निर्गमन 8

दूइयोवं आफत-मैंडू बन्नां

1तैखन यहोवा, मूसे सेइं ज़ोवं, “फ़िरौने कां गेइतां तैस सेइं ज़ो, यहोवा इन ज़ोते, कि मेरे लोकन गाने दे, ताके तैना मेरी आराधना केरन। 2पन अगर तू तैन गाने न देलो त हेर, अवं तेरे मुल्खे मां मैंडू भेज़तां नुकसान पुज़ाने बालोईं। 3ते नील दरिया मैंडन सेइं भेरोई गालो, ते तैना एइतां तेरे घरे मां ते तेरी आराम केरनेरी ठारी ते तेरे पलंघे पुड़ ते तेरे कम केरनेबालां केरे घरे मां, ते तेरे लोकन पुड़ ते तेरे तंदूरन पुड़ ते खाने पकानेरे भांडन पुड़ भी एज्जेलां। 4ते तेरे लोकन पुड़ ते तेरे कम केरनेबालन पुड़ मैंडू च़ढ़ेलां।”

5फिरी यहोवा, मूसे हुक्म दित्तो, “हारूने सेइं ज़ो, कि दरियान, नेरहन, तालाबन पुड़ ज़ैस हथ्थे मां सोटीए तैस अग्रोवं केर, कि मैंडू मिस्र मुल्खे मां एज्जन।” 6तैखन हारूने मिस्र मुल्खेरे सब नागन पुड़ अपनो हथ अग्रोवं कियो, ते मिस्र मुल्ख मैंडेइं सेइं भेरोई जेव। 7ते मिस्र मुल्खेरे जैदूगिरेइं भी अपने मन्ट्लेईं सेइं एरू केरतां मिस्र मुल्ख मैंडन सेइं भेरि छ़डो।

8तैखन फ़िरौने मूसो त हारून कुजेइतां ज़ोवं, “यहोवा कां बिनती केरा कि मैंडू मेरे मुल्खे मरां ते मेरे लोकन मरां दूर भोन, ते अवं इस्राएली लोकन गाने देलो, ताके तैना यहोवारे लेई बलिदान च़ैढ़ी सकन।” 9तैखन मूसे फ़िरौने सेइं ज़ोवं, “एत्री गल्‍लरो तू मीं हुक्म दे कि अवं तेरे, ते तेरे अधिकारी ते तेरे लोकां केरे लेई केइस तगर बिनती केरि कि मैंडू तेरे त तेरे घरन मरां दूर भोन, ते सिर्फ नील दरियाए मां रान।” 10तैखन फ़िरौने ज़ोवं, “कालां” ते मूसे ज़ोवं, “तेरे ज़ोनेरे मुताबिक भोल्हु, ताके तीं पतो लग्गे कि इश्शे परमेशर यहोवारे बराबर होरो कोई प्रभु अथ्थी नईं। 11ते मैंडू तीं करां ते तेरे घरन मरां ते तेरे अधिकैरन करां ते तेरे लोकन करां दूर भोइतां सिर्फ नील दरियाए मां रालां।” 12तैखन मूसो ते हारून फ़िरौनेरे सामनेरां निस्तां च़ले जे, ते मूसे यहोवा कां मैंडू केरे बारे मां बिनती की, ज़ैना तैनी फ़िरौने कां भेज़ोरां थियां। 13ते यहोवा मूसेरी बिनती शुनी, ते मैंडू सेब्भी घरन, अंगन, ते उडारन मां मेरि जेआं। 14ते लोकेईं तैना अकोट्ठां केरतां ढेर लाए, ते सारो मुल्ख मुश्की सेइं भेरोई जेव। 15पन फ़िरौने ज़ैखन हेरू कि मैंडन करां छुट्टी जे, त तैनी अपनो दिल सखत कियो, ज़ेन्च़रे यहोवा ज़ोवरू थियूं; तैनी तैन केरि न शुनी।

ट्लेइयोवं आफत-जिवाँ बेनी

16फिरी यहोवाए मूसे सेइं ज़ोवं, “हारूने हुक्म दे, ‘तू अपनि सोटी नेइतां तल्‍लेरी धूड़ी पुड़ बह, ताके तै धूड़ सारे मिस्र मुल्खे मां जिवाँ बेनि गान।’” 17तैनेईं तेन्च़रे कियूं, ते हारूने अपनि सोटी नेइतां धूड़ी पुड़ बाई, ते मैन्हन पुड़ ते पैलतू जानबरन पुड़ जिवाँ भोइ जेई, ते सारे मिस्र मुल्खेरी ज़मीनी पुड़ जिवाँ बेनि जेई। 18पन जैदूगिरेइं बड़ी कोशिश की, कि अपने जैदेइं सेइं जिवाँ बनान, पन न बनेई बटे। ते मैन्हन पुड़ ते जानबरन पुड़ जिवाँ बेनोरी रेइ। 19तैखन जैदूगिरेइं फ़िरौने सेइं ज़ोवं, “एन परमेशरेरे हथ्थेरू कम्मे।” पन ज़ेन्च़रे यहोवा ज़ोवरू थियूं फ़िरौनेरो दिल सखत भोइ जेव; तैनी मूसा ते हारूनेरी गल न मन्नी।

