निर्गमन 6

1तैखन यहोवा मूसे सेइं ज़ोवं, “हुनी तू हेरेलो कि अवं फ़िरौने सेइं कुन केरेलो; तैखन तै शेक्तिबाले हथ्थेरे ज़िरिये सेइं तैन गाने देलो; ते मेरे शेक्तिबाले हथ्थेरे ज़िरिये सेइं तै तैन अपने मुल्खे मरां कढेलो।”

परमेशर छुटानेरो वाधो केरते

2फिरी परमेशरे मूसे सेइं ज़ोवं, “अवं परमेशर आईं ज़ेसेरू नवं यहोवा आए। 3ते मीं सर्वशक्तिमान परमेशरेरे#6:3 सर्वशक्तिमान परमेशरेरे इब्रानी मां “एलशदाई,” इन परमेशरेरू होरू नवं आए, हेरा. 17:1। नंव्वे सेइं तेरे दादे-पड़दादन अब्राहम ते इसहाक ते याकूबे दर्शन दित्तोरू थियूं, पन अपने यहोवारे नंव्वे सेइं तैन पुड़ बांदो न भोव। 4ते मीं ज़ैस कनान मुल्खे मां तैना परदेशी भोइतां रहते थिये, तैन देनेरो अपनो करार मज़बूत कियो। 5ते मीं इस्राएली लोकां केरि चिन्डां भी शुनी ज़ैना मिस्री लोकेईं एपनी गुलैमी मां रखोरेन, ते मीं अपनो तै करार याद कियोरोए। 6एल्हेरेलेइ तू इस्राएली लोकन सेइं ज़ो, अवं यहोवा आईं; ते अवं तुसन मिस्री लोकां केरे भारन करां छुटेइलो; ते अवं तुसन तैन केरि गुलैमी करां आज़ाद केरेलो, ते अवं अपने हथ्थे सेइं तैन बड़ी भारी सज़ाह देइतां तुसन गुलैमी करां आज़ाद केरेलो। 7ते अवं तुसन अपने लोक बनेइलो, ते अवं तुश्शो परमेशर भोल्हो, ते तुस ज़ानेले कि अव्वें यहोवा तुश्शो परमेशर आईं; ज़ैने तुस मिस्री लोकां केरे भारन हेठोरां केढतां आनोरेथ। 8ते अवं तुसन तैस मुल्खे मां नेइलो ज़ैस मां तुश्शे बुज़ुर्ग अब्राहम, इसहाक ते याकूबे देनेरी कसम मीं खेवरी थी, तै तुश्शी मलकीत भोल्ही। अवं यहोवा आईं।” 9ते मूसे इस्राएली लोकन एना गल्‍लां शुनेई, पन तैनेईं दिलेरे दुखे सेइं ते सखत गुलैमरे वजाई सेइं मूसेरी गल न शुनी।

10फिरी यहोवा मूसे सेइं ज़ोवं, 11तू गा ते मिस्रेरे राज़े फ़िरौने सेइं ज़ो; कि इस्राएली लोकन अपने मुल्खे मरां गाने दे। 12मूसे यहोवा सेइं ज़ोवं, “हेर इस्राएली लोकेईं त मेरी शुनी न, बस अवं ज़ै रुकी-रुकी गल्‍लां केरताईं, फ़िरौन मेरी किजो शुनेलो?” 13तैखन यहोवाए मूसा ते हारूने सेइं ज़ोवं, कि इस्राएली लोकां केरे लेई ते मिस्रेरे राज़े फ़िरौनेरे लेई ई हुक्म दित्तोरोए, कि अस इस्राएली लोकन मिस्र मुल्खे मरां केढतां नेम।

मूसो ते हारूनेरी खानदानी

14तैन केरे घरानेरे प्रधान इना थिये; रूबेन ज़ैन इस्राएलेरू बड्डू मट्ठू थियूं, तैसेरां मट्ठां हनोक ते पल्‍लू ते हेस्रोन ते कर्मी थियां, ऐह रूबेनेरो घरानो थियो। 15शिमोनेरां मट्ठां इना थियां; यमूएल, यामीन, ओहद, याकीन ते सोहर थियां, ते शाऊल ज़ै एक्‍की कनानी कौन्शरो पैदा भोवरो थियो, ऐह शिमोनेरो घरानो थियो। 16ते लेवेरां मट्ठां ज़ैन सेइं तैन केरि खानदानी च़ली, तैन केरां नव्वां इना आन, गेर्शोन ते कहात ते मरारी, ते लेवी 137 सालन तगर ज़ींतो राव। 17गेर्शोनेरां मट्ठां लिब्नी ते शिमी थियां; एन्ने सेइं तैन केरि खानदानी च़ली। 18ते कहातेरां मट्ठां अम्राम, यिसहार, हेब्रोन, उज्जीएल थियां; ते कहातेरी सारी उमर 133 साल भोइ। 19मरारी नंव्वेरे मैन्हेरां मट्ठां महली ते मूशी थियां। लेवी केरे घराने ज़ैन सेइं तैन केरि खानदानी च़ली एना थिये। 20अम्रामे अपने बाजी केरि बेइन योकेबेदे सेइं ड्लाह बनाव; ते तैस कौन्शां हारून ते मूसा ज़र्म दित्तू; ते अम्रामेरी उमर 137 साल भोइ। 21यिसहारेरां मट्ठां कोरह, नेपेग ते जिक्री थियां। 22ते उज्जीएलेरां मट्ठां मीशाएल, एलसाफान ते सित्री थियां। 23ते हारूने नहशोनेरे बेइन अम्मीनादाबेरी कुइये एलीशेबा सेइं ड्लाह बनाव, ते तैसां नादाब, अबीहू, ईतामारे ज़र्म दित्तू। 24ते कोरहेरां मट्ठां अस्सीर, एल्काना, अबीआसाफ थियां; ते एना कोरहेरे घराने मरां निस्से।

25ते हारूनेरे मट्ठे एलीआजरे पूतीएलेरी कुइयन मरां एक्‍की सेइं ड्लाह बनाव, तैसारो पीनहास पैदा भोव; ज़ैन सेइं तैसेरू खानदान च़लू। लेवी केरे सियांनां केरे घरानेरे प्रधान एना थिये, ज़ैन सेइं तैन केरि खानदानी च़ली। 26हारून ते मूसा तैन्ना आन ज़ैन यहोवाए हुक्म दित्तो: “इस्राएली लोकन तैन केरे टोली केरे मुताबिक मिस्र मुल्खे मरां केढतां नेथ।” 27एना तैना मूसो ते हारून आन, ज़ैनेईं मिस्रेरे राज़े फ़िरौने सेइं ज़ोवं; कि अस इस्राएली लोकन मिस्रे मरां केढतां नेमेले।

यहोवा मूसे दुबारां कुजाते

28ज़ैखन यहोवाए मिस्र मुल्खे मां मूसे सेइं इनां गल्‍लां की, 29“अवं त यहोवा आईं; एल्हेरेलेइ ज़ैन किछ अवं ज़ोइलो; तैन हुनी मिस्र मुल्खेरे राज़े फ़िरौने सेइं ज़ोइयां।” 30पन मूसे यहोवा सेइं ज़ोवं, “हेर अवं त रुकी-रुकी गल्‍लां केरताईं; ते फ़िरौन केन्च़रे मेरी शुनेलो?”

Currently Selected:

निर्गमन 6: BHDNT

Highlight

Copy

Compare