Uluaki tohi a Paulo ki te kau TESALONIKA 4
4
Fakamalohi ki te mauli maa
1Koia, u tehina, koteuhi kua kotou ako maia matou te mauli e tonu ke kotou mau o uhi ke kotou matalelei ai ki te Atua, pea e koutou fai te mea aia, e matou kole atu kia koutou, pea e matou kole mamahi atu ia kia koutou i te huafa o te Aliki ko Sesu, ke koutou haele i te mea aia o lakalaka ki mua. 2Koteuhi e kotou iloi foki te u fakatotonu ae nee matou tuku atu kia koutou mai te Aliki Sesu. 3He ko te finegalo o te Atua ke kotou maonioni, pea ke kotou fakamamao mai te feauaki: 4Koia ke tahi iloi e te tagata o koutou te tauhi o tona sino i te maonioni mo te fakaapaapa, 5kae tuku takotou fai te u holi fakavale o te sino, o hage ko te fai a te kau pagani ae e mole natou iloi te Atua; 6ke aua naa fakatolotolo e he tahi te ohoana o tona tehina, koteuhi e tautea e te Aliki te u tagata fena, o hage ko tamatou fakaha fakatomua mo fakamooni ia kia koutou. 7He nee mole paui tatou e te Atua ki te mauli fakalialia, kae ki te maonioni. 8Koia, ko ae e ina siaki te u fakatotonu aeni, e mole ina siaki he tagata kae ko te Atua, ae nee ina foaki atu foki kia koutou tona Laumalie Maonioni.
9O uhiga mo te ofa fakatautehina, e mole aoga kia koutou ke toe faitohi atu ki ai, koteuhi kua kotou ako e koutou totonu mai te Atua te feofaofani fakatautehina, 10pea e koutou fai foki te mea aia ki te u tehina fuli i Masetonia katoa. Kae e matou kole atu kia koutou, u tehina, ke koutou tuputupua tuumau i te ofa aia, 11pea ke kotou tokaga lahi ke koutou mauli i te tokalelei, ke kotou tahi tokaga ki ana mea totonu, pea ke kotou gaue aki okotou nima, o hage ko tamatou fakatotonu atu kia koutou, 12pea ke kotou mauli agatonu kia natou mai tafa, pea ke aua naa kotou liliu ko he kavega ki he tahi.
Too o te Ekelesia mo te toe liliu mai a te Aliki
13E mole matou loto, u tehina, ke koutou nofo i te fakapouli o uhiga mo natou ae kua mamate, ke aua naa kotou mamahi o hage ko natou ake ae e mole natou mau he falala. 14Koteuhi, kapau e tou tui nee mate Sesu pea nee toe tuuake ia, pea e tou tui foki e aumai anai e te Atua o fakatahi mo Sesu natou nee mamate ia ia. 15He koeni te mea e matou fakaha atu kia koutou i te folafola a te Aliki: Ko tatou te hahai mauli, nee toe ki te hau a te Aliki, e mole tou muamua anai ia natou nee mamate. 16Koteuhi ko te Aliki totonu, i he fakailoga kua finegalo ki ai, aki te leo o he alekaselo, pea mo te tagi o te fakatagi pupuhi a te Atua, e haele ifo anai mai te lagi, pea e uluaki tuuake anai te kau mate ia Kilisito. 17Pea osi ko tatou te hahai mauli nee toe anai, e too anai tatou fuli o fakatahi mo natou i te u ao, ki te fakafetaulaki mo te Aliki i te aele, pea e tou nonofo anai mo te Aliki o heegata. 18Koia ke koutou fetokoniaki aki te u folafola aia.
Currently Selected:
Uluaki tohi a Paulo ki te kau TESALONIKA 4: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
