1 शमूएल 8

इस्राएलियाँ द्वारा राजा की माँग

1जिब शमूएल बूढ़ा होया, फेर उसनै अपणे बेट्यां ताहीं इस्राएलियाँ पै न्यायी ठहराया। 2उसके जेठ्ठे बेट्टे का नाम योएल, अर दुसरे का नाम अबिय्याह था; ये बेर्शेबा नगर म्ह न्याय करया करै थे। 3पर उसके बेट्टे उसकी राह पै कोनी चाल्‍ले, यानिके लालच म्ह आकै घूस लेन्दे अर न्याय बिगाड़ै थे।

4फेर सारे इस्राएली बूढ़े माणस कठ्ठे होकै रामाह म्ह शमूएल कै धोरै जाकै 5उसतै कहण लाग्गे, “सुण, तू तो इब बूढ़ा होग्या, अर तेरे बेट्टे तेरी राह पै कोनी चाल्दे; इब म्हारा न्याय करण खात्तर सारी जात्तां की रीति के मुताबिक म्हारे खात्तर एक राजा नियुक्त कर दे#8:5 राजा नियुक्त कर दे प्रेरि. 13:21। 6पर जो बात उननै कही, ‘म्हारे पै न्याय करण खात्तर म्हारे उप्पर राजा नियुक्त कर दे,’ या बात शमूएल नै बुरी लाग्गी। अर शमूएल नै यहोवा तै इस बारे म्ह प्रार्थना करी।” 7अर यहोवा नै शमूएल तै कह्या, “वे माणस जो किमे तेरे तै कहवै उसनै मान ले; क्यूँके उननै तेरे ताहीं न्ही पर मेरे ताहीं नकारा सै, ताके मै उनका राजा ना रहूँ। 8जिस तरियां के काम वे उस दिन तै, जिब तै मै उननै मिस्र तै लिकाड़ ल्याया, आज कै दिन ताहीं करदे आए सैं, के मेरे ताहीं त्याग कै पराए, देवत्यां की उपासना करदे आए सैं, उसे तरियां ए वे तेरे तै भी करै सैं। 9इस खात्तर इब तू उनकी बात मान; तोभी तू गम्भीरता तै उननै भली-भाँति समझा दे, अर उननै बता भी दे के जो राजा उनपै राज्य करैगा उसका बरताव किस ढाळ होवैगा।”

10शमूएल नै उन माणसां ताहीं जो उसतै राजा चाहवै थे यहोवा की सारी बात कह सुणाई। 11उसनै कह्या, “जो राजा थारे पै राज्य करैगा उसकी या चाल होवैगी, यानिके वो थारे बेट्यां ताहीं लेकै अपणे रथां अर घोड़यां के काम पै नौक्‍कर राक्खैगा, अर वे उसके रथां के आग्गै-आग्गै दौड्या करैंगे; 12फेर वो उन ताहीं हजार-हजार अर पचास-पचास के उप्पर प्रधान बणावैगा, अर कितन्याँ तै वो अपणे हळ जुतवावैगा, अर अपणे खेत कटवावैगा, अर अपणे खात्तर युद्ध के हथियार अर रथां के साज बणवावैगा। 13फेर वो थारी बेट्टियाँ ताहीं लेकै उनतै सुगन्ध-द्रव्य अर रसोई अर रोट्टियाँ बणवावैगा। 14फेर वो थारे खेत्तां अर दाख अर जैतून की बारियाँ म्ह तै जो आच्छी तै आच्छी होंगी उननै ले-लेकै अपणे कर्मचारियाँ ताहीं देवैगा। 15फेर वो थारे बीज अर दाख की बारियां का दसमां अंश ले-लेकै अपणे हाकिमां अर कर्मचारियाँ ताहीं देवैगा। 16फेर वो थारे दास-दासियाँ ताहीं, अर थारे आच्छे तै आच्छे जवानां ताहीं, अर थारे गध्यां ताहीं भी लेकै अपणे काम म्ह लगावैगा। 17वो थारी भेड़-बकरियाँ का भी दसमां अंश लेवैगा; इस तरियां थम उसके दास बण जाओगे। 18अर उस दिन थम अपणे उस चुणे होए राजा के कारण दुहाई दोगे, पर यहोवा उस बखत थारी न्ही सुणैगा।”

19तोभी उन माणसां नै शमूएल की बात न्ही सुणी; अर कहण लाग्गे, “ना! हम पक्‍का अपणे खात्तर राजा चाहवां सां#8:19 राजा चाहवां सां प्रेरि. 13:21, 20जिसतै हम भी और सारी जात्तां के बराबर हो जावां, अर म्हारा राजा म्हारा न्याय करै, अर म्हारै आगै-आगै चालकै म्हारी और तै युद्ध करै।” 21माणसां की ये सारी बात सुणकै शमूएल नै यहोवा के कान्‍नां ताहीं पोहचाई। 22यहोवा नै शमूएल तै कह्या, “उनकी बात मानकै उनके खात्तर राजा ठहरया दे।” फेर शमूएल नै इस्राएली माणसां तै सहमत होकै कह्या, “थम इब अपणे-अपणे नगर ताहीं चले जाओ।”

Currently Selected:

1 शमूएल 8: BGC

Highlight

Copy

Compare