Juan 8
8
Ollqun mana respitaq warmita Jesús perdonanqan
1Jesúsnam Olivos lömaman aywarqan. 2Tsaypita waränin alliq templupa patiunman kutiptinmi llapan runakuna pay kaqman qorikäyarqan. Tsaychö jamaykur Jesús yachaykätsiptinmi 3ley yachatsikuqkunawan fariseukuna juk warmita apayämurqan. Tsay warmitam ollqunta mana respitar jukwan kaykaqta tariyarqan. Llapanpa puntanman chaykatsirmi 4Jesústa niyarqan: <<Rabí, kay warmitam ollqunta mana respitar jukwan kakuykaqta tariyashkä. 5Moisés qellqanqanchömi nimantsik tsaynö warmikunataqa saqmar wañutsinapaq.#Lev. 20.10; Deut. 22.22-24. Qamqa ¿ima ninkitan?>>
6Jesústa tsaynö tapuyarqan mana allita parlaskatsir acusayänanpaqmi.#8.6 Roma autoridäkunam munayarqantsu Israel runakuna pitapis wañutsiyänanta. Tsaymi: <<Moisés qellqanqanchö ninqannö saqmashun>> niptinqa Jesústa prësu achkuyanman karqan. <<Ama saqmashuntsu>> niptinqa ley yachatsikuqkunawan fariseukunam: <<¿Imanirtan Moisés qellqanqanta cäsunkitsu?>> niyanman karqan. Peru Jesúsnam umpuykur dëdunwan allpachö qellqarqan. 7Yapay yapay tapuyaptinnam ichirkur nirqan: <<Mä, mayqaykipis jutsannaq karqa kay warmita puntata saqmayay>>.
8Tsaynö niskirmi yapay umpuykur allpachö qellqarqan.
9Tsaynö niykuptinmi#8.9 Wakin qepa kaq griego copiakunachömi jutsayuq kayanqanta tantiyakurnin nir yapayashqa. awkinkunapita qallaykur llapan jukpa jukpa yarquskir aywakuyarqan. Tsaymi tsay warmillana Jesúspa puntanchö quëdaskirqan. 10Jesúsnam ichirkur tsay warmita nirqan: <<¿Maytan apayämushuqnikikuna? ¿Manaku ni jukllaqllapis saqmayäshuruyki?>>
11Warminam nirqan: <<Taytay, manam ni mayqanpis saqmayämaruntsu>>.
Jesúsnam nirqan: <<Noqapis manam saqmashqa kanaykita munätsu. Kananqa wajikipana aywakuy. Peru amana jutsata rurankinatsu>>.]
Pïmaypaq Jesús aktsi kanqan
12Tsaypitanam runakunata Jesús nirqan: <<Noqam kay patsachö aktsi kä.#8.12 <<Aktsim kä>> nirqa runakunata salvaq kanqanta y Dios munanqannö kawananpaq tantiyatsiq kanqantam Jesús nirqan.#Sal. 27.1; 119.105; Prov. 6.23; Isa. 49.6; Juan 9.5. Tsaymi ninqäta cäsuqkunaqa tutapaychönatsu kawayanqa, sinöqa kawatsikuq aktsichönam>>.
13 Fariseukunanam niyarqan: <<Tsaynö nirqa kikikipa yarpayllaykitam nikanki. Tsaymi creyiyaqtsu>>.#Juan 5.31.
14Jesúsnam nirqan: <<Kikïpa yarpaylläpita niptïpis ninqäkunaqa rasun kaqmi. Noqam musyä maypita shamunqäta y maypa aywanäpaq kanqanta. Qamkunaqa manam tsayta musyayankitsu. 15Qamkunam yarpayllaykikunapita juzgayämanki. Peru noqaqa manam qamkunanötsu pitapis juzgä. 16Kachamaqnï Taytä noqawan imaypis kaptinmi pitapis juzgarqa rasun kaqllata juzgä. 17Leynikikunachömi nin: <Ishkaq testïgukuna iwallla niyaptinqa rasun kaqtam musyantsik>.#Deut. 19.15. 18Tsay ninqannöllam kachamaqnï Taytä juk testïgu y jukaq testïgunam noqa kä>>.
19Tsaymi niyarqan: <<¿Maychötan taytayki?>>
Jesúsnam nirqan: <<Qamkunaqa manam Taytä pï kanqanta ni noqa pï kanqätapis musyayankitsu. Pï kanqäta musyarqa Taytä pï kanqantam musyayankiman>>.
