Lua tohi a Paulo ki te kau KOLINITO 3
3
Gaue a te Lao mo te gaue a te Laumalie
1Pe e ma toe kamata palalau o uhiga mo maua totonu? Pe e aoga kia maua, o hage ko ihi, ni tohi fakamooni kia koutou, pee maia koutou? 2Ko tama tohi ko koutou, ae kua tohi i oma mafu, ae kua iloi pea kua lau e te tagata fuli. 3Kua fakaha mooni koutou ko he tohi koutou a Kilisito, ae kua tohi e tama gaue, o mole aki he vai tohi, kae aki te Laumalie o te Atua mauli, o mole i ni laupapa maka, kae i ni laupapa kakano, i okotou mafu.
4E ma fakaha te mea aia uhi ko te falala ae e ma mau ki te Atua ia Kilisito. 5Koteuhi ke aua naa ui e ma fealagia ia maua totonu tama fakatupu o he mea e hage e hau maia maua totonu; kae e hau mai te Atua toma faa fai. 6Ko ia foki ae nee ina teuteui maua ke ma liliu ko ni tagata gaue o he hai foou, o mole o te matai tohi, kae o te Laumalie; koteuhi e matei e te matai tohi, kae e haofaki e te Laumalie.
7Pea kapau nee fakaha te kololia o te Atua e te gaue o te mate, ae nee tohi ki ni matai tohi i ni maka, o mole feala ke sio te u fanau o Iselaele ki te u mata o Moisese, uhi ko te gigila o tona fofoga, logo ko he kololia fakatemi ia: 8Pea e feafeai age anai te lahi o te kololia o te gaue a te Laumalie! 9Koteuhi kapau nee kololia te gaue a te tautea, pea e toe lahi age te kololia o te gaue a te faitotonu. 10E feala foki ke tou ui ko te kololia nee gigila i te temi mua e noa ia mo ka fakatatau ia ki te kololia o te temi nei, ae e lahi aupito age. 11Koteuhi kapau nee kololia te mea nee fakatemi, pea e toe lahi age te kololia o te mea e tuumau.
12Koia i tama mau he falala feia, e ma fonu anai i te lototoa, 13pea e mole ma hage ko Moisese, ae nee ina uufi ona mata ki he pulou, ke aua naa sio te u mata o te u foha o Iselaele ki te puli o te gigila nee fakatemi. 14Kae nee mole feala ke mahino onatou atamai. Koteuhi o kaku mai ki te aho nei, kei puloui onatou atamai moka natou lau te Tauhi Afea, pea e mole toe puli te kie aia, koteuhi hoki puli ia ia Kilisito. 15Kae o kaku mai ki te aho nei, moka lau ia Moisese, e li he kie ki onatou loto; 16kae ka tafoki te u loto ki te Aliki, e too te pulou aia. 17Pea ko te Aliki ko te Laumalie; pea i te kogamea e i ai te Laumalie o te Aliki, e i ai foki te ateaina. 18Pea ko tatou fuli, ae kua too kehe te pulou mai otatou fofoga, e tou ata te kololia o te Aliki, pea kua tou liliu ko he paaki e tahi mo ia, mai te kololia ki te kololia, aki te Laumalie o te Aliki.
Currently Selected:
Lua tohi a Paulo ki te kau KOLINITO 3: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
