Uluaki tohi a Paulo ki te kau TESALONIKA 3
3
1Koia i tamatou mole kei katakii, nee matou tonu tahi leva ke ma nofo tefua i Atena, 2kae nee ma fekaui atu leva kia koutou ia Timoteo, tomatou tehina, tagata gaue a te Atua ki te Evaselio a Kilisito, ke alu atu o fakamalohii koutou mo fakafimaliei koutou i takotou tui, 3ke aua naa gaegae he tahi i te u mamahi o te temi nei; koteuhi e koutou iloi nee fakatuutuu tatou ki te mea aia. 4Pea i te temi nee matou nonofo ai mo koutou, nee matou fakaha fakatomua atu kia koutou e tonu ke tou tali ni mamahi, o hage ko te mea kua hoko pea kua kotou iloi. 5Koia, i taku mole kei fealagia ke au katakii, nee au fekau leva he tahi ke ina fakaha mai kia au te aluaga o takotou tui, koteuhi nee au mataku naa fakahalai koutou e te fili kae alu noa tamatou gaue.
6Pea koeni, kua tau mai ia Timoteo maia koutou, o fakamatala mai kia matou ni logo lelei o takotou tui pea mo tokotou ofa, pea nee ina ui mai kia matou e kotou taupau tuumau he manatu lelei o uhiga mo matou, pea e koutou fia sio kia matou o hage ko tamatou fia sio foki kia koutou. 7Koia, u tehina, i omatou fitaa mo omatou mamahi, nee matou fimalie leva o uhiga mo takotou tui. 8Koia kua matou mauli ai i te temi nei, koteuhi kua kotou tuu malohi i te Aliki. 9Koia nee matou fakafetai lahi ki te Atua o uhiga mo koutou, uhi ko te fiafia e matou mau ia koutou ia mua o totatou Atua! 10I te po mo te aho, e matou kole kia ia i he lotomalohi lahi ke ina fakagafua ke matou sio kia koutou, pea ke matou fakakatoa te mea e kei puli ki takotou tui.
11Io, ko te Atua totonu tatatou Tamai pea mo totatou Aliki ko Sesu, ke ina fakatokatoka tomatou ala ke matou olo atu ai kia koutou! 12Pea ke ina fakatuputupua mo ina fakafonu te ofa ae e kotou mau i okotou vahaa, pea ki te u tagata fuli, o faifaitaki ki te ofa ae e matou mau kia koutou; 13ke ina fakamalohii okotou loto ke kotou hee mele mo maonioni ia mua o te Atua ko totatou Tamai, i te aho o te toe liliu mai o totatou Aliki ko Sesu mo ana sagato fuli.
Currently Selected:
Uluaki tohi a Paulo ki te kau TESALONIKA 3: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
