Miqueas 7
7
Israel runakuna jutsa ruraychö kayanqan
1¡Allaw noqallä!
Cosechashqa chakraman yaykur üvata o hïgusta ashiqnömi kaykä.
Chakrachö ni imata mana tarir mallaqaq runa llakikunqannömi llakikü.
2Kay nacionchöqa manam ni pipis Dios Yayata cäsuyantsu.
Allita ruraq runaqa manam jukllayllapis kantsu.#Sal. 12.1.
Wañutsinakuyllapaqmi yarparäyan.
Juknin jukninpis ushakätsinakuytam munayan.
3Jutsa ruraychöqa manam ni pipis paykunata gänantsu.
Autoridäkunawan juezkunapis qaraykunata chaskirmi alli justiciataqa rurayantsu.
Rïcu runakunam pägakur munayllankunata ruratsiyan.
Tsaynöpam wakin kaq runakunapis jutsa rurayllaman churakashqa kayan.
4Paykunachöqa mas respitashqa kaq runakunapis kashanömi kaykäyan.
Mas confiakuypaq runakunapis qarwa kashanömi kaykäyan.
Tsaynö karmi alläpa jutsasapa kayan.
Willakuq profëtakuna willakuyanqannöllam castigashqa kayänanpaq junaq chaykämunna.
Tsay witsayqa mananam imata rurayänanpaqpis puëdiyanqanatsu.
5Ama pitapis creyiyaynatsu.
Mas kuyanqayki kaq amïguykikunamanpis ama confiakuyaynatsu.
Warmikikunatapis llutallaqa amana ni imata willayaynatsu.
6Ollqu tsurinmi taytanta manakaqman churan.
Warmi wawanmi mamanpa contran shärin.
Llumtsuyninnam suegranta chikin.
Tsaynö kawarmi tsay wajillachö täkurpis kikinkunapuralla chikinakuyan.#Mat. 10.35-36; Luc. 12.53.
7Peru tsaynö kayaptinpis noqaqa Dios Yayamanmi creyikuykä.
Salvamaqnï Dios Yayamanmi imaypis confiakushaq.
Paymi mañakunqäta wiyaman.
Israel runakunata Dios Yaya salvananpaq ninqan
8Tsaypunmi Israel runakuna niyanqa:
<<Chikimaqnïkuna, desgracia päsamanqanpita ama kushipäyämaytsu.
Ishkirpis sharkushaqmi.
Mantsakaypaq tutapaychönö kaptïpis Dios Yayam noqapaq aktsi kanqa.
9Dios Yayata rabyatsirmi jutsata rurashkä.
Tsaymi castigamaptinpis jina awantashaq.
Tsaypitanam perdonamar aktsiman jipimanqa.
Salvamaptin kushishqam kawakushaq>>.
10Chikimaqnïkunapa rikänanchömi Dios Yaya yanapamanqa.
Tsayta rikarmi alläpa penqakuychö kayanqa.
Dios Yaya castigamanqanta rikarmi kushipämar niyämarqan: <<¿Maychötan Diosnikikuna kaykan?>>#Sal. 79.10; Joel 2.17.
Tsaynö niyämanqanpitam cällichö qetänö jarutakushqa kayanqa.
Tsaynö kaykaqta rikarmi noqapis paykunata kushipäshaq.
11Jerusalén marka, tumat corralaraq perqaykikuna allitsashqa kananpaq junaq chaykämunnam.
Nacionnikipis mas jatunmi kanqa.
12Tsay witsaymi maytsaypita runakuna qamman shayämunqa.
Tsaymi shayämunqa Asiriapita, Egiptupita, Nilo mayupita, Éufrates mayupita, lamar kuchunpita, jirkakunapita y maytsaypitapis.
13Jutsata rurarlla kawayanqanpitam markankunapis tsunyaranqa.
Dios Yayata mañakuyanqan
14Dios Yaya, kuyanqayki runakuna kaykäyaptïqa cuidaykayällämay.
Noqakunaqa üshaykikunanömi kayä.
Allin kaq sitiuchö täkurpis munti rurinchö oqrakashqanömi kaykäyä.
Unay castäkunata cuidanqaykinö noqakunatapis cuidaykayällämay.
Basánchö y Galaadchö alli qewa kanqanman yapay pushaykayällämay.
15Unay ayllükunata Egiptupita jipimur milagrukunata ruranqaykinö noqakunapaqpis milagrukunata ruraykullay.
16Milagrukuna ruranqaykita wakin kaq nación runakunapis rikäyätsun.
Tsayta rikarmi paykunapis musyayanqa japallayki poderösu Dios kanqaykita.
Paykuna poderninnaq kayanqanta tantiyarmi alläpa penqakushqa kayanqa.
Jankat äyakashqa karmi ni imanakaytapis puëdiyanqatsu.
17Paykunam imayka culebrakunanö allpata mikuyanqa.#7.17 Allpata mikuyanqa ninanqa alläpa penqakuyman churashqa kayänanpaq kanqantam nin (Gén. 3.14).
Tsinkakuyanqanpita yarqamurmi puntaykiman tsuktsukyarraq chäyämunqa.
18Dios Yaya, qamnöqa manam juk dios kantsu.
Kuyanqayki runakuna perdonta mañakuyäshuptikim perdonanki.
Jutsankunatam qonqanki.
Rabyarnin imayyaqpis castiganqaykipa rantinmi salvanqayki runakunata llakipar yanapayanki.
19Taytay, yapay llakipaykayällämay.
Jutsa rurayanqätapis ama yarpaykullaytsu.
Jutsäkunata jundu lamarman jitarpullay.
20Abrahamta, Jacobta y wakin kaq unay castäkunata llakipar prometinqaykita cumpliykullay.#Gén. 12.1-3; 17.6-8; 28.13-15; Luc. 1.55.
Currently Selected:
Miqueas 7: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
