निर्गमन 10

अठोवं आफत-टिट्टां केरू एजनू

1फिरी यहोवाए मूसा सेइं ज़ोवं, “फ़िरौने कां गा, किजोकि मीएं तैसेरो ते तैसेरे नौकरां केरो मन एल्हेरेलेइ सखत कियोरोए, कि अवं अपने चमत्कार तैन केरे सामने हेरेईं, 2ते तुस लोक अपने मट्ठन ते पोट्लड़न सेइं एन गल्‍लां केरे बारे मां ज़ोथ, कि मीं यहोवाए मिस्री लोकन सेइं सखत सलूख केरतां केन्च़रे अपने चमत्कार हिराए, ताके तुसन पतो लग्गे कि अवं यहोवा आईं।”

3तैखन मूसे ते हारूने फ़िरौने कां गेइतां ज़ोवं, “इब्रानी लोकां केरो परमेशर यहोवा तीं सेइं एन्च़रे ज़ोते, कि तू कैखन तगर मेरे सामने नर्म बन्ने करां इन्कार केरेलो? मेरे लोकन गाने दे, कि तैना मेरी आराधना केरन। 4अगर तू मेरे लोकन गाने न देस, त शुन कालां अवं तेरे मुल्खे मां टिट्टां छ़डेलो। 5ते तैना धेरती पुड़ एरां भेरोई गालां कि ज़मीन न लेइहोली, ते तुश्शू ज़ैन किछ आणी करां बच़ोरू भोल्हु, तैस तैना चट केरतां छ़डेलां; ते तुश्शे ज़ेत्रे भी फल देनेबाले बुट भोल्हे तैन भी चट केरतां छ़डेलां, ते ज़ैन किछ उडारन मां लग्गेलू तैन भी। 6ते तैना तेरे नौकरां केरे ते तेरे सारे मिस्री लोकां केरे घरन मां भेरोई गालां, एत्रां टिट्टां तेरे बाजेईं ते तैन केरे बाजेईं ज़ेइसेरे देंते धेरती पुड़ ज़र्मोरेन अज़ तगर कधे नईं लाहोरां।” एन ज़ोनेरां पत्ती तै फ़िरौने करां बेइरोवं जेव।

7तैखन फ़िरौनेरे नौकर तैस सेइं ज़ोने लगे, “ऐह मैन्हु केइस तगर इश्शे लेई खतरनाक बनोरो रालो? तैन केरे मड़दन गाने दे, कि तैना अपने परमेशर यहोवारी आराधना केरन; कुन तू हेजू न ज़ानस कि सारो मिस्र मुल्ख तबाह भोवरोए?” 8तैखन मूसो ते हारून फिरी फ़िरौने कां कुजाए, फ़िरौने तैन सेइं ज़ोवं, “च़ले गाथ, अपने परमेशर यहोवारी आराधना केरा, पन ज़ैना गानेबालेन, तैना कौन-कौन आन?” 9मूसे जुवाब दित्तो, “अस त मट्ठन-कुइयन, गोरन-गब्बन सने बच्‍चे ते बुढन तगर सब गाने बालेम, किजोकि असेईं यहोवारे लेई तिहार मनानूएं।” 10फ़िरौने तैन सेइं ज़ोवं, “यहोवा तुसन सेइं साथी राए, अवं त ज़रूर तुसन बच्‍चन सने गाने देलो, हेरा तुश्शे दिले मां बुराईए। 11कधी नईं, एन्च़रे न भोने देइलो, तुस मड़द ज़ेरे गाथ ते यहोवारी आराधना केरा, तुस एन्ने त चाते थिये।” फिरी तैना फ़िरौनेरे सामनेरां कढे।