20Jesús tsaynö nirqan templupa patiunchö ofrendata qoriyänan kaqchö yachatsikuykarmi. Tsaychö yachatsikuptinpis manaraq höran chämuptinmi pipis prësu achkurqantsu.
Ciëlupita kanqanta Jesús ninqan
21Tsaypitanam Jesús nirqan: <<Noqaqa aywakushaqnam. Aywakuskiptïqa ashiyämarpis manam tariyämankitsu. Noqa aywanqämanqa manam aywayta puëdiyankitsu. Tsaypa rantinmi jutsaykikunallachö wañuyanki>>.
22Israel runakunanam niyarqan: <<¿Imanirtan pay aywanqan kaqman mana chänapaq kanqanta nimantsik? ¿Kikillan wañutsikuytatsuraq yarpan?>>
23Jesúsnam nirqan: <<Qamkunaqa kay patsachö yuriqllam kayanki. Peru noqam sïqa ciëlupita shamushkä. 24<Noqam Kä>#8.24 Noqam Kä nirmi Jesucristo tantiyatsirqan kikin Dios kanqanta. Tsaypaq masta musyanaykipaq liyinki Éxo. 3.14; Juan 10.30-33. nikaptïpis mana creyiyämarqa jutsaykikunachömi wañuyanki. Tsaymi niyashkaq jutsaykikunallachö wañuyänaykipaq kanqanta>>.
25Tsaynö niptinmi tapuyarqan: <<Qamqa ¿pitan kanki?>>
Jesúsnam nirqan: <<Unaypitanam pï kanqätapis willayashkaq. 26Jutsaykikunata shimpiyänaqpaq atskaraqmi. Noqaqa kachamaqnï nimanqallantam willaykäyaq. Pay nimanqankunaqa llapanpis rasun kaqllam>>.
27Jesús tsaynö niptinpis Dios Yayapaq parlanqanta manam tantiyayarqantsu. 28Jesúsnam nirqan: <<Runapa Tsurinta pallarkurraqmi#8.28 Runapa Tsurinta pallariyänanpaq nirqa kikinta cruzchö wañutsiyänanpaqmi nirqan. Tsaynöllam wañunqanpita kawamuptin payta adorayänanpaq kanqanta nirqan. pï kanqäta tantiyayanki. Tsayraqmi kikïpa munaylläpita imatapis mana ruranqäta tantiyayanki. Willakurpis Taytä nimanqanllatam willakü. 29Kachamaqnïqa noqawanmi imaypis kaykan. Pay munanqannölla imaypis ruraptïmi kikillätaqa dëjamantsu>>.
30Jesús tsaynö niptinmi payman atskaq creyikuyarqan.
Libri kanapaq Jesús ninqan
31Tsaypitanam payman creyikuq Israel runakunata Jesús nirqan: <<Yachatsiyanqaqnölla kawarqa rasunpam discïpulükuna kayanki. 32Tsaymi rasunpa kaqta tantiyar librina kayanki>>.
33Tsaynö niptinmi niyarqan: <<¿Imanirtan librina kayänäpaq niyämanki? Noqakunaqa Abrahampita miraqmi kayä. Manam imaypis jukpa serviqnintsu kayashkä>>.#Mat. 3.9; Luc. 3.8.
34Jesúsnam nirqan: <<Rasun kaqtam niyaq: Pipis jutsa rurayllachö kawarqa serviqninmi kaykan. 35Servikuqqa manam patronpa tsurintsu, sinöqa serviqllanmi. Peru patronpa tsurinmi sïqa taytanpa kaqta imatapis rurananpaq poderyuq kaykan. 36Tsaymi servikuq kayanqaykipita Dios Yayapa Tsurin jipiyäshuptiki rasunpa librina kayanki.#Gál. 5.1, 13.
37<<Musyämi Abrahampita miraq kayanqaykita. Paypita miraq kaykarpis niyanqaqkunata mana chaskirmi wañutsiyämayta munaykäyanki. 38Noqaqa Taytäpa puntanchö rikanqäkunatam willayaq. Qamkunapis taytaykikuna yachatsiyäshunqaykitam ruraykäyanki>>.
Diablupa wamran kayanqan
39Tsaymi niyarqan: <<Noqakunapa taytäkunaqa Abrahammi>>.
