Lua tohi a Paulo ki te kau KOLINITO 1
1
Fakaalofa
1Ko Paulo, apositolo a Sesu-Kilisito i te finegalo o te Atua, mo te tehina ko Timoteo, ki te Ekelesia o te Atua i Kolinito, mo te kau sagato fuli i te Akaia katoa: 2Ke tuku atu kia koutou te kalasia mo te tokalelei e te Atua tatatou Tamai pea mo te Aliki ko Sesu-Kilisito!
Fakafetai a Paulo
3Ke tapuaki ki te Atua, te Tamai o totatou Aliki ko Sesu-Kilisito, te Tamai o te manavaofa fuli pea mo te Atua o te fakafimalie fuli, 4ia ia e ina fakafimaliei maua i oma mamahi fuli, ke ma mafai te fakafimaliei o natou e nofo i te u mamahi, aki te fakafimalie nee ma tali mai te Atua! 5Koteuhi, o hage pe ko te lahi o te u mamahi o Kilisito ia maua, e toe lahi foki toma fakafimalie ia Kilisito. 6Kapau e fakamamahii maua, e uhiga mo tokoutou fakafimalie mo tokoutou haofaki; pea kapau e fakafimaliei maua, e uhiga mo tokoutou fakafimalie, ae e hoko i takoutou katakii te u mamahi tatau mo ae e ma tali. 7Pea e malohi tama falala o uhiga mo koutou, koteuhi e ma iloi, kapau e kotou kau ki te u mamahi, pea e kotou toe kau foki ki te fakafimalie.
8Koteuhi e mole ma loto, u tehina, ke tuku koutou i te fakapouli o uhiga mo te mamahi fakamataku nee hoko mai kia maua i Asia, he nee ma taomia lahi osi, o fakalaka foki i oma malohi, koia nee ma lotovaivai aupito o uhiga foki mo oma mauli. 9Pea nee ma sio ko he mea pau toma tautea ki te mate, koteuhi ke aua tama falala kia maua totonu, kae ki te Atua ae e ina toe fakatuuake te kau mate. 10Ko ia ae nee ina haofaki maua mai he toe mate fakamataku feia, pea e ma falala kia ia e ina toe haofaki anai maua; 11pea e kotou tokoni mai foki kia maua aki akotou faikole, koteuhi ke liliu te kalasia e ma mau anai aki te hufaki a te kaugamalie ko he tupuaga o te fakafetai a he kaugamalie o uhiga mo maua.
Te loto mooni o Paulo
12Koteuhi ko te mea ae e ma fiafia ai, ko te fakamooni aeni o oma loto, nee ma mauli i te malamanei, kae tafito kia koutou, i te maonioni pea mo te maa ia mua o te Atua, o mole i he poto fakatagata, kae i te kalasia o te Atua. 13Koteuhi e mole ma tohi atu kia koutou he tahi age mea i te mea ae e kotou lau pea mo koutou mahino ki ai. Pea e au falala foki e koutou kaku anai o mahino lelei ki te mea aeni i te fakaosi. 14I te aho aeni kua kotou kamata iloi ko tokotou kololia ko maua, kae e kotou liliu anai ko toma kololia i te aho o te Aliki Sesu.
Te fai e Paulo tana gaue
15I te falala pau aena, nee au loto ke au alu atu kia koutou i mua, ke kotou mau ni kalasia e lua; 16nee au loto ke au fakalaka atu ia koutou o alu ki Masetonia, pea ke au toe liliu leva mai Masetonia kia koutou, pea e kotou tokoni mai anai ki taku fagona ki Sutea. 17I taku fai te tonu aena, pe nee au fai he mea fakavale? Pe ko aku fakatuutuu ko te u fakatuutuu fakatagata, o hage e mau ia au te io mo te kailoa? 18E au fakamooni atu i te Atua, ae e agatonu, ko te folafola nee ma fakaha atu kia koutou nee mole ko te io mo te kailoa. 19Koteuhi ko te Alo o te Atua, Sesu-Kilisito, ae nee matou akonaki kia koutou, e au, mo Silivano, pea mo Timoteo, nee mole ko te io mo te kailoa, kae nee io pe ia; 20koteuhi ko te u fakapapau fuli a te Atua e io ia te ia; pea koia foki ae e tou puaki ai te Ameni ia te ia ki te kololia o te Atua. 21Pea ko te Atua totonu ae e ina fakamalohii maua o fakatahi mo koutou ia Kilisito; pea ko te Atua totonu ae nee ina vahei kehe tatou, 22ae nee ina fakailoga tatou ki tona huafa, pea nee ina huai mai ki otatou loto te Laumalie Maonioni ko he fakamooni o te u koloa e ina taofi mai kia tatou.
Mamahi mo te u fiafia o Paulo
23E au too te Atua ko te fakamooni, ke ina matehi au mo ka e au loi, uhi pe ke kotou hao, koia nee au tonu ai e mole au toe liliu atu ki Kolinito. 24E mole uhi ke ma pulei takotou tui, koteuhi kua koutou tuu malohi i te tui; kae e ma kumi ke ma kaugaue fakatahi mo koutou o uhiga mo tokotou fiafia.
Currently Selected:
Lua tohi a Paulo ki te kau KOLINITO 1: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
