Isiyaasi 5
5
Woyinee Goyoochon Shoddeeti Shoddo
1Ta shunachochon,
bi woyinee goyoochonoo shoddebona;
ta shunechoyich woyinee goyo,
qeemi geppee toommooch beehe.
2Showoon gochiye;
xaqqoonoo macii kichiye;
gaaweti woyinee qomboon arooch bechiye;
bi gutte daggooch dilaaloon shuunehe;
woyinee aafo hiichemmi oppoon iijjiye;
aroochee gaawe aafoon aafemmone ii quyehe;
tunebaani kiikkeroon aafehe.
3Illa and Yerusaalem beetinaꞌote, Yihudee asheenaꞌote, taannaa ta woyinee goyoonochi mooyon nallibote. 4Ta woyinee goyoyich ta tuniyaani, ta tuniiya bede mooyo amoone? Gaawe woyinee aafoon aafemmone iyaꞌa ta quyaa beetaa, amoyich kiikkeroon aafehe?
5Ta woyinee goyee toommooch ta tuniyemmi mooyon ittoshich getona; uxeroon waaxxemmo taane; xaqqee uxeroonoo happemmo taane; kubbi cooxo aalliyemmonaa kuppemmonoyich tuniyemmo taane. 6Shokkoon echiyemmo taane; qepheyaachemmone; showoo ucheyaachemmone; guccinonaa angixona collemmone; amiyo dihaachemmoyich qubeenaꞌoyich gettemmo taane.
7Beshe Mawe Doono Yeerichi woyinee goyo,
Israꞌeelee asheenaꞌone;
Yihudee asheenaꞌo,
bi emiriibeeti becheenaꞌone.
Dayinnetoon boonoshi waanee qaawiye;
tunebaani damee ukkoo tunehe.
Cadiqee shuunoon qaawiye;
tunebaani xuꞌee naboona cookoo tunehe.
Asheenaꞌo Shuuneebeeti Gonde Mooyo
8Bareenaꞌoyich beeyi xaaꞌoo aallemmi wottoon, ittoshi baach showee toommooch kotemmi wottoon, kechi toommooch kexon, showee toommoochoo showoon daakkii beetinaꞌote, ittoshich woowo! 9Beshe Mawe Doono Yeeri, ta waamo waayee beetaa ishichiꞌi wogetone: “Iberoochaa meeti kexinaꞌo onoo tunemminaꞌone; macecikkiti ogooge kexinaꞌo ashaalleenaꞌo tunemminaꞌone. 10Aashire aangee woyinee goyoochee hiyaa gutte neetiree woyinee uyo baach danemmone; ikke xaanee yaroon shoohaa keejje qunnee maayo baach maceyemmone” itone.
11Mashiibeeti uyoon uyoyich haree yaaꞌooch tiyii beetinaꞌoyich woowo! Boonoshi kashooch bi qeeccimmi wottoon, uchiibee harii beetinaꞌoyich woowo! 12Boonoshi gifiree xaaꞌooch ooge ximboonaa giishi ximboona, kamboonaa shumburoona, woyinee uyoo beetone; tunebaani Doono Yeeri tuniiton, bi shuuneti shuunoonoo gabaaneenaꞌone. 13Ebich ta asheenaꞌo ariyoon boonoshi muccetoyich kecaa hammemminaꞌone; boonoshi ukkireenaꞌo shaacoona qitemminaꞌone; asheenaꞌochi heciyoo shachewoona shuuqqemmone. 14Ebich maasho bi maacoon gamichii, haawutteꞌi boonoshin quyee beetone; Yerusaalemi ogoogeenaꞌonaa sharaareenaꞌonon aroochaa dullii cangechee beetinaꞌona tookki qooxxemmone.
15Asho cooneyemmone; asheenaꞌo giishemminaꞌone; geecechochi qillifoo niremmone. 16Tunebaani Beshe Mawe Doono Yeeri, dayinnetoona nalloona bi oogoon bekkiyemmone; Yaafe Nuggishoo cadiqoona nalloona bi yaafittinoon bekkiyemmone. 17Ebi arooba, bagee bushiisheenaꞌo kexo happeeti xaaꞌoochaa mocoon maayemminaꞌone; bagee baaddeenaꞌonaa emmishee bushiisheenaꞌona ebi aroochaa mocoon maayemminaꞌone.
18Axaaxoon dachee woderoona, xuꞌoonoo gaari woderoona geechii beetinaꞌoyich woowo! 19“No beeggemmoyich Doono Yeeri tuniiya bi gabiton kaate tuniibe; no ariyemmoyich Israꞌeelee Yaafoo yameti yamo kaate wobe” ii beetinaꞌoyich woowo!
20Gondoon gaaweto, gaaweton gondo ii beetinaꞌoyich, manderoon bekko, bekkoonoo manderoo tunii beetinaꞌoyich, caamoon nooco, noocoonoo caamo tunii beetinaꞌoyich woowo!
21Boonoshi qelloona boonoshin ariyechonaa yiitoonon tuniiꞌi ciinnii beetinaꞌoyich woowo!
22Woyinee uyoon uyoyich beelleenaꞌo, mashiibeeti uyoon baccoyichoo kuppho tunetinaꞌoyich woowo! 23Xuccoyicha iꞌi xuꞌecho nalleyemmoyich, xuꞌaalloo xoobbemmoyich tunii beetinaꞌoyich woowo! 24Beshe Mawe Doono Yeerichi sheeroon boonoshi hoxetoyich, Israꞌeelee yaafoo gettitonoo boonoshi qallayitoyich, guudoon qaaqqoo mamoommon, galloon qaaqqee aaxxo michii aalliyoommon, boonoshi xeppho oqqemmone; boonoshi bungoo shuuꞌiree quttoochoommon kaama quttemmone. 25Doono Yeeri kaaro bi asheenaꞌo toommooch cufiye; bi mochoon tiijjiꞌi boonoshin yexxiye; guudinaꞌo qeweheete; asheenaꞌochi dubenoo guudoochoommon gommooch dihitone; ebi bulli tunetaanoona Doono Yeeri kaaro besheyaanoone; andoo bi mochoon tiijjiꞌiniye bi beeto.
26Doono Yeeri wohooch beeti aageteenaꞌon bi ceeggemmi malletoon neechemmone; showee tuggoochee shennoona ceeggemmone; boonoshiyoo daappibee afaafinoona woyemminaꞌone; 27boonoshi daggooch hakka guutoonaa sheqqoona aalloone; geepphillii beetonaa tokketee beetona aalloone; boonoshi eddo biisheyaachemmone; boonoshi caammee cuyoo kuxeyaachemmone. 28Boonoshi shango acone; boonoshi maꞌoo qannitone; boonoshi haresheenaꞌochi baatoo shaammoommone; boonoshi gaarichi gengoo yongee yuboommone. 29Boonoshi qaaro daaheroochoommone; more daaheroochoommon ciddiyeete; boonoshi yechiton guruuxiibee daammiyeete; boonoshi kishoochee dihiyemmo aalloone.
30Arooba baharee buugoommon ebi aree toommooch buugemminaꞌone; koniyoona showooch bi ciinigaata, manderoonaa xuuxoonon beeggemmone; qubee naboona bekko manderemmone.
Currently Selected:
Isiyaasi 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.