ʻO KA ʻEPISETOLE MUA A PAULO KA LUNAʻŌLELO I KO KORINETO 8
8
MOKUNA VIII.
1 No ka ʻai ʻana i nā mea i kaumaha ʻia na nā kiʻi.
1¶ Ma nā mea i kaumaha ʻia na nā kiʻi, ua ʻike nō kākou, ua naʻauao nō kākou a pau. He mea hoʻokiʻekiʻe ka naʻauao; ʻo ke aloha naʻe ka mea e nui ai ka ikaika.
2Inā i manaʻo kekahi, ua akamai ia, ʻaʻole ia e akamai iki e like me ke akamai e pono ai ʻo ia;
3akā, inā i aloha aku kekahi i ke Akua, ua ʻikea mai ʻo ia e ia.
4Ma ka ʻai ʻana i nā mea i kaumaha ʻia na nā kiʻi, ua ʻike nō kākou, he mea ʻole ke kiʻi, ma ka honua nei, ʻaʻole hoʻi he Akua ʻē aʻe, hoʻokahi wale nō.
5He mea nō naʻe i kapa ʻia, he akua, ma ka lani paha, ma ka honua paha; no ka mea, ua nui nā akua, a ua nui nā haku;
6akā, iā kākou, hoʻokahi nō Akua, ʻo ka Makua, a nāna mai nā mea a pau, a iā ia hoʻi kākou nei; hoʻokahi nō Haku, ʻo Iesū Kristo, ma ona lā nā mea a pau, a ma ona lā hoʻi kākou.
7¶ Akā, ʻaʻole i nā kānaka a pau kēia ʻike; no ka mea, i kēia wā nō, me ka manaʻo i nā kiʻi, ʻai nō kekahi poʻe me he mea lā i mōhai ʻia na ke kiʻi; a no ka nāwaliwali o ko lākou naʻau, ua haumia.
8ʻAʻole hoʻi kākou e ʻāpono ʻia e ke Akua no ka ʻai; no ka mea, inā e ʻai kākou, ʻaʻole e ʻoi ko kākou maikaʻi i laila; a i ʻai ʻole kākou, ʻaʻole e ʻoi ko kākou ʻino i laila.
9E mālama hoʻi ʻoukou, o lilo auaneʻi kēia pono o ʻoukou, i mea e hihia ai, no ka poʻe hāwāwā.
10Inā i ʻike mai kekahi iā ʻoe, i ka mea naʻauao, e noho ana e ʻai i loko o ka heiau o ke kiʻi, ʻaʻole anei e ʻeuʻeu ka manaʻo o ke kanaka hāwāwā, e ʻai i nā mea i mōhai ʻia na nā kiʻi?
11A laila, no kou naʻauao ʻana, e make nō ka hoahānau hāwāwā, nona i make ai ʻo Kristo.
12A i kā ʻoukou hana hewa ʻana pēlā i nā hoahānau, a i ko ʻoukou hōʻeha ʻana i ko lākou naʻau nāwaliwali, ua hana hewa ʻoukou iā Kristo.
13No ia mea, inā ʻo ka ʻiʻo ka mea e hewa ai koʻu hoahānau, ma kēia hope aku, ʻaʻole loa au e ʻai hou i ka ʻiʻo, o hoʻolilo au i koʻu hoahānau i ka hewa.
Currently Selected:
ʻO KA ʻEPISETOLE MUA A PAULO KA LUNAʻŌLELO I KO KORINETO 8: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
