1 Korintus 6

Orang Kristen harus urus dong pu masala sendiri

6:1-11

1Knapa dari antara kam ada orang yang kalo ada masala deng orang percaya lain, de brani skali bawa masala itu ke hakim yang tra knal Allah, bukan ke Allah pu orang-orang? 2Ato kam tra tau ka kalo Allah pu orang-orang yang nanti jadi hakim untuk dunia? Kalo kam yang nanti jadi hakim untuk dunia, masa kam tra bisa kas slesai masala-masala kecil tu? 3Kam tra tau ka kalo tong yang nanti jadi hakim untuk malaikat-malaikat? Apalagi masala-masala kecil dalam tong pu hidup hari-hari. 4Jadi, kalo kam harus urus masala-masala kecil, knapa kam bawa masala itu ke orang luar yang tra dapa hitung dalam jemaat? 5Sa bicara ini untuk bikin malu kam. Masa di antara kam trada orang yang pu cara pikir paling baik yang bisa kas slesai masala-masala di antara de pu sodara-sodara yang sama-sama percaya tu? 6Mala sodara satu yang ada masala deng sodara yang lain, de pigi ke orang yang tra percaya untuk urus dong pu masala.

7Ada masala di antara kam saja, itu su kas tunjuk kalo kam su kala. Lebi baik orang bikin kam tra adil deng bikin rugi kam. 8Mala ini kam sendiri yang bikin tra adil, trus bikin rugi orang lain. Baru itu kam bikin ke kam pu sodara-sodara yang sama-sama percaya lagi.

9Ato kam tra tau ka kalo orang-orang yang tra benar trakan dapat bagian waktu Allah jadi Raja? Jang dapa tipu! Orang yang bikin barang kurang ajar, semba patung-patung, tidur deng orang yang bukan de pu pasangan, laki-laki yang tidur deng laki-laki, 10tukang curi, rakus harta, tukang mabuk, tukang crita-crita orang deng tukang tipu, trakan dapat bagian waktu Allah jadi Raja. 11Brapa orang dari kam memang dulu sperti begitu. Tapi skarang kam su dapa kas bersi dari dosa, kam su jadi Allah pu orang-orang, kam su dapa kas benar dari Allah lewat Tuhan Yesus Kristus pu nama deng lewat tong pu Allah pu Roh.

Orang Kristen tra bole bikin barang kurang ajar

6:12-20

12Ada yang bilang begini, “Sa bisa bikin apa saja,” tapi tra smua ada guna. Sa bisa bikin apa saja, tapi sa tra mau dapa kuasai dari apa saja.#1 Korintus 10:23 13Juga ada yang bilang, “Makanan untuk perut, trus perut untuk makanan,” dua-dua itu nanti Allah kas hilang. Tapi badan bukan untuk bikin barang kurang ajar tapi untuk layani Tuhan, trus Tuhan yang jaga tong pu badan. 14Allah yang kas hidup Tuhan Yesus kembali, De yang nanti kas hidup tong kembali juga pake De pu kuasa.

15Kam tra tau ka kalo kam pu badan tu Kristus pu anggota badan? Jadi pantas ka sa ambil Kristus pu anggota badan, baru kas satu deng placur pu badan? Tra mungkin skali! 16Ato kam tra tau ka kalo sapa saja yang tidur deng placur, jadi satu deng prempuan itu? Karna ada tatulis, “Dong dua jadi satu.”#Kejadian 2:24 17Tapi sapa yang kasi de pu diri untuk Tuhan, Tuhan pu Roh deng orang itu pu roh jadi satu.

18Kas jau diri dari bikin barang kurang ajar! Karna smua dosa lain yang orang bikin tu, itu jadi di luar orang pu badan. Tapi orang yang bikin barang kurang ajar de bikin dosa ke de pu badan sendiri. 19Ato kam tra tau ka kalo kam pu badan tu Roh Allah pu ruma, Roh yang kam trima dari Allah sendiri, De yang tinggal di dalam kam, jadi kam pu badan tu bukan kam pu milik sendiri lagi.#1 Korintus 3:16; 2 Korintus 6:16 20Karna kam su dapa bli, Allah su bayar kas lunas. Jadi pake kam pu badan untuk kas tinggi Allah pu nama.

Currently Selected:

1 Korintus 6: MPapua

Highlight

Copy

Compare