Hiziqeeli 42
42
Yaafee Kechi Gaꞌooch Shuuneeti Gutte Kexinaꞌo
1Aroochee uro damba beeti addibaabooch taan daammiye; maachi addibaaboona, dambi-waani yaafee kechi addibaabee ciinoonaa dambi-waan beeti kechi ciinoonooch beeti kexinaꞌooch taan deebiye. 2Dambi-waan beeti kechi gidoo balle hiroone; bi maaco aache hiroone. 3Maachi addibaabee godee ciinooch, maaci addibaaboochaa hiye hiroon wokkiꞌi beeti keejje kuxona shuuneeti kechi toommeexi kexinaꞌoyich, ciiniitaa shuuneeti gaaddaafeenaꞌo beetinaꞌone. 4Kexinaꞌochi aafooch, bi maaco aashire hiroo bi gidoo balle hiroo tuneti beshe kaattoo beetone; shaaqqeenaꞌoo beeto dambi-waaniye. 5Toomma beeti kexinaꞌo daggi kexinaꞌonaa showeexi kexinaꞌonoyee beshe xebbeenaꞌone; ebiyoo gaaddaafeenaꞌo gaminnitoyichiye. 6Maachi addibaabeexi kexinaꞌo giimbechinaꞌone; tunebaani hinoshi giimbaalleenaꞌone; ebiyoo keejje kuxona kechi toommooch kexo tuniitaa boonoshi hakketoyichiye; ebich tookk beeti kexinaꞌo daggeexinaꞌonaa dech beetinaꞌonoyee beshe xebbeenaꞌone. 7Kexinaꞌonaa maachi addibaaboonochi ciinooch xaqqee uxeroo beetone; ebi uxeroo bi beeto kexinaꞌochi aafoochiye; bi gidoo aache hiroone. 8Maachi addibaaboo waan beeti kexinaꞌochi gidoo aache hiroone; tunebaani yaafee kechi ciinooch beeti kexinaꞌochi gidoo balle hiroone. 9Ebi kexinaꞌoyee dech aabi-keyo waanaa maachi addibaaboochee beshe kaattoo beetone.
10Deshi-waanaa maachi addibaabee xaqqee uxeree gaꞌooch, shokkaache xaaꞌoonaa kexonochi ciinooch, bare kexinaꞌo beetinaꞌone. 11Ebi kexinaꞌochi aafooch beshe kaattoo beetone; dambi-waan beeti kexinaꞌochoommon, boonoshi gidoo, maaco, kecheebeeti kello, shaaqqoonaa bulli mooyona hajjaa shaahoone. 12Ebi deshi-waani kexinaꞌochi dechiich, aabi-keyo waan, xaqqee uxeree gaꞌooch, beshe kaattooch, kello beetone.
13Uro aroochee taach ishichiye: “Shokkaache xaaꞌee ciinooch dambi-waaninaa deshi-waaninooch beeti kexinaꞌo, Doono Yeer waan giddeebeeti qeesheenaꞌo oogichii yaafeeti deejjee maayoon boonoshi maabeeti kexinaꞌone. Are xaaꞌoo yaafeeto bi tunetoyich, oogichii yaafeeti mooyinaꞌon, eboshiyoo maayi buuroon, axaaxee deejjoonaa xuꞌee deejjoonon arooch kotiyemminaꞌone. 14Qeesheenaꞌo yaafee kexooch giyii boonoshi maddetoyee gubb, boonoshi maddee tahoon shaddiꞌi arooch kotiyaanoon maachi addibaabooch keyaachemminaꞌone; ebiyoo taho yaafeeto bi tunetoyichiye; bare tahoon taheree asheenaꞌo beetooch hammemminaꞌone” iye.
Yaafee Kexo Shuuneeti Xaaꞌoo Qeelleyoo
15Uro yaafee kechi maaci xaaꞌoon hiree bi ciichitoyee gubb, aabi-keyo waani kelloona maach taan kichiye; aroochee yaafee kechi guudoon hirehe. 16Qeellee yaaboona aabi-keyo waanin bi hiretaa uuche balle hiroo tunehe. 17Dambi-waanin bi hiretaa uuche balle hiroo tunehe. 18Deshi-waanin bi hiretaa uuche balle hiroo tunehe. 19Aabi-gimo waanin bi hiretaa uuche balle hiroo tunehe. 20Awudde guudoon hirehe; yaafeetonaa yaafeyaanoonon bariibeeti daabbo yaafee kechi guudoona beetone; ebi duukki gidoo uuche balle hiroo, bi maacoo uuche balle hiroone.
Currently Selected:
Hiziqeeli 42: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
