Colosenses 1
1
Apóstol Pablo saludakunqan
1-2Colosas markachö salvashqa kaqkuna:
Noqa Pablo, Jesucristupa apostolnin kanäpaq Dios Yaya churamashqa kaptinmi wawqintsik Timoteuwan cartakayämü. Qamkunam Dios Yayapana kar pay munanqannö kawakuykäyanki. Taytantsik Dios Yaya [y Señor Jesucristo] llakipäyäshurniki alli päsakuychö kawakuyänaykipaq yanapaykuyälläshuy.
Dios Yayata Pablo mañakunqan
3Qamkunapaq mañakurmi Señornintsik Jesucristupa Taytan Dios Yayata imaypis agradëcikuyä. 4Jesucristuman shumaq creyiyanqaykita y creyikuq majintsikkunawan kuyanakuyanqaykitam musyayashkä. 5Dios Yayawan gloriachö imayyaqpis kawakuyänaykipaq kaqta musyarmi tsaynö kawakuykäyanki. Jesucristupa willakuyninta chaskiyanqayki junaqpitam gloriachö alli kawakuyänaykipaq musyayashkanki.
6Jesucristupa alli willakuynin qamkunaman chämunqannömi maytsaymanpis chaykan. Tsay alli willakuyta chaskirmi Dios Yaya munanqannöna kawaykäyan. Qamkunapis Jesucristupa alli willakuyninta chaskirmi Dios Yaya llakipäkuq kanqanta tantiyar pay munanqannöna kawakuykäyanki.
7Tsay willakuyninta chaskiyänaykipaqqa willakuq majï kuyay wawqintsik Epafrasmi#Col. 4.12; Film. 23. willayäshushkanki. Paypis Jesucristupa serviqnin karmi shumaq tantiyatsiyäshushkanki. 8Wawqintsik Epafrasmi willayämashqa Espíritu Santu yanapayäshuptiki kuyanakur shumaq kawakuyanqaykita.
9Tsaynö kawakuyanqaykita musyayanqä junaqpitam imaypis Dios Yayata mañakuykäyä Espíritu Santu yachayta qarayäshuptiki Dios Yaya munanqannö kawayänaykipaq. 10Pay munanqannö kawar y imaypis allillata rurarmi waran waran payta reqiyanki.
11Tsaynöllam mañakuykäyä poderösu kayninwan yanapayäshuptiki ima ñakaychö karpis mana ajayaypa creyikuyänaykipaq 12y imaypis kushishqa agradëcikuyänaykipaq. Paymi salvamashkantsik llapan salvanqan kaqkunawan herenciantsik chaskir gloriachö kawanapaq.
13 Satanáspa poderninpitam Dios Yaya jipimashkantsik#Efe. 6.12. kuyanqan Tsurin Jesucristupa mandakuyninchöna kawakunapaq. 14Jesucristum [yawarninta jichar] rantimarnintsik jutsantsikkunapita perdonamashkantsik.#Efe. 1.7.
Jesucristo llapanpita mas poderösu kanqan
15Dios Yayata mana rikarpis Jesucristuchömi pay imanö kanqanta tantiyantsik.
Payqa llapan kamanqankunapaq punta yuriqmi kaykan.#1.15 Llapan kamanqankunapaq punta yuriqmi kaykan ninanqa imapis manaraq kaptinmi Jesucristuqa mayna kaykarqan ninan y Jesucristo llapanpaqpis mandaqmi kaykan ninanmi (Sal. 89.27).
16Paywanmi Dios Yaya kamarqan llapan imaykatapis:
ciëluchö kaqkunata, kay patsachö kaqkunata,
rikanqantsikta, mana rikanqantsikta
y ciëluchö llapan poderyuqkunatapis.#Efe. 6.12.
Tsay llapantam kamarqan Jesucristuwan y paypa poderninchö kawakuyänanpaq.
17Imapis manaraq kaptinmi Jesucristuqa karqanna.
Llapan kamanqankunatam poderninchö katsin.#Juan 1.1-3, 18; Heb. 1.2-3.
18Jesucristum umantsik.
Noqantsiknam iglesian kar cuerpun kantsik.#Efe. 1.22-23; 4.15.
Llapanpita mas puntata Jesucristo kawamurmi pïmaypitapis mas poderösu kaykan.#Hech. 26.23; Apoc. 1.5.
19Tsaynö poderösu kananpaqmi Jesucristuchö Dios Yaya kaykan.
20Jesucristo raykum kay patsachö y ciëluchö kaqkunapis Dios Yayawan amistayarqan.#Efe. 2.16.
21Unayqa noqantsikpis mana allikunata yarparmi Dios Yayapa contran karqantsik. Jutsantsikmi paypita rakimarqantsik. 22Tsaynö kaykashqam cruzchö Jesucristo wañunqanpita Dios Yaya perdonamashkantsik. Tsaymi paypa puntanchö jutsannaq santuna kashun.
23Peru Jesucristuman imaypis firmi creyikur cäsukushun. Alli willakuyninchö nimanqantsikta imaypis wiyakushun. Tsay willakuytam maytsaychöpis willakuyan. Tsaynöllam noqapis willakuykä willakuqnin kanäpaq Dios Yaya akramashqa kaptin.
Ñakarpis Pablo willakunqan
24Mana Israel kaqkunata willanqäpita ñakatsiyämaptinmi Jesucristo iglesianpaq ñakanqanta cumplï. Paypa iglesianqa cuerpunmi kaykan.#Efe. 1.23. Tsaymi llakikunqäpa rantin kushikü. 25Iglesianta servinäpaq Dios Yaya churamashqa kaptinmi#Efe. 3.2. qamkunatapis llapan willakuyninta musyatsiyaq.
26Tsay willakuyninta unay runakuna mana musyashqa kayaptinpis kananmi sïqa creyikuq kaqkunata Dios Yaya musyatsimashkantsik. 27Tsaymi musyantsik mana Israel kaqkunapaqpis tsay willakuy alläpa kushikuypaq kanqanta. Tsay willakuymi nin: Jesucristum qamkunachömi kaykan. Payman creyikurmi Dios Yayapa puntanman chäyanki.
28Tsaymi Dios Yaya yachayta qarayämanqannö Jesucristupa willakuyninta llapan runakunata willakur shumaq tantiyatsiyä. Tsaynömi willakuyä Jesucristuta pïmaypis chaskir Dios Yayapa puntanman jutsannaq chänanpaq. 29Tsaynö kananpaqmi poderösu kayninwan Jesucristo yanapamaptin imaykata sufrirpis willakur puriykä.
Currently Selected:
Colosenses 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.