1 Korintus 5

Dosa dalam jemaat

5:1-13

1Memang sa ada dengar kalo di kam situ ada yang bikin barang kurang ajar, masa ada orang satu yang tidur deng de pu bapa pu istri tu? Mo sampe bangsa-bangsa yang tra knal Allah juga trada yang bikin begitu.#Ulangan 22:30 2Su begitu tapi kam masi sombong. Padahal kam harus rasa sedi, trus kas kluar orang yang bikin begitu dari kam pu jemaat to? 3Biar sa pu badan jau dari kam tapi sa pu hati ada sama-sama deng kam. Jadi sama sperti sa hadir, sa su putuskan untuk hukum orang yang su bikin macam begitu. 4Waktu kam kumpul, trus sa pu hati deng tong pu Tuhan Yesus pu kuasa juga hadir, 5kam harus kasi orang itu ke Iblis deng nama Tuhan Yesus, biar orang itu pu badan dapa siksa, tapi de pu roh slamat waktu Tuhan datang kembali.

6Kam sombong untuk apa, kam tra tau ka kalo dosa tu sperti ragi sdikit yang bisa bikin adonan smua naik?#Galatia 5:9 7Buang ragi yang lama itu dulu, supaya kam jadi adonan yang baru yang trada ragi. Memang kam su sperti adonan yang baru yang trada ragi, karna tong pu anak domba Paska su dapa kas korban, itu tu Kristus.#Keluaran 12:5 8Itu jadi, mari suda tong hidup sperti ada bikin Hari Besar Roti Tra Pake Ragi. Jang pake ragi yang lama, itu tu ragi klakuan yang sala deng yang jahat, tapi pake roti yang trada ragi, itu tu klakuan yang jujur deng yang benar.#Keluaran 13:7; Ulangan 16:3

9Di sa pu surat yang dulu, sa su tulis ke kam supaya kam jang teman deng orang-orang yang bikin barang kurang ajar. 10Yang sa maksud tu bukan smua orang di dunia ini yang biasa bikin barang kurang ajar, ato untuk smua orang yang rakus harta deng tipu-tipu orang, ato untuk smua orang yang semba patung-patung. Karna kalo kam mo jau dari dong, kam harus kluar dari bumi ini to? 11Tapi yang sa tulis skarang tu, supaya kam jang teman deng orang yang biar de bilang de tu sodara yang sama-sama percaya tapi de bikin barang kurang ajar, rakus harta, semba patung-patung, crita yang tra benar tentang orang lain, tukang mabuk ato tukang tipu. Sampe makan sama-sama deng orang yang macam begitu juga jangan.

12Memang bukan sa pu urusan untuk hukum dong yang blum percaya yang ada di luar jemaat. Tapi kam sendiri yang harus hukum dong yang ada di dalam jemaat to? 13Dong yang di luar jemaat tu nanti Allah yang hukum dong. Jadi, “usir suda orang yang bikin jahat dari tenga-tenga kam.”#Ulangan 13:5; 17:7

Currently Selected:

1 Korintus 5: MPapua

Highlight

Copy

Compare