Lua tosi ki le kau Kolinto 10
10
fakaapositolo :
1) Na tuku a ia e le Atua
1Ko au Paulo, e kau kole atu kia koutou, i le agamalu mo le agamalie o Kilisito, a au leia e mata gaegae i okoutou mua mo ka kau nofo mo koutou, ti e apele i le loto toa kia koutou mo ka kau nofo mamao. 2E kau kole atu kia koutou, mo ka kau nofo loa mo koutou, ke aua na kotou fakamakeke loa au ke kau fakaaoga le loto toa lena, leia e kau taofi ki ni iki ala e tio mai kia maua o sakinake e ma saele o mulimuli ki le kanofi.
3Kapau e ma saele i le kanofi, kae e leaise ma tau i le kanofi. 4Talie ko masafu ala e ma tau ai e leaise fakatagata ; kae e lotou makeke lasi i le Atua, ke soloi ai ki lalo ni kolo tau. 5E ma soloi ki lalo a fakakaukau mo nea taualuga fuli ala e malaga ake ki le iloa o le Atua, ti e ma fakapilisoni a manatu fuli o aumai latou ki le fakalogo kia Kilisito. 6E ma teuteu foki ke ma tautea a patigataa fuli, mo ka e katoa loa lakoutou fakalogo.
7E kotou tio ki le nea leia e sa i tafa ! Kapau e pati se tasi e kau a ia kia Kilisito, ke pati a ia iate ia totonu, kapau e kau maoki a ia kia Kilisito, ko maua foki e ma kau kia Kilisito. 8Ti kapau foki na kau fakakololia a au totonu o lasi fakaikiiki i le pule leia kua tuku mai kiate au e le Aliki ki lokoutou faufau, kae leai ki lokoutou maumaui, e leaise kau luma ai. 9Ti e leaise kau loto ke sakinake e kau fakaii koutou i aku tosi. 10Talie e pati : e mamafa mo makeke ana tosi ; kae ka nofo totonu a ia, e gaegae fua a ia, ti e veli lana masau.
11Ke iloa e leia e masau fenaaki, e ma fenaaki i masau i ama tosi mo ka ma nonofo mamao, e ma toe fenaaki foki i ama gaoi mo ka ma nonofo totonu mo koutou.
12E leaise mafai ke ma fia fakatatau ki ni iki o latou ala e fia matamua, talie e lotou fakatuu alotou fua totonu ke fuafua ai latou, ti i lalatou fakatatau latou kia latou totonu, e lotou sala atamai ai. 13Kia maua, e leaise ma loto ke ma fakakololia i se nea leia e tuu i tafa o koiga o le faisaga leia na tuku mai e le Atua kia maua, o ave ai maua o kaku kia koutou. 14E leaise ma mavae i oma koiga, o sakinake na leaise ma au o kaku mai kia koutou ; talie ko koutou ala na ma kaku atu ki ai mo le Evaselio o Kilisito. 15E leaise ma fakakololia i ni gaoi a ni iki ake ala e tuu i tafa oma koiga. Kae e ma maua le amanaki malie, mo kapau e tupu loa o lasi lakoutou tui, ke ma liliu o toe lasi ake ia koutou, i loma faisaga totonu, 16ti ke ma fakamafola le Evaselio ki fenua ala e mamao atu ia koutou, kae leaise ma fakakololia ki le nea leia kua fai i le faisaga a ni iki ake. 17Ko leia e fakakololia ke fakakololia a ia i le Aliki. 18Talie e leaise ko leia e vikiviki kiate ia totonu e fakamaoki ki ai, kae ko leia e fakamaoki ki ai le Aliki.
Currently Selected:
Lua tosi ki le kau Kolinto 10: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
