ʻO KA ʻEPISETOLE MUA A PAULO KA LUNAʻŌLELO I KO KORINETO 7
7
MOKUNA VII.
1 No ke ʻano o ka mare ʻana.
1¶ Ma nā mea a ʻoukou i palapala mai ai iaʻu; he mea maikaʻi no ke kāne, ʻaʻole e hoʻopili aku i ka wahine.
2Akā, o moekolohe auaneʻi, ua pono nō i kēlā kāne i kēia kāne kāna wahine iho, a ua pono nō i kēlā wahine i kēia wahine, kāna kāne iho.
3E pono nō e ʻae lokomaikaʻi aku ke kāne i ka wahine, a pēlā nō ka wahine i ke kāne.
4No ka mea, ʻaʻole na ka wahine kona kino iho, na ke kāne nō; ʻaʻole hoʻi na ke kāne kona kino iho, na ka wahine nō.
5Mai hoʻonele wale ʻoukou i kekahi i kekahi, aia wale nō ma ka like o ka manaʻo, a i mea hoʻi e lilo loa ai i ka hoʻokē ʻai a me ka pule; a e hui hou nō, i hoʻowalewale ʻole mai ai ʻo Sātana iā ʻoukou, no ko ʻoukou hiki ʻole i ka hoʻomanawanui.
6Ke ʻōlelo aku nei au i kēia no ka manaʻo nō, ʻaʻole no ke kauoha aku.
7Ke makemake nei au, i like nā kānaka a pau me aʻu nei. Akā, ua loaʻa i kēlā kanaka, i kēia kanaka kona makana ponoʻī, na ke Akua mai, ʻokoʻa nō hoʻi ke ʻano o kekahi, ʻokoʻa ke ʻano o kekahi.
8¶ Ke ʻōlelo aku nei au i ka poʻe i mare ʻole ʻia, a me nā wāhine kāne make, he mea pono no lākou ke hoʻomau e like me aʻu nei.
9Akā, i hiki ʻole iā lākou ke hoʻomanawanui, e mare nō lākou; no ka mea, ua maikaʻi ka mare, ʻaʻole ke kuko.
10Ke kauoha aku nei au i ka poʻe i mare ʻia, ʻaʻole naʻu, na ka Haku nō, mai haʻalele ka wahine i kāna kāne;
11a inā ua haʻalele, e noho mare ʻole ʻia ʻo ia, a e maliu hou aku paha i ke kāne; ʻaʻole hoʻi e kipaku ke kāne i ka wahine.
12Ke ʻōlelo aku nei au i ka poʻe i koe, ʻaʻole na ka Haku mai; inā he wahine hoʻomaloka kā kekahi hoahānau kāne, a manaʻo ka wahine e noho pū me ia, mai kipaku ke kāne iā ia.
13A ʻo ka wahine hoʻi, ke hoʻomaloka kāna kāne, a manaʻo nō ke kāne e noho pū me ia, mai kipaku ka wahine iā ia.
14No ka mea, ua huikala ʻia ke kāne hoʻomaloka i ka wahine, a me ka wahine hoʻomaloka hoʻi, ua huikala ʻia ʻo ia i ke kāne. Inā ʻaʻole pēlā, inā ua haumia nā keiki a ʻoukou; akā, ʻānō lā, ua huikala ʻia.
15A inā na ka hoʻomaloka ka haʻalele, e haʻalele nō. ʻAʻole i paʻa ka hoahānau kāne a me ka hoahānau wahine i kēia mau mea. Akā, ua aʻo mai ke Akua iā kākou ma ke kuʻikahi.
16Pehea ʻoe i ʻike ai, e ka wahine, e ola paha kāu kāne iā ʻoe? Pehea hoʻi ʻoe i ʻike ai, e ke kāne, e ola paha kāu wahine iā ʻoe?
17¶ E like hoʻi me kā ka Haku hāʻawi ʻana mai i kēlā kanaka i kēia kanaka, e like nō me kā ke Akua hea ʻana mai i kēlā kanaka i kēia kanaka, pēlā nō ia e hele ai; a pēlā nō au e kauoha aku nei ma nā ʻekalesia a pau.
18Inā i hea ʻia aku kekahi i ʻoki poepoe ʻia; mai hūnā ʻo ia i kona ʻoki poepoe ʻana; inā i hea ʻia aku kekahi i ʻoki poepoe ʻole ʻia; mai ʻoki poepoe ʻia ʻo ia.
19He mea ʻole ke ʻoki poepoe ʻia, he mea ʻole ke ʻoki poepoe ʻole ʻia; akā, ʻo ka mālama ʻana i nā kānāwai o ke Akua.
20E noho nō kēlā kanaka kēia kanaka ma ka mea āna i hana ai i ka wā i hea ʻia mai ai ʻo ia.
21Inā i hea ʻia mai ʻoe, e hoʻokauā ana, mai manaʻo ʻoe ia mea; akā, inā e hiki ke kuʻu wale ʻia mai ʻoe, e hele nō.
