1 Korintus 3

Baku mlawan

3:1-9

1Sodara-sodara, waktu itu tu sa tra bisa bicara deng kam sperti bicara deng orang yang su dapa pimpin dari Roh Allah, tapi sperti bicara deng orang yang masi hidup ikut dunia pu mau, yang de pu percaya ke Kristus masi sperti anak kecil. 2Waktu itu tu yang sa bisa kasi ke kam hanya susu saja, bukan makanan kras, karna kam blum bisa trima itu. Trus skarang juga kam masi blum bisa trima itu,#Ibrani 5:12-13 3karna kam masi hidup ikut dunia pu mau. Kalo masi ada iri hati deng baku mlawan di antara kam, itu yang kas tunjuk kalo kam masi hidup ikut manusia pu mau, sperti orang yang tra knal Allah to? 4Kalo orang yang satu bilang, “Sa ni Paulus pu pengikut,” trus yang lain bilang, “Sa ni Apolos pu pengikut,” itu su kas tunjuk kalo kam pu klakuan sperti manusia yang tra knal Allah to?#1 Korintus 1:12

5Jadi Apolos tu sapa jadi? Paulus tu sapa jadi? Tong ni Tuhan pu pesuru-pesuru yang su bantu kam untuk percaya to? Masing-masing bikin sperti tugas yang Tuhan kasi ke kitong. 6Sa yang tanam, Apolos yang siram, tapi Allah yang kas tumbu.#Kisah Para Rasul 18:4-11, 24-28 7Itu jadi, yang penting tu bukan yang tanam ato yang siram, tapi Allah yang kas tumbu. 8Mo yang tanam ka, mo yang siram ka, itu sama saja, masing-masing pasti trima de pu bagian sperti yang de su kerja. 9Karna tong dua sama-sama kerja untuk Allah, kam tu Allah pu kebun, Allah pu bangunan juga.

Fondasi deng bangunan

3:10-17

10Karna Allah pu baik yang Allah kas tunjuk ke sa, itu yang bikin sa jadi ahli bangunan yang pintar. Sa su bikin fondasi, orang lain lanjut bangun di atas fondasi itu. Tapi masing-masing orang harus liat baik-baik dulu bagemana de harus bangun di atas fondasi itu. 11Karna trada orang yang bisa taru fondasi lain lagi, hanya fondasi itu saja, fondasi itu tu Yesus Kristus sendiri.

12Mo dong bangun di atas fondasi ini pake emas ka, perak ka, permata ka, ato pake kayu ka, rumput kring ka, ato gaba-gaba ka, 13satu waktu nanti masing-masing orang pu hasil kerja pasti kliatan, karna di hari trakir itu pasti jadi jlas. Karna di hari itu tu masing-masing orang pu hasil kerja nanti dapa uji deng api. 14Kalo hasil kerja yang orang bangun tu tahan uji, pasti de dapat de pu bagian. 15Tapi kalo de pu hasil kerja tabakar, pasti de rugi. De sendiri pasti slamat, tapi sperti orang yang lolos lewat api.

16Kam tau to kalo kam smua tu Ruma Allah, trus Roh Allah tinggal di dalam kam?#1 Korintus 6:19; 2 Korintus 6:16 17Kalo ada orang yang kas rusak Ruma Allah, nanti Allah kas rusak de juga. Karna Ruma Allah tu kusus untuk Allah saja, trus Ruma Allah tu kam suda.

Jang bikin diri pintar

3:18-23

18Jang ada orang yang tipu de pu diri sendiri suda. Kalo di antara kam ada orang yang anggap de pintar mnurut dunia ini pu cara ukur, biar de jadi bodok suda, supaya de pintar betul-betul. 19Karna dunia pu pintar tu untuk Allah itu barang bodok. Karna ada tatulis, “Orang-orang yang anggap dong pintar, Allah pake dong pu pintar tu untuk balik kas kala dong.”#Ayub 5:13 20Ada tatulis juga, “Orang-orang yang anggap dong pintar tu, Tuhan tau dong pu pikiran, memang smua tu percuma saja.”#Mazmur 94:11 21Jadi jang ada orang yang angkat-angkat diri karna jadi satu orang pu pengikut, karna Allah su kasi smua untuk jadi kam pu milik. 22Mo Paulus ka, Apolos ka, Kefas#1 Korintus 1:12 ka, ato mo dunia ka, hidup ka, mati ka, ato waktu skarang ka, waktu yang mo datang ka, smua itu kam pu milik. 23Karna kam tu Kristus pu milik, trus Kristus tu Allah pu milik.

Currently Selected:

1 Korintus 3: MPapua

Highlight

Copy

Compare