Filipenses 1
1
Apóstol Pablo saludakunqan
1Filipos#Hech. 16.12. markachö mayor wawqikuna, diäcunukuna y wakin creyikuq majikuna:
Noqa Pablo, Jesucristupa serviqnin karmi kay cartata Timoteuwan cartakayämü. 2Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy.
Dios Yayaman Pablo mañakunqan
3Qamkunapaq yarpäyarnikim Dios Yayata imaypis agradëcikü. 4Tsaynöllam Dios Yayaman mañakur imaypis qamkunapaq kushishqa mañakü. 5Jesucristupa alli willakuyninta chaskiyanqaykipita kananyaq yanapayämanqaykitam ni imaypis qonqätsu. 6Musyämi qamkunachö Dios Yaya alli rurayta qallanqanta y Jesucristo kutimunqanyaq tsay ruranqanta ushananpaq kanqanta.#Sal. 138.8.
7Qamkunapaq yarpararmi tsaynö niyaq. Jesucristupa willakuyninta willakur puriptïpis o prësu kaptïpis qamkunam yanapayämashkanki. 8Dios Yayam musyan imaypis yarparaykäyanqaqta. Jesucristo kuyamanqantsiknöllam noqapis llapan shonqüwan kuyayaq.
9Tsaymi Dios Yayata mañakü alli tantiyakuq kaynikikunawan payta kuyarnin jukniki juknikipis kuyanakuyänaykipaq. 10Tsaynö kuyanakurmi alli kaqkunata rurayänaykipaq tantiyayanki y Jesucristo kutimunanta shuyäkur pay munanqannö jutsannaqlla kawakuyanki. 11Imaypis allikunallatana rurayänaykipaq Jesucristo yanapaykuyäshuy. Dios Yaya alabashqa kananpaq tsaynö kaykullätsun.
Jesucristupa alli willakuyninta willakuyaptin Pablo kushikunqan
12Kuyashqa wawqikuna y panikuna, prësu qaykurätsiyämaptinpis Jesucristupa alli willakuyninta maytsaychö allish chaskiyanqanta musyayänaykitam munä. 13Tsaymi kaychö llapan wardiakunawan wakin runakunapis musyayan Jesucristupa willakuyninta willakunqäpita prësu kaykanqäta.#Hech. 28.30. 14Tsayta musyarmi atskaq wawqikuna y panikunapis Jesucristuman mas confiakurnin imapita mana mantsakur willakuyninta willakuykäyan.
15Wakinqa noqapita mas reqishqa kayta munarmi chikiyämar willakuykäyan. Peru wakinmi sïqa runakuna salvakäyänanpaq willakuyan. 16Paykunam musyayan Jesucristupa alli willakuyninta willakunqäpita qaykuraykanqäta. Qaykuraptïpis Jesucristuta kuyarmi willakuykäyan. 17Peru kikillankuna reqishqa kayta munaqkunaqa manam Dios Yayata servirtsu willakuyan sinöqa imaykanöpapis rabyatsiyämayta munarmi. 18Peru tsaynö kayaptinpis manam llakikütsu. Rabyatsiyämänanpaq o runakuna salvakäyänanpaq willakurpis Jesucristupa alli willakuyninta willakuyaptinqa alläpam kushikü.
Pablupaq kawaywan wañuypis allilla kanqan
Tsaynöllam imaypis kushikü 19Dios Yayaman noqapaq mañakuyaptiki y Jesucristupa Espïritun yanapamaptin prësu kanqäpita yarqamunäpaq kanqanta musyar. 20Mana mantsakur willakunäpaq imaypis yanapamanqannöllam autoridäkunapa puntanchöpis yanapamanqa. Tsaymi Jesucristo yanapamanqan musyakanqa kawaykaqta o wañushqata dëjayämaptinpis.
21Kawarpis Jesucristullapaqmi kawakushaq. Wañukuptïpis noqapaqqa mas allim kanqa.#Gál. 2.20. 22Peru tsaynö kaykaptinpis mana wañutsiyämaptinqa Jesucristupa willakuynintam imaypis willakushaq. Tsaymi wañuywan kawaypis noqapaqqa iwallla kaykan.
23Tsaynö kaptinmi ni mayqanta akraytapis puëdïtsu. Noqapaqqa mas allim kanman kay patsata dëjaskir Jesucristupa puntanman aywakunqä. 24Peru qamkunata yanapayänaqpaq mas allim kanman maslla kawaptïpis. 25Tsaymi qamkuna rayku Dios Yaya tsapämaptin autoridäkuna wañutsiyämanqatsu. Tsaynöpam yanapayäshayki Dios Yayaman creyikur kushishqa kawakuyänaykipaq. 26Prësu kanqäpita yarqaskamur qamkuna kaqman chämuptïmi Jesucristuta alläpa kushishqa alabashun.
Chikiyaptinpis mana mantsakuyänanpaq ninqan
27Jesucristupa alli willakuynin ninqannö imaypis kawakuyay. Tsaynöpam shamur o mana shamurpis musyashaq alläpa sufrirpis Jesucristo munanqannö kawakuykäyanqaykita y imaypis kuyanakuykäyanqaykita. Tsaynöllam musyashaq runakuna chikiyäshuptikipis Jesucristupa alli willakuyninta willakuykäyanqaykita.
28Jesucristuman creyikuyanqaykipita chikiyäshuptikipis ama mantsakuyaytsu. Tsaynöpam tantiyakuyanqa kikinkuna condenashqa kayanqanta y qamkunata Dios Yaya salvayäshunqaykita. Tsaytaqa Dios Yayam ruranqa.
29Manam Jesucristuman creyikunallapaqtsu Dios Yaya akramashkantsik sinöqa pay rayku sufrinapaqmi. 30Ñawpata imanö sufrinqäta y kanan imanö sufrinqätapis musyayankim.#Hech. 16.19-40. Noqapis y qamkunapis Jesucristupa willakuyninta willakunqantsikpitam sufrishun.
Currently Selected:
Filipenses 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.