Jesúsnam nirqan: <<Taytaykikuna Abraham rasunpa kaptinqa pay kawanqannömi kawayankiman. 40Peru qamkunaqa Dios Yaya nimanqankunata willayaptiqmi wañutsiyämayta munayanki. Abrahamqa manam ni imay Dios Yayapa willakuqninta wañutsinanpaq yarparqantsu. 41Qamkunaqa taytaykikuna ruranqannömi ruraykäyanki>>.
Paykunanam niyarqan: <<Noqakunaqa manam wachapukuytsu kayä. Dios Yayam noqakunapa Taytäkunaqa>>.
42Jesúsnam nirqan: <<Dios Yaya rasunpa Taytaykikuna kaptinqa noqatam kuyayämankiman. Noqaqa Dios Yayapitam kay patsaman shamushkä. Manam kikïpa munaylläpitatsu shamushkä, sinöqa Taytämi kachamashqa. 43¿Imanirtan niyanqaqkunata tantiyayämankitsu? Niyanqaqkunata chaskiyta mana munarmi tsaynö kaykäyanki.
44<<Qamkunapa taytaykikunaqa diablum. Tsaymi pay munanqanllata imatapis ruraykäyanki. Payqa unaypitam wañutsikuq kaykan. Llullakuq karmi imaypis rasun kaqtaqa parlantsu. Tsaymi pipis llullakurqa paynö llullakun. 45Rasun kaqta parlaptïpis noqataqa manam creyiyämankitsu.
46<<Mayqaykipis jutsata rurashqa kaptïqa mä shimpiyämay. Rasun kaqta willaykäyaptiqqa ¿imanirtan creyiyämankitsu? 47Dios Yayapa wamran karqa pay ninqantam cäsuyankiman. Diospa wamrankuna mana karmi cäsuyankitsu>>.
Abraham manaraq yuriptin Jesús kanqan
48Tsaynö niptinmi Israel runakuna niyarqan: <<¡Qamqa Samaria runakunanömi mana allikunata parlaykanki! ¡Qamchöqa supaynächi kaykan!>>
49Jesúsnam nirqan: <<Noqachöqa manam ima supaypis kantsu. Noqaqa Taytätam respitä. Qamkunaqa manam respitayämankitsu. 50Noqaqa manam aläbakütsu, sinöqa llapan runakunata juzgaq Dios Yayam alliman churamanqa. 51Rasun kaqtam niyaq: Ninqäkunaman creyiqkunaqa manam imaypis wañuyanqatsu>>.
52Israel runakunanam niyarqan: <<Kananmi sïqa qamchö supay kanqanta rasunpa musyayä. Abraham y profëtakunapis llapanmi wañuyarqan. Peru qamqa ninki: <Ninqäkunaman creyiqkunaqa manam imaypis wañuyanqatsu>. 53Qamqa ¿Abrahampita mastsuraq kanki? Abraham y profëtakunapis wañuykäyaptinqa ¿pï kanqaykitatan yarpanki?>>
54Jesúsnam nirqan: <<Niyanqaykinö aläbakuptïqa parlanqäkunapis manam imapaq välinmantsu. Taytämi noqataqa alliman churamanqa. Paytam qamkunapis <Diosnïmi> nikäyanki. 55Qamkunaqa manam payta reqiyankitsu. Peru noqam sïqa reqï. <Manam reqïtsu> nirqa qamkunanömi llullaküman. Pay ninqankunataqa llapantam cäsü. 56Unay castaykikuna Abrahammi shamunäpaq kanqanta musyar kushikurqan. Shamuqta rikämarmi alläpa kushikurqan>>.
57Israel runakunanam niyarqan: <<Manaraqpis pitsqa chunka (50) watayuq kaykarqa ¿imanötan Abrahamta reqinkiman karqan?>>
58Jesúsnam nirqan: <<Rasun kaqtam niyaq: Abraham manaraq yuriptin Noqam Kä>>.#8.58 Noqam Kä nirmi Jesucristo tantiyatsirqan kikin Dios kanqanta. Tsaypaq masta musyanaykipaq liyinki Éxo. 3.14; Juan 10.30-33.
59Tsaymi rumita aptarkur saqmayta munayaptin Jesús tsinkakurqan. Tsaypitanam [runakunapa chawpinpa päsaskir] templupita aywakurqan.
Currently Selected:
Juan 8: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.