Miqueas 6
6
Israel runakuna defendikuyänanpaq Dios Yaya ninqan
1 Dios Yaya ninqanta wiyayay.
Paymi nin:
<<Lömakuna wiyaykäyäshuptiki sharkur puntächö defendikuyay.
Jirkakuna wiyayäshunaykipaq jinchi parlayämuy.
2Jirkakuna, kuyanqä runakunata shimpiptï wiyayämay.
Patsata tukmaraq cimientukunapis, Israel runakunata cuentata mañaptï wiyayay.#Isa. 3.13; Ose. 4.1.
3<<Kuyanqä runakuna, ¿imatatan mana allita rurashkä?
¿Imachötan rabyatsiyashkaq?
Imachö resentitsiyanqaqtapis niyämay.
4Egiptuchö servikuq kayanqaykipitam librayarniki jipiyämurqaq.#Éxo. 12.50-51.
Pushayämushunaykipaqmi Moisésta, Aarónta#Éxo. 4.10-16. y Maríata#Éxo. 15.20. kachamurqä.
5Kuyanqä runakuna, yarpäyay Moab nacionpa mandakuqnin rey Balac qamkunapa contraykikuna shärinqanta.
Tsaynölla yarpäyay Beorpa tsurin Balaam maldicionäyäshunqaykipa rantin bendicionta churamunqanta.#Núm. 22—24.
Yarpäyay Sitimpita Gilgalyaq Jordán mayuta imanö päsayanqaykita.#Jos. 3.1—4.19.
Tsaykunata yarparmi tantiyayanki Diosnikikuna kar imaypis salvayanqaqta>>.
Dios Yaya imata munanqan
6¿Imaykallantsikwanraq Dios Yayapa puntanman chäshun?
¿Imallataraq poderösu Dios Yayata adoranapaq apashun?
¿Sacrificiuta waykanapaq watayuqllaraq mallwa törukunatatsuraq apashwan?
7Waranqa (1,000) carnërukunata pishtaskir paypaq waykashqa ¿kushikunqatsuraq?
Chunka waranqa (10,000) mayukuna aywaqtanö maytsika aceitita altarman wiñashqa ¿kushikunqatsuraq?
Jutsa ruranqantsikpita mayor tsurintsiktapis wañuskatsir waykashqa