1 शमूएल 12
12
शाऊल के राज्याभिषेक म्ह शमूएल का उपदेश
1फेर शमूएल नै सारे इस्राएलियाँ तै कह्या, “सुणो, जो किमे थमनै मेरै तै कह्या था उसनै मानकै मन्नै एक राजा थारे उप्पर ठैहराया सै। 2अर इब देक्खो, वो राजा थारै आगै-आगै चालै सै; अर इब मै बूढ़ा सूं, अर मेरे बाल सफेद हो गए सैं, अर मेरे बेट्टे थारै धोरै सैं; अर मै लड़कपण तै लेकै आज ताहीं थारे स्याम्ही काम करदा रह्या सूं। 3मै मौजूद सूं; ज्यांतै थम यहोवा के स्याम्ही, अर उसके अभिषिक्त के स्याम्ही मेरे ताहीं साक्षी द्यो, के मन्नै किसका बळध ले लिया? या किसका गधा ले लिया? या किस ताहीं लूट्या? या किस ताहीं पीस्या? या किसके हाथ तै अपणी आँख बन्द करण के खात्तर घूस लिया? बताओ, अर मै वो थमनै फेर दियुँगा?” 4वे बोल्ले, “तन्नै ना तो म्हारै पै अंधेर करया, ना म्हारे ताहीं पीस्या, अर ना किसे के हाथ तै किमे लिया सै।” 5उसनै उनतै कह्या, “आज कै दिन यहोवा थारा साक्षी, अर उसका अभिषिक्त राजा इस बात का साक्षी सै, के मेरे उरै किमे न्ही लिकड्या।” वे बोल्ले, “हाँ, परमेसवर साक्षी सै।”
6फेर शमूएल माणसां तै कहण लाग्या, “जो मूसा अर हारुन नै ठहराकै तेरे पूर्वजां ताहीं मिस्र देश म्ह तै लिकाड़ ल्याया वो यहोवा ए सै 7इस कारण इब थम खड़े रहो, अर मै यहोवा के स्याम्ही उसके सारे धार्मिकता के काम्मां के बारै म्ह, जिननै उसनै थारे अर थारे पूर्वजां के साथ करया सै, थारै गैल विचार करुँगा। 8याकूब मिस्र म्ह गया, अर तेरे पूर्वजां नै यहोवा की दुहाई दी; फेर यहोवा नै मूसा अर हारुन ताहीं भेज्या, अर उननै तेरे पूर्वजां ताहीं मिस्र तै लिकाड्या, अर इस जगहां म्ह बसाया। 9फेर जिब वे अपणे परमेसवर यहोवा नै भूलगे, फेर उसनै उन ताहीं हासोर नगर के सेनापति सीसरा, अर पलिश्तियाँ अर मोआब के राजा के अधीन कर दिया; अर वे उनतै लड़े अर जीत गए। 10फेर तेरे बुजुर्गां नै यहोवा की दुहाई देकै कह्या, ‘हमनै यहोवा ताहीं त्याग कै अर बाल देवत्यां अर अश्तोरेत देवियाँ की उपासना करकै महापाप करया सै; परन्तु इब तू हमनै म्हारे दुश्मनां के हाथ तै छुड़ा तो हम तेरी उपासना करांगे।’ 11ज्यांतै यहोवा नै यरूब्बाल#12:11 यरूब्बाल न्यायियों 6:25-32, बदान#12:11 बदान बाराक एक इस्राएली नायक अर न्यायी था, जो हासोर के कनानी शहर के राजा याबीन के बिरुध्द दबोरा के गैल लड़या था (न्यायियों 4), यिप्तह#12:11 यिप्तह न्याय. 10:6-12:7; 11:29, अर शमूएल ताहीं भेजकै थारे ताहीं थारे च्यांरु और के दुश्मनां के हाथ तै छुड़ाया; अर थम निडर रहण लाग्गे। 