ESTHERE 1
1
Seboka sa Assueruse. — Kgano le teleko ya mofumahadi Vashti.
1Mehleng ya Assueruse, — ke Assueruse eo ya neng a busa dinaha tse lekgolo le nang le mashome a mabedi a metso e supileng, ho tloha India ho ya fihla Ethiopia, — 2ke re, mehleng eo, eitse ha morena Assueruse a dutse teroneng ya mmuso wa hae, Susane, e leng motse wa moreneng, 3selemong sa boraro sa puso ya hae, a etsa seboka, a se etsetsa mahosana wohle a hae, le bafo ba hae, le makgotla a Persia le a Media, le marenana, le babusisi ba dinaha tsa hae, ba phuthehileng pela hae. 4A ba bontsha matlotlo le kganya ya mmuso wa hae, le botle le bokgabana ba boholo ba hae, ka ditshiu tse ngata, e leng ka ditshiu tse lekgolo le nang le mashome a robileng meno e le mmedi.
5Tshiu tseo ha di fetile, morena a etsetsa setjhaba sohle se Susane, motse wa moreneng, ho qala ka ba baholo ho isa ho ba banyenyane, seboka sa tshiu tse supileng, kahare ho motero wa dirapa tsa ntlo ya morena. 6Teng, ho ne ho na le masela a lene e tshweu, le a sei, le a purepera, a neng a fanyehilwe ka dikgole tsa lene le tsa sekarelata masaleng a silefera le ditshiyeng tsa maramore e tshweu; hape, ho ne ho na le malao a kgauta le silefera mokatong wa porfira, le wa maramore e tshweu, le wa dikgetla, le wa majwe a matsho. 7Ha nwelwa mehopeng ya kgauta, mehopeng e mefutafuta, veine ya morena e le ngata kamoo morena a ratileng ho fana kateng. 8Taelo ya eba teng ya hore motho a se ke a qobellwa; hobane morena o ne a laetse matona wohle a ntlo ya hae jwalo, hore ho etsetswe e mong le e mong ka thato ya hae.
9Haele mofumahadi Vashti, yena a etsetsa basadi seboka tlung ya borena, e leng ya morena Assueruse.
10Ka tsatsi la bosupa, eitse ha pelo ya morena e thabile ke veine, a laela Mehumane, le Bistha, le Karbona, le Bigtha, le Abagtha, le Sethare, le Karkase, e leng matona a supileng a emang pela morena Assueruse ho mo sebeletsa, 11hore a tlise pela morena mofumahadi Vashti a rwetse moqhaka wa bofumahadi hloohong ya hae, hore a tle a bontshe ditjhaba le mahosana botle ba hae; hobane e ne e le motho ya sefahleho se setle. 12Empa mofumahadi Vashti a hana ho tla ka molomo wa morena o isitsweng ho yena ke matona. Morena a halefa haholo ke hona, mme bohale ba hae ba tuka kahare ho yena.
13Yaba morena o bua le babohlale ba tsebang dinako, — hobane taba efe le efe ya morena e ne e buwa jwalo pela bohle ba tsebang ditaelo le ditokelo; 14mme ba neng ba le haufi le yena e ne e le Karshena, Shethare, Admatha, Tarsise, Merese, Marsena le Memukane, e leng mahosana a supileng a Persia le Media, a neng a bona sefahleho sa morena, hape e le a dutseng ditulong tse phahameng mmusong. A re ho bona: 15Ka melao e leng teng, e ka kgona mofumahadi Vashti a etswe jwang, haele mona a sa ka a etsa ka taelo ya morena Assueruse e isitsweng ho yena ke matona? 16Yaba Memukane o araba pela morena le mahosana, a re: Mofumahadi Vashti ha a sitelwa morena a nnotshi, o sitetswe le mahosana wohle le ditjhaba tsohle tse naheng tsohle tsa morena Assueruse. 17Hobane ketso eo ya mofumahadi e tla tuma hara basadi bohle, mme banna ba bona ba tla nyediseha mahlong a bona, ba be ba re: Morena Assueruse o ne a laetse hore ho tliswe mofumahadi Vashti pela hae, empa o hanne ho tla. 18Ha ho le jwalo, ho tloha tsatsing lena, mafumahadi a Persia le Media a utlwileng ketso ya mofumahadi, a tla bua taba e le nngwe ho mahosana a morena, mme nyediso le kgalefo e ngata di tla ba teng. 19Jwale, ha morena a dumela, taelo ya mmuso e ke e etswe ho yena, mme e ngolwe bukeng ya melao ya Persia le Media, e be e se nang ho fetoha, ya ho re, Vashti a se ke a hlola a etla pela morena Assueruse, mme morena a ke a nee bofumahadi ba hae ho e mong ya mo fetang ka molemo. 20Taelo e etswang ke morena e tla utluwa mmusong wohle wa hae, leha o le moholo, mme basadi bohle ba tla hlonepha banna ba bona, ho qala ka e moholo ho isa ho e monyenyane.
21Mantswe ao a kgahlisa morena le mahosana, mme Morena a etsa ka mantswe a Memukane; 22a romela mangolo dinaheng tsohle tsa morena, naha e nngwe le e nngwe ka mongolo wa yona, le setjhaba se seng le se seng ka puo ya sona, ha thwe, monna ka mong e be hlooho tlung ya hae, mme a tumise hona ka puo ya setjhaba sa habo.
Currently Selected:
ESTHERE 1: SSO61-SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1961. Used with permission. All rights reserved.