VA ROMA 3

1Oco, hẽ, u Yudea wa velapo ndati, pamue evamba li kuatisa ndati? 2Ci kuatisa ca lua kovina viosi. Tete, va Yudea ovo va kolelua okuti va kundikiwa ovitumasuku. 3Ci linga cimue nda vamue va konyoha? Okukonyoha kuavo hẽ, ku nyõla ocili ca Suku? 4Ka ku ci nyõli. Suku a limbukiwe okuti ukuacili ndaño omanu vosi va linga olohembi, ndeci ca sonehiwa okuti, Oco o tendiwa ndukuesunga mekonda liolondaka viove, kuenje kekanga o yula. 5Puãi, nda evĩho lietu li lekisa esunga lia Suku, tu popia nye? Ñasi loku popia ndeci ci popia popia omanu. Tu popia hẽ, tuti, Suku hokuesungako omo a tu yambula lonyeño? 6Oco hacoko. Momo, nda oco, Suku o tetuluila ndati oluali? 7Puãi, nda kuhembi wange oko ocili ca Suku ci muisilua ulamba, nye misilua ndukuakandu? 8Nye ka tu lingila cĩvi ha ci koki ciwa? Kuli muẽle ava va tu lundila okuti oco tu popia. Episo liavo lia sunguluka.

9Nda oco, tu popia nye? Etu tu va Yudea hẽ, tua velapo? Sio. Momo nda sapula ale, siti, Vosi, ci kale va Yudea, ci kale va Helasi, vosi muẽle va kasi vomi yekandu, 10ndeci ca sonehiwa okuti,

Ka kuli ukuesunga ndaño umuamue.

11Ka kuli u o limbuka.

Ka kuli u o sanda Suku.

12Vosi va pambuka. Vosi va nyõlehela pamuamue.

Ka kuli u o linga eci ciwa, ndaño umuamue.

13Angũli avo a linga eyambo liupulule.

Alimi avo va kemba kemba lao.

Ovule wolombandanjila u kasi vemi liolonjembue viavo.

14Imẽla viavo vie yuka esiñalo loku lula.

15Olomãi viavo vi yayuila koku pesela osonde.

16Volonjila viavo muli oku nyõleha lelamba.

17Ka va kũlĩhile onjila yombembua.

18Ka va kuete usumba la Suku.

19Kaliye, tu ci okuti cosi ovihandeleko vi popia vi popia lava va tiamela kovihandeleko, okuti ovimẽla viavo vi munĩhĩwa, kuenje oluali luosi lu tetuluiwa la Suku. 20Momo, eci eye a tetulula, lomue ukuetimba o tendiwa ndukuesunga mekonda liovilinga vioku pokola ño kovihandeleko, omo okukũlĩha ekandu ku tunda kovihandeleko.

21Cilo puãi, kua tukuluka esunga lia Suku ka li kuete cimue lovihandeleko, kuenje ovihandeleko lovaprofeto va li imbila uvangi. 22Esunga liaco lia Suku li sangiwa la vosi va kolela Yesu Kristu. Momo ka kuli oku litepa, 23vosi va linga akandu, kuenje va lipumbisa ulamba wa Suku. 24Cilo puãi, omo Suku wa eca Omõlaye Yesu Kristu, lomo eye, Yesu Kristu, a pesela osonde yaye ha lingi ocimuenyo cava va kolela, 25oco ocali ca Suku ca va tenda nda vakuesunga kuenje halondandoko. Suku wa ci lingila oku lekisa esunga liaye, momo, koloneke viokonyima, Suku wa pandikisile loku vanja ño akandu. 26Wa ci lingilavo oku lekisa esunga liaye voloneke vilo, okuti Suku eye muẽle ukuesunga, haeye o tenda ndukuesunga u o kolela Yesu.

27Nda oco, okulipanda kuetu ku kasi pi? Kua takumuiwa. Leci ca ku takumuisa hẽ, oco nye? Ovilinga ale? Havilingako, te ekolelo. 28Oco ka tu tatãla vali, ca tu lomboloka ciwa okuti omunu o tendiwa ndukuesunga mekonda liekolelo o kasi lalio, mekonda liovilinga vioku pokola ño kovihandeleko hacoko. 29Suku hẽ, Suku ya va Yudea lika? Ha Suku ya vakualofekakovo? Ocili muẽle, haeyevo Suku ya vakualofeka, 30kuenje omo Suku umuamue, oco vakuevamba o va tenda nda vakuesunga nda va kuete ekolelo; loviyamba, laviovo, o va tenda nda vakuesunga nda va kuete ekolelo. 31Oco hẽ, omo tua tõlisa ndomo ekolelo, ca lomboloka okuti tua imula ovihandeleko? Hacoko. Tua tõlisa muẽle ovihandeleko.

Currently Selected:

VA ROMA 3: EMB63

Highlight

Copy