12तैखन यहोवाए मूसे सेइं ज़ोवं, “मिस्र मुल्खेरे खलाफ अपनो हथ रख कि टिट्टां मिस्र मुल्खे मां एत्रां भेरोन, कि ज़ेत्रू अन्न आणी करां बंच़ेरूए तैन चट केरतां छ़डन।” 13ते मूसे अपनि सोटी मिस्र मुल्खेरे खलाफ रख्खी, तैखन यहोवाए दीसां ते राती सारे मुल्खे पुड़ बात च़लाव ते ज़ैखन झ़ेझ़ भोइ त तैखन तैस बाते मरां टिट्टां आं। 14फिरी टिट्टां सारे मिस्र मुल्खेरे सैरी जगान मां भेरोई जेआं, तैन टिट्टां केरो घान बड़ो जादे थियो, बल्के पेइलां एत्रां टिट्टां कधी न थियां एवरां, ते न कधी फिरी एज्जेलां। 15तैना त सैरी धेरतली पुड़ भेरोई जेआं, इड़ी तगर कि सारे मुल्खे मां आंधरू भोवं, ते तैसेरू सारू अन्न ते बुट्टां केरे फल, ज़ैन किछ आणी करां बच़ेरू थियूं, तैन सब टिट्टेइं चट केरतां छ़डू, इड़ी तगर कि मिस्र मुल्खे मां न त कोन्ची बुट्टे पुड़ नीलार राव, ते न उडारे मां अन्न रावं। 16तैखन फ़िरौन राज़े जल्दी मूसो ते हारून कुजेइतां ज़ोवं, “मीं त तुश्शे परमेशर यहोवारे खलाफ ते तुश्शे भी खलाफ पाप कियोरोए। 17एल्हेरेलेइ इस फेरे मेरो पाप माफ़ केरा, ते अपने परमेशर यहोवा कां बिनती केरा कि तै सिर्फ मीं पुड़ेरां ऐह मौतरी सज़ाह दूर केरे।” 18फिरी मूसे फ़िरौनेरे सामनेरां निस्तां यहोवा कां बिनती की। 19फिरी यहोवाए बड़ी जादे पश्चिमी हवाई सेइं टिट्टां उडैरतां लाल समुन्दरे मां छ़ेडी दित्तां, ते फिरी मिस्रे मां कोन्ची भी ठैरी अक भी टिट्टोवं न रावं। 20पन फिरी भी यहोवाए फ़िरौनेरो दिल सखत कियो, ज़ैस सेइं तैनी फिरी इस्राएली लोक गाने न दित्ते।

नंवोवं आफत-अंधकार

21फिरी यहोवा मूसे सेइं ज़ोवं, “अपनो हथ अम्बरेरे पासे रख कि मिस्र मुल्खे मां आंधरू भोइ गाए, एरू आंधरू भोए कि किछ न लेइहोए।” 22फिरी मूसे अपनो हथ अम्बरेरे पासे खड़ो कियो, ते सारे मिस्र मुल्खे मां ट्लाई दिहाड़े बड़ू जादे आंधरू भोवं। 23ट्लाई दिहाड़न तगर न केन्चे कोई लाव, ते न कोई अपने ठारी पुड़ेरां उठ्ठो, पन सारे इस्राएली लोकां केरे घरन मां ट्लेकड़ार थियो। 24फिरी फ़िरौने मूसे जो समाद देइतां ज़ोवं, “तुस लोक गाथ, ते यहोवारी आराधना केरा, अपने मट्ठन भी साथी नेथ, सिर्फ अपने गोरू-गब्बन इड़ी छ़ेडतां गाथ।” 25मूसो ज़ोने लगो, “तीं असन मेलबलि ते होमबलि देनेरे लेई जानबर भी नेने देने पेन्न, ज़ैन असां अपने परमेशर यहोवारे लेई च़ैढ़ी सखम। 26एल्हेरेलेइ इश्शे जानबर भी असेईं साथी नेनन, तैन मरां अक भी न लोड़े राहोरू, किजोकि तैन्ना केरे ज़िरिये असेईं अपने परमेशर यहोवारे लेई सामान नेनूएं, ते असां ज़ांतगर तैड़ी न पुज़म, तांतगर असन नईं पतो कि कुन-कुन नेइतां असेईं यहोवारी आराधना केरनि भोल्ही।” 27पन यहोवाए फ़िरौनेरो दिल सखत केरि छ़डो, ज़ैस सेइं तैनी फिरी तैना गाने न दित्ते। 28तैखन फ़िरौन तैस सेइं ज़ोने लगो, “मेरे सामनेरां च़लो गा, ते याद रख, मीं अपनु तुत्तर फिरी न हिरेयां, किजोकि ज़ैस दिहाड़े तू अपनु तुत्तर मीं हिरालो तैस्से दिहाड़े तू मारो गानोस।” 29मूसा ज़ोने लगो, “तीं ठीक ज़ोवरूए, अवं तेरू तुत्तर फिरी कधी न हेरेलो।”

Currently Selected:

निर्गमन 10: BHDNT

Highlight

Copy

Compare