च़ेवरोवं आफत-डांघाल

20तैखन यहोवा मूसे सेइं ज़ोवं, “झ़ेझ़ां उठतां फ़िरौने कां गेइतां खड़ो भोइयां तै दरियाए पुड़ एज्जेलो, त तू तैस सेइं ज़ोइयां, ‘यहोवा तीं सेइं इन ज़ोते, कि मेरे लोकन गाने दे, कि तैना मेरी आराधना केरन। 21ते अगर तू मेरे लोकन गाने न देलो, त हेर अवं तेरे लोकन पुड़ ते तेरे घरन मां डांघालां केरे घान भेज़ेलो, ते मिस्री केरे घरन मां ते सैरी ज़मीनी पुड़ ज़ैड़ी-ज़ैड़ी तैना भोल्हे, सैरी ठारां डांघालां केरे घाने सेइं भेरोई गाली। 22ते अवं तैस दिहैड़ी गोशेन इलाके ज़ैस मां मेरे लोक रहतन तैन अलग केरेलो, तैस मां डांघालां केरे घान न भोल्हे, ताके तू ज़ानस कि दुनियाई मां अव्वें यहोवा आईं। 23ते अवं अपने लोकन त तेरे लोकन अलग केरेलो#8:23 अलग केरेलो मुक्तरू अक कम।। ते कालां तगर ऐह निशान बांदो भोल्हो।’” 24ते यहोवा एन्च़रे कियूं, ते फ़िरौनेरे घरे मां ते तैसेरे अधिकैरी केरे घरन मां ते सैरी मिस्र मुल्खे मां डांघालां केरे घाने सेइं मुल्ख नाश भोइ जेव।

25तैखन फ़िरौने, मूसो त हारून कुजेइतां ज़ोवं, “तुस गाथ ते अपने परमेशरेरे लेई इस्से मुल्खे मां बलिदान देथ।” 26पन मूसे ज़ोवं, “एन केरनू ठीक नईं, किजोकि असेईं ज़ैन बलिदान परमेशर यहोवारे लेई च़ाढ़नू आहे तैन मिस्रेरे लोकां केरे लेई भिट्टू भोल्हु, ते अगर अस मिस्री केरे सामने भिट्टू चीज़रू बलिदान केरम त कुन तैना असन घोड़ेईं न बाहेले? 27अस ट्लेइ दिहैड़ी केरि पैदल बत्तरू सफर केरतां सुनसान ठारी मां गेइतां अपने परमेशर यहोवारे लेई बलिदान देमेले, ज़ेन्च़रे तै असन सेइं ज़ोलो।” 28फ़िरौने ज़ोवं, “अवं तुसन सुनसान ठैरी मां तुश्शे परमेशर यहोवारे लेई बलिदान केरनेरे लेई गाने देइलो, पन जादे दूर न गेइयथ ते मेरे लेई भी बिनती केरथ।” 29तैखन मूसे जुवाब दित्तो, “हेर अवं तीं करां गेइतां यहोवा कां बिनती केरेलो, ते कालां डांघालां केरे घान तेरे ते तेरे अधिकैरी केरे ते तेरे लोकां केरे घरन मरां दूर भोल्हे, पन अग्रोवं जो फ़िरौन धोखे सेइं असन यहोवारे लेई बलिदान देनेरे लेई गाने करां इन्कार न केरे।” 30ते मूसे फ़िरौने करां गेइतां यहोवा कां बिनती की। 31ते यहोवाए मूसेरी बिनतरे मुताबिक डांघालां केरे घान फ़िरौनेरे ते तैसेरे कम केरनेबालां केरे ते तैसेरे लोकां केरे घरन करां दूर किये; इड़ी तगर कि अक भी बाकी न राव। 32पन फ़िरौने एस फेरे भी अपनो दिल सखत कियो; ते तैनी तैना लोक गाने न दित्ते।

Currently Selected:

निर्गमन 8: BHDNT

Highlight

Copy

Compare