फैल्ली सक्कां। 7तुहें पापा जो निकाल़ी देआ सै जे पुराणे खमीरा साई आ ताकि तुहें पूरी तरह पवित्र हुई सक्को। फेरी तुहें नये गुन्हीरे आट्टे साई बणी जाणा सै जे बगैर खमीरा तेआ, तियां जे तुहें हकीकता चे। काँह्भई तिन्हे मसीह रा बलिदान कित्तिरा सै जे अहांरा फसह रे त्योहारा रा मेमना। 8इस खातर औआ अहें फसह रे त्योहारा रा नन्द मनाईये, नांत पुराणे खमीरा ते कने नां बुराई कने दुष्टता रे खमीरा ते, पर सीधाई कने सच्चाईयां रिया अखमीरी रोटिया ते।
अनैतिकता रे खातर न्याय
9मैं अपणी चिट्ठिया च तुहांजो लिख्या था भई व्यभिचारी लोकां री संगती मत करयां। 10पर मेरा मतलब ये नीं था भई तुहें इस संसारा रे व्यभिचारियां, लालचियां, धोखेबाजां, मूर्तियां री पूजा करने औल़यां री संगती नीं करा; नैत तुहांजो त इस संसारा जोई छडणे पौन्दा। 11पर मेरे बोलणे रा मतलब ये था भई जे साथी विश्वासी कहलाणे औल़ा कोई, व्यभिचारी, लोभी, मूर्तीपूजक, निंध्या करने औल़ा, पियक्कड़, या धोखेबाज हो, तां येढ़े माहणुये सौगी रोटी तक बी नीं खायां। 12-13काँह्भई कलीसिया ते बाहर यनि गैर-मसीही लोकां रा न्याय करना मेरा काम्म नींआ; तिन्हांरा न्याय परमेशर करगा। पर तुहांजो अन्दर औल़यां रा यनि कलीसिया रे लोकां रा न्याय करना चाहिन्दा। तियां जे पवित्रशास्त्रा च लिखिरा, “अपणे बिच्चा ते दुष्ट माहणुये जो कड्डी दे।”
Currently Selected:
1 कुरिन्थियों 5: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
