1 Korintus 4

Kristus pu utusan-utusan

4:1-5

1Jadi kam harus anggap tong tu Kristus pu pesuru-pesuru yang pu tanggung jawab untuk kastau Allah pu rahasia. 2Playan-playan yang begitu tu dong harus kas tunjuk kalo dong bisa dapa percaya. 3Jadi mo kam ka ato sidang ka, mo nilai apa tentang sa, itu tra penting untuk sa. Apa yang sa nilai tentang sa juga itu tra penting. 4Karna memang sa rasa sa tra bikin sala apapa, tapi prasaan itu bukan brarti sa tra sala. Biar Tuhan sendiri yang nilai sa sala ato tidak. 5Itu jadi, jang terlalu cepat nilai orang seblum de pu waktu. Tunggu sampe Tuhan datang karna De pasti kas trang smua yang tasembunyi dalam glap. Trus nanti De kas jlas apa yang manusia rencana di dalam hati. Waktu itu stiap orang pasti dapa puji dari Allah sperti yang pantas de trima.

Kas renda ko pu diri

4:6-21

6Sodara-sodara, yang sa su tulis tentang sa deng Apolos tu untuk kam pu baik, supaya dari tong pu conto, kam bisa blajar arti dari kata, “Jang bikin lebi dari yang su tatulis,” supaya jang ada orang yang sombong karna de ikut pemimpin yang satu, trus anggap reme pemimpin yang lain. 7Karna sapa yang anggap ko lebi penting dari orang lain? Apa yang ko punya tu ko trima dari Allah to? Kalo memang smua itu ko hanya trima saja, untuk apa ko mo sombong macam smua itu ko tra dapa kasi?

8Kam su jadi kenyang, kam su jadi kaya, kam su jadi raja tapi tong tidak. Bagus suda kalo memang benar kam su jadi raja, supaya tong jadi raja sama-sama deng kam. 9Tapi sa pikir, tong utusan-utusan ni Allah kasi tempat yang paling renda. Tong sama sperti orang-orang yang dapa tangkap, trus mo dapa bunu di tempat umum. Sampe sluru dunia nonton tong, mo itu malaikat-malaikat ka ato manusia. 10Orang anggap tong bodok karna percaya Kristus, tapi kam masi anggap kam pintar karna percaya Kristus. Tong tra kuat tapi kam kuat. Tong dapa hina tapi kam dapa hormat.

11Sampe skarang ini biasa tong lapar, haus, trada pakean, dapa pukul, trada tempat tinggal, 12tong kerja banting tulang. Kalo tong dapa hina, tong balas deng kas berkat. Kalo tong dapa siksa, tong sabar saja.#Kisah Para Rasul 18:3 13Kalo tong dapa bicara yang tra baik, tong tetap jawab deng sopan. Sampe skarang ni tong su sama sperti sampa dunia, sama sperti kotoran bumi.

14Sa tulis ini bukan untuk bikin malu kam, tapi untuk tegur kam sperti sa pu anana yang sa sayang. 15Karna biar ada ribu-ribu orang yang kas ajar kam tentang Kristus, kam pu bapa rohani tra banyak. Sa yang jadi kam pu bapa rohani, karna sa yang bawa Brita Baik tentang Kristus Yesus ke kam. 16Itu jadi sa kas naseat kam, ikut sa pu conto suda!#1 Korintus 11:1; Filipi 3:17 17Itu yang sa kirim Timotius ke kam, de tu sperti sa pu anak yang sa sayang, trus de setia dalam Tuhan. Nanti de kas ingat kam tentang sa pu cara hidup dalam Kristus Yesus, sperti yang sa kas ajar dimana saja di stiap jemaat.

18Tapi ada brapa orang yang su jadi sombong karna dong kira sa trakan datang lagi ke kam. 19Tapi kalo Tuhan kas ijin, tra lama lagi nanti sa datang ke kam, baru sa tau sendiri kalo orang-orang sombong itu dong ada pu kuasa ka, ato dong hanya bicara saja. 20Karna bukti Allah jadi Raja tu bukan dari kata-kata, tapi dari Tuhan pu kuasa. 21Jadi kam mau apa? Sa harus datang ke kam deng kayu ato deng sikap yang tra kasar deng kas tunjuk sa pu sayang?

Currently Selected:

1 Korintus 4: MPapua

Highlight

Copy

Compare