Hiziqeeli 46
46
1Nuggishoo Doono Yeeri ishichiye: “Maaci addibaabooch giijjiibeeti, aabi-keyo waan wotteti kello, shuunee aabo tuneti shiritte qemo bulliich hicheree beebe; tunebaani shambetoobinaa agenee keyi baaroobina qecheebe. 2Iraashoo maach waan beeti beshe boochoona giyiree kellee qoomee gaꞌooch neexebe; qeesheenaꞌoo micciibeeti bi giddiiti deejjoonaa ikkittinee deejjoonon deejjibeete. Iraashoo kelloochaa goyinnebe; ebiyee gubboo keye; tunebaani kello xumemmi wottoon hichaaye. 3Showee asheenaꞌoo Doono Yeeri aafoochaa, are kelloochaa, shambetoobinaa agenee keyi baaroobina goyinnebeete. 4Iraashoo Doono Yeerich giddiyemmi micciibeeti deejjoo bachaalli shiritte gishiishi bagee baaddoonaa bachaalli ikke ooge bagee baaddoona tunebe. 5Ooge bagee baaddoona tookki ikke efaahee maayi buuroon giddiibe; wotta gishiishi bagee baaddeenaꞌona tookki bi qaawitoommi maayi buuroon giddiibe; efaahee ikke maayi buuro bi ikkikkooch keejje neetiree zayitoon gede. 6Agenee keyi baarooba, ikke gubbenoon, shiritte gishiishi bagee baaddoonaa ikke ooge bagee baaddoonon giddiibe; eboshi bulliyoo bachaalleenaꞌo tunebeete. 7Gubbenoona tookki ikke efaahee maayi buuroon, ooge bagee baaddoona tookki ikke efaahee maayi buuroon; gishiishi bagee baaddeenaꞌona tookki iraashoo bi qaawitoommi maayi buuroon giddiibe; ikke efaahee maayi buurooch keejje neetiree zayitoon gede. 8Iraashoo bi giyii beegaata beshe boochoona gibe; bi kechii beegaatoo aroona keye.
9“Tunebaani showee asheenaꞌo baarooba Doono Yeeri aafooch boonoshi waahooba, goyinneya dambi-waani kelloona giyimmo, deshi-waani kelloona keye; deshi-waani kelloona giyimmo, dambi-waani kelloona keye; bi ciinooch beeti kelloona keyalli bi giyiti kelloona gubb wotteree kechaaye. 10Boonoshi giyii beegaata, iraashoo boonoshina tookki gibe; boonoshi kechii beegaatoo, keye.
11“Ogooge baaroobinaa gishiishi baaroobina, ikke efaahee maayi buddinoon gubbenoona tookki, ikke efaahee maayi buddinoon ooge bagee baaddoona tookki, bi qaawitoommi maayi buddinoon gishiishi bagee bushiishoona tookki giddiibe; ikke efaahee maayi buurooch keejje neetiree zayito gibe. 12Iraashoo bi daaggoona bi giddiibeeti deejjoon, micciibeeti deejjoon woyee bi daaggoona Doono Yeerich bi giddiibeeti ikkittinee deejjoon bi giddii beegaata, aabi-keyo waan wotteti kello biich qecheebe; shambetooba bi tunii beetoommon, micciibeeti deejjoonaa ikkittinee deejjoonon giddiibe; aroochee maach keye; bi kechitoyee gubb, kello hichebe.
13“Qemi qemona micciibeeti deejjoyich, bachaalli ikke nati bagee baaddoo, Doono Yeerich maaddi maaddoona giddebe. 14Ebina tookki maayi buuro, efaahee shirittoochee ikke beeree gaawe buddino xiriꞌoyich tunemmi ikke neetiree zayitoo maaddi maaddoona giddebe; ebi maayi buuro Doono Yeerich bulli aabooch qoceeton tunebe. 15Bulli aabooch micciibeeti deejjoyich, giishi bagee baaddoo, maayi buuroonaa zayitoona maaddi maaddoona giddebe” iye.
Iraashoochi Showee Mooyo
16Nuggishoo Doono Yeeri ishichiye: “Iraashoo, bi bushiisheenaꞌoochee ikkoyich showoon wojjoo tuniiꞌi bi imigaata, ebi showoo bi bushoonaa ebi bushoochi shiijjeroonoyich iristoon tunemmone. 17Tunebaani bi iristoochee bi guuninaꞌoochee ikkoyich bi imigaata, yoobeelee nati wottoon biicho tunebe; aroyee gubb bi doonoyich wochibe; iristo iraashoochi bushiishoyich icheti wojjoo baachiye manjemmo. 18Iraashoo asheenaꞌon boonoshi iristoochee waaxiichi ashi showoon deqqaaye; bi anaami bushiisheenaꞌoyich bi immemmo bi hajjee showoochee baachiye; ebiyoo ta ashoochee koniyoona bi iristoochee bi waacheyaachemmoyichiye” iye.
Deejjoo Qannemmi Xaaꞌoo
19Aroochee are uro taan kellee gaꞌooch beeti, dambi-waan wotteti, qeesheenaꞌocho tuneti yaafeeti kexinaꞌooch deebiye; ebi kexinaꞌoochaa aabi-gimo waan, duꞌooch beeti ikke xaaꞌoon beeggeho. 20Biyoo taach ishichiye: “Hini xaaꞌoo qeesheenaꞌo xuꞌee deejjoonaa axaaxee deejjoonoyich giddeti meenoochee boonoshi kiijjemmi, maayi buuroocheenoo boonoshi kachiyemmi xaaꞌoone; ebina asheenaꞌo naxeyaachemmoyich#46:20 Hibiree Yaafe macaafo “Yaafeyaachemmoyich” iye. ebi yaafeeti maayoochee amolla maachi addibaabooch keyaachemmone” iye.
21Aroochee maachi addibaabooch taan deebiye; are addibaabeechi awudde shuutoona taan guudiihe; are addibaabee awudde shuutoo bulliich bare addibaaboo beetone. 22Addibaabeechi awudde shuutooch beeti gishiishi addibaabeenaꞌo bulliyona tateenaꞌone; bi ikkikkoochi gidoo aabbe hiroo, bi maaco shaashe hiroone. 23Ebi awudde addibaabeenaꞌochi guudoona xaqqee uxeroo beetone; ebi xaqqee uxereenaꞌochi baatooch maayo kachiibeeti xaaꞌeenaꞌo beetinaꞌone. 24Uroo taach ishichiye: “Eboshi, yaafee kexooch maddee beetinaꞌo aroochaa asheenaꞌochi deejjoon boonoshi kiijjiibeeti xaaꞌeenaꞌone” iye.
Currently Selected:
Hiziqeeli 46: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