22No ka mea, ʻo ke kauā i hea ʻia mai e ka Haku, ʻo ia kā ka Haku i kuʻu ai. Pēlā hoʻi ʻo ka mea paʻa ʻole i hea ʻia mai, ʻo ia hoʻi ke kauā a Kristo.
23Ua kūʻai ʻia ʻoukou me ke kumu, mai lilo ʻoukou i poʻe hahai i kānaka.
24E nā hoahānau, e noho nō kēlā kanaka kēia kanaka me ke Akua, ma ka mea āna i hea ʻia mai ai.
25¶ No ka poʻe puʻupaʻa, ʻaʻole na ka Haku mai kaʻu kauoha. Ke haʻi aku nei nō hoʻi au i koʻu manaʻo, e like me ka mea i mālama pono, no ka loaʻa ʻana mai o ka lokomaikaʻi o ka Haku.
26Ke manaʻo nei au, he mea maikaʻi kēia, no ka pōpilikia o kēia wā, he mea maikaʻi no ke kāne ke noho wale pēlā.
27A i paʻa ʻoe i ka wahine, ʻeā, mai ʻimi ʻoe i ka mea e wehe ai. A i kaʻawale ʻoe i ka wahine, mai ʻimi ʻoe i wahine nāu.
28Akā, inā i mare ʻoe, ʻaʻole ʻoe i hewa; a inā i mare ka wahine puʻupaʻa, ʻaʻole ia i hewa; akā hoʻi, e loaʻa auaneʻi i ua poʻe lā ka pilikia ma ke kino; akā, ke kuʻu aku nei au iā ʻoukou.
29Ke ʻōlelo aku nei nō hoʻi au i kēia, e nā hoahānau, ma kēia hope aku ka wā pilikia; no laila, ʻo ka mea wahine, e lilo ia i mea like me ka mea wahine ʻole;
30a ʻo ka mea uē, e like me ka mea uē ʻole; a ʻo ka poʻe ʻoliʻoli, e like me ka poʻe ʻoliʻoli ʻole; a ʻo ka poʻe kūʻai, e like me ka poʻe nele;
31a ʻo ka poʻe mālama i nā mea o kēia ao, e like me ka poʻe mālama ʻole. No ka mea, e nalo aʻe ana ke ʻano o kēia ao.
32ʻO koʻu makemake kēia, i ʻole ʻoukou e pilikia ma ka manaʻo. ʻO ka mea i mare ʻole ʻia, ua manaʻo nō ia i ko ka Haku, i ka mea e leʻaleʻa mai ai ka Haku.
33A ʻo ka mea i mare ʻia, manaʻo nō ia i nā mea o kēia ao, i mea e leʻaleʻa mai ai ka wahine.
34Ua ʻokoʻa nō ka wahine i mare ʻia, ʻokoʻa ka wahine puʻupaʻa. ʻO ka wahine i mare ʻole ʻia, ua manaʻo nō ia i nā mea o ka Haku, i laʻa ia ma ke kino, a me ka naʻau; a ʻo ka mea i mare ʻia, manaʻo nō ia i nā mea o kēia ao, i mea e leʻaleʻa ai ke kāne.
35Ke ʻōlelo aku nei au i kēia i mea e pono ai ʻoukou; ʻaʻole e hoʻohihia ai ʻoukou, no ka pono naʻe, i mālama ʻoukou i ka Haku, me ka ikaika a me ka hihia ʻole.
36¶ Akā, inā e manaʻo kekahi, ua pono ʻole kāna hana ʻana i kāna kaikamahine puʻupaʻa, inā i hala kona wā i oʻo ai, a inā pono pēlā, e hana nō ia i kona makemake, ʻaʻole ia i hewa; e mare lākou.
37Akā, ʻo ka mea kūpaʻa ma ka naʻau, ʻaʻole hoʻi i pilikia, a ua lanakila hoʻi ma luna o kona makemake iho, a ua manaʻo pono ma loko o kona naʻau, e mālama pēlā i kāna kaikamahine, ua pono nō kāna hana ʻana.
38No laila, ʻo ka mea hāʻawi ma ka mare, ua hana pono ia, a ʻo ka mea hāʻawi ʻole ma ka mare, ua hana pono loa ia.
39¶ Ua paʻa ka wahine, i ka wā a pau e ola ana kāna kāne; akā, inā i make kāna kāne, ua pono ia ke mare aku i ka mea āna e makemake ai; i loko hoʻi o ka Haku.
40I koʻu manaʻo hoʻi, ua ʻoi aku kona pōmaikaʻi, ke noho ia pēlā; a ke manaʻo nei au, ua loaʻa iaʻu ka ʻUhane o ke Akua.
Currently Selected:
ʻO KA ʻEPISETOLE MUA A PAULO KA LUNAʻŌLELO I KO KORINETO 7: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
