Roma 16

En siri' i Paulus a sé poo-poowna an esa paémanen

1An suratku anio' aicuaku andumoro' si poowta wéwéné an esa paémanen makangaran Febe wosama' sia katuusan iow. Sia mengaselewir sé jamaat ang Kengkrea. 2An tutuw sia maangé ai camu sungkuleno mangé sia ang karapi in arui en até ampa'paan sia tou maéman a si Casuruan, tanu siituo em patus émaan é tou le'nas. Wo pangilekenku ai camu, patawangen angé sia sapake' em paperlunna. Ampa'paan kelio sé aiwééna en tumawang sé tou keli wo ka'i a yaku.

3 # Kis. 18:2 Icuao mangé en siri'ku a si Priskila wo a si penanaanna Akwila. Séra in dua kara-karapiku matawoi torona i Kristus Yesus. 4Séra in dua misi oka maté an tutuw séra tumawang yaku. Yaku ka'i kumua i makapulu'sama' ai séra in dua, taniitu ka'i pakasa sé jamaat ra'ica tou Yahudi méé ka'i mai i makapulu'sama' ai séra. 5Icuao ka'i mangé en siri'ku a sé jamaat sé mengali'usai maapo' am balé i Priskila wo si Akwila.

Icuao ka'i mangé en siri'ku a si Epenetus, si poow an esa paémanen si icaupusku, siao si tou kataré-taré maéman a si Kristus an Asia.

6Icuao ka'i mangé en siri'ku a si Maria, sia itu uli-ulit tumawoio mai repet torona miow.

7Icuao ka'i mangé en siri'ku a si Andronikus wo si Yunias sé poo-poowku tou Yahudi kaputéku. Séra in dua maémano a si Yesus Kristus an tutuw aku ra'ipé' maéman. Séra in dua uli-ulit katuusan an uner é ruru'du'an i Apo' Yesus wo sumangkumo a yuntep am bui mewali-wali wo yaku.

8Icuao ka'i mangé en siri'ku a si Ampliatus si icaupusku ang kerapi ngaran i Apo' Yesus.

9Icuao ka'i mangé en siri'ku a si Urbanus si carapita matawoi mewali-wali torona i Kristus. Wo icuao ka'i mangé en siri'ku a si Stakhis si icaupusku.

10Icuao ka'i mangé en siri'ku a si Apeles. Sia uli-ulit le'tek a si Kristus mandé ka'i meta'up ing keli pangepé'an. Wo icuao ka'i mangé en siri'ku a sé tou am balé i Aristobulus.

11Icuao ka'i mangé en siri'ku a si Herodion kaputéku tou Yahudi. Icuao ka'i mangé en siri'ku a sé tou maéman a si Casuruan sé am balé i Narkisus.

12Icuao ka'i mangé en siri'ku a si Trifena wo si Trifosa si tumawoio mai repet torona i Apo' Yesus. Wo siri'ku ka'i a si Persis si icaupusku. Sia ka'i uli-ulit tumawoio mai repet torona i Apo' Yesus.

13 # Mrk. 15:21 Icuao ka'i mangé en siri'ku a si Rufus. Sia tou si sinisir ampa'paan im paémanenna a si Apo' Yesus. Wo icuao ka'i mangé en siri'ku a si inangna si nianggapkuo inangku in esa.

14Wo icuao ka'i mangé en siri'ku a si Asinkritus, Flegon, Hermes, Patrobas, Hermas wo a sé pakasa sé poo-poow esa paémanen sé mewali-wali wo iséra.

15Icuao ka'i mangé en siri'ku a si Filologus, Yulia, Nereus wo si poowna wéwéné, wo a si Olimpas wo a sé tou le'nas sé mewali-wali wo iséra.

16Mensin-siri'ano mangé kamu ang karapi wuta ing kaupusan a si esa wo si esa.#16:16 “Mensin-siri'an angé ang karapi wuta ing kaupusan”: An teks aseli aipatic in tana'i, “méé in siri' ang karapi in cumiom”, si pengatuulen ‘ciom le'nas’. En itu kanaramen é tou Krésten kataré-taré an tutuw éra mengawéé in siri' a sé tou. Pakasa sé jamaat i Kristus am bia'i ka'i méé in siri' ai camu.

Em popokéi i Paulus

17Poo-poowku, sina'uenku kamu, mareti-retio mangé a sé tou sé masalé' mengaéma' ing kapetanéan, wo sé masalé' mengasélé'kow im paémanen é tou a si Amang Kasuruan. Séra mengasusui in sususuien sé membalinaan wo in sususuien wutul sé kinéréano miow. Anaé, tumayango mangé ai séra. 18Ampa'paan sé tou tanu siitu ra'ica matawoi sumelewir si Kristus Apo'ta, taan séra matawoi asalo makiit ing kasalé'an éra in esa. Séra maroma' mapaké i roroma' matawér wo nunuwu' sé manam palingan, akar séra imuwako sé tou sama' en até. 19Pakasa en tou ilumingao in abar sapaoka kamu le'tek a si Amang Kasuruan, anaé aku uli-ulit arui ampa'paan icamu. Mandé in taniitu, pangilekenku wosama' kamu keli eng kailekan torona mengaéma' sé loor wo ra'ica makailek maéma' sé léwo'. 20Wo si Amang Kasuruan, si palemboian ing kaeluran, makala'us tumeri si kikiiten é sétang an darem ing kécéi miow sa. Wo pekiupusenku en upus aitambér i Yesus Kristus Apo'ta mewali-wali oka wo icamu.

En siri' é kara-karapi i Paulus

21 # Kis. 16:1 Si Timotius katawoiku am bia'i méé ka'i mai in siri' ai camu. Taniitu ka'i sé kakéléku tou Yahudi si Lukius, Yason wo si Sosipater méé ka'i mai in siri' ai camu.

22Si matic in surat i Paulus anio' yakuo si Tertius, yaku ka'i méé in siri' ai camu ang kerapi ingaran i Casuruan.

23 # Kis. 19:29; 1Kor. 1:14; 2Tim. 4:20 Si Gayus ka'i méé mai in siri' ai camu. Yaku si Paulus winéanna kaloasan mento' am baléna, taniitu ka'i sé jamaat ami mengali'us maapo' am baléna. Si Erastus si tinokéan mengaurus in doit ing kota, wo si Kwartus poowta esa paémanen méé ka'i in siri' ai camu.

[24En upus aitambér i Yesus Kristus, Apo'ta, mewali-wali wo icamu im baya. Ulit.]

E rarayo i Paulus a si Amang Kasuruan

25Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior. 26Taan intarépé', ampa'paano im perénta i Amang Kasuruan si menonou akar ing kauré-uré, si paene-enep-Na itu aituru'o wo aicuao a sé im pakasa in suku maké ing kitap-kitap sé aipatico é nabi, wosama' séra maéman wo le'tek a si Amang Kasuruan. 27Siao si Amang Kasuruan si wuta ing kapinteran. Rayoo mangé wo siriino mangé Sia akar ing kauré-uré ampa'paano i Yesus Kristus. Ulit.

Currently Selected:

Roma 16: TNT

Highlight

Copy

Compare