Isiyaasi 13
13
Baabloonin Doono Yeeri Naxemmo Tuno
1Amootsi bushoo Isiyaasi Doono Yeer waanee beeggiꞌi Baabloonichon bi gettiti wocho ebine: 2Shokkaachoo tuneti geppee toommoochaa malletoon tiijjibote; qaaroon oogichiree cookibote; ogoogeenaꞌochi kelloonoo boonoshi giyemmoyich, kishoona malletebote. 3Ta kaaroon boonoshi ceechemmoyich, taacho tuneti yaafeetinaꞌon wocheto taane; wudoon ta dano boonoshin emirikkiibeeti ta ginee naayinaꞌon ceeggeto taane.
4Guudinaꞌo toommooch dofee aageteenaꞌo qaaro waayee beeton ellebote; taatee showeenaꞌoochee kiceeti, caageebeeti asheenaꞌochi qaaroon waayebote. Beshe Mawe Doono Yeeri ginechinaꞌon ginee koyooch qannii beetone. 5Boonoshiyoo showee tuggooch beddaahaa beeti, wohi showoochee waa beetinaꞌone; Doono Yeeri boonoshin, bi kaaroon bi bekkiyemmi ginee qiiceenaꞌo tuniiꞌi, showoo bullin aalliyoyich waa beetone.
6Doono Yeerichi aabo katinnitoyich, eefebote; Beshe Hakkechi Yeer waanee aallo woyemmone.#Yoꞌeel. 1:15 7Ebich mochoo bulli niremmone; asho bullichi mullo muujjemmone. 8Keqqemminaꞌone; maaxoo manjeti ureechoommon shoodde qaakkemminaꞌone; boonoshinaa boonoshina keqqoona ciineyemminaꞌone; yeelloona boonoshi baroo qaaqqoon shaahemmone. 9Showoon shokko echiyoyich, axaaxechinaꞌon bi daggoochee aalliyoyich, maacmanjoon tuneꞌi, naxoona, kupphe kaaroona ceenniꞌi ebiyoche Doono Yeerichi aabo waa beetone. 10Shimaajji xojjeneenaꞌonaa guuphi xojjeneenaꞌona aaxxeyaachemminaꞌone; batt kechaabeeti aabe manderemmine; ageneyoo aaxxe bekkeyaachemmine.#Hiz. 32:7; Maat. 24:29; Maar. 13:24-25
11Doono Yeeri ishichiye: “Alemoon bi gondoyich, gondeenaꞌonoo boonoshi axaaxoyich, naxemmo taane; geecechinaꞌochi geecoon kindiyemmo taane; maacmanjeenaꞌochi geecoonoo giishiyemmo taane. 12Ashoon aalliiree, gaawe aachoyee, Ofiiree aachoyenoo beshe aaxxoon tuniyemmo taane. 13Ebich Beshe Mawe Doono Yeeri ta kaaro aaxxehooba shimaayeenaꞌon qewiyemmo taane; showeenoo bi xaaꞌoochee shuurikkemmo taane.
14“Asho yookkiibeeti xiixxechoommon, qiddaalli bagoochoommon, asho bulli bi ashi asho waan wottemmone; asho bulliyoo bi showi showa wocemmone; 15danemmo bulli koyaa qitemmone; yechemmo bulliyoo goraadoona dihemmone. 16Boonoshi ciini beetaa, boonoshi nallefeenaꞌo ceqqetaa qitemminaꞌone; boonoshi kexinaꞌo bosheyemminaꞌone; boonoshi mecheenaꞌoo qeyeyemminaꞌone.
17“Ebiyoche, birewoon aaxxiyaani, aachoonoo emiraani Meedeenaꞌo boonoshi toommooch tiyemmoyich tuniyemmo taane. 18Boonoshi maꞌeenaꞌo gurimaasheenaꞌon wuxemminaꞌone; nallefeenaꞌonoo maaraachemminaꞌone; bushiishoyichoo ariqqaalli aafechinaꞌone. 19Taatittineenaꞌochi ooge, Kalideenaꞌochi geecee tuneti Baabloonin, Doono Yeeri ta, Sodoominaa Gomoorinochoommon guuppemmo taane.#Hal. 19:24-25 20Shiijjeroochee shiijjerooch beddaahaa arooch kotemmo ciroona beetaachemmone; Araboo bi duukkaanoon arooch xogaachemmone; qiddeenaꞌo arooch boonoshi bageenaꞌon quyeyaachemminaꞌone. 21Barahee cooxinaꞌo arooch miqqemminaꞌone; yuyeenaꞌo boonoshi kexooch ceennemminaꞌone; shaakkeenaꞌo arooch beeyemminaꞌone; barahee emmisheenaꞌo aroochaa capphemminaꞌone. 22Boonoshi dilaaleenaꞌoochaa qaccemmoo qaaddemmone; gaawe boonoshi goddemeenaꞌoochaa boqqello uukkemmone; bi aallee aabo shaggitone; bi yemeeno ciiretone” iye.#Isi. 34:14-15; Sofo. 2:14; Yaaꞌo. 18:2
Currently Selected:
Isiyaasi 13: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.