12अर जिब थमनै देख्या के अम्मोनियाँ का राजा नाहाश म्हारै पै चढ़ाई करै सै, फेर जै थारा परमेसवर यहोवा थारा राजा था तोभी थमनै मेरै तै कह्या, ‘ना, म्हारे पै एक राजा राज्य करैगा।’ 13इब उस राजा नै देक्खो जिस ताहीं थमनै चुण लिया, अर जिसकै खात्तर थमनै प्रार्थना करी थी; देक्खो, यहोवा नै एक राजा थारे उप्पर नियुक्त कर दिया सै। 14जै थम यहोवा का भय मान्दे, उसकी उपासना करदे, अर उसकी बात सुणदे रहो, अर यहोवा के हुकम नै टाळकै उसतै बलवा ना करो, अर थम अर वो जो थारे पै राजा होया सै दोन्नु अपणे परमेसवर यहोवा के पाच्छै-पाच्छै चालण आळे बणे रहो, तब तो भला होवैगा; 15पर जै थम यहोवा की बात ना मान्नो, अर यहोवा के हुकम नै टाळकै उसतै बलवा करो, तो यहोवा का हाथ जिसा थारे पुरखां के बिरुध्द होया उसाए थारे भी बिरुध्द उठैगा। 16इस कारण इब थम खड़े रहो, अर इस बड़े काम नै देक्खो जिस ताहीं यहोवा थारी आँखां कै स्याम्ही करण पै सै। 17आज के गेहूँ की कटणी न्ही होण लागरी? मै यहोवा ताहीं पुकारूँगा, अर वो बाद्दळ गरजावैगा अर मिह बरसावैगा; फेर थम जाण ल्योगे, अर देख भी ल्योगे, के थमनै राजा माँगकै यहोवा की नजर म्ह भोत बड़ी बुराई करी सै।” 18फेर शमूएल नै यहोवा ताहीं पुकारया, अर यहोवा नै उसे दिन बाद्दळ गरजाया अर मिह बरसाया; अर सारे माणस यहोवा तै अर शमूएल तै घणा डरगे।
19अर सारे माणसां नै शमूएल तै कह्या, “अपणे दास्सां के निमित्त अपणे परमेसवर यहोवा तै प्रार्थना कर, के हम मर ना जावां; क्यूँके हमनै अपणे सारे पापां तै बढ़कै या बुराई करी सै के राजा मांग्या सै।” 20शमूएल नै माणसां तै कह्या, “ना डरो; थमनै या सारी बुराई तो करी सै, पर इब यहोवा के पाच्छै चाल्लण तै फेर मत मुड़ियो; पर अपणे सम्पूर्ण मन तै उसकी उपासना करियो; 21अर मत मुड़णा; ना तो इसी व्यर्थ चिज्जां के पाच्छै चाल्लण लागोगे जिनतै ना कुछ लाभ पोहचैगा, अर ना किमे छुटकारा हो सकै सै, क्यूँके वे सारी बेकार ए सैं। 22यहोवा तो अपणे बड़े नाम के कारण अपणी प्रजा ताहीं न्ही छोड़ैगा, क्यूँके यहोवा नै थारे ताहीं अपणी ए इच्छा तै अपणी प्रजा बणाया सै। 23फेर यो मेरे तै दूर हो के मै तेरै खात्तर प्रार्थना करणा छोड़कै यहोवा के बिरुध्द पापी ठहरूँ; मै तो थमनै आच्छा अर सीध्धा रास्ता दिखान्दा रहूँगा। 24केवल इतणा हो के थम यहोवा का भय मान्नो, अर सच्चाई तै अपणे सम्पूर्ण मन की गैल उसकी उपासना करो; क्यूँके यो तो सोचो के उसनै थारे खात्तर किसे बड़े-बड़े काम करे सैं। 25पर जै थम पाप करदे ए रहोगे, तो थम अर थारा राजा दोन्नु के दोन्नु मिट जाओगे।”
Currently Selected:
1 शमूएल 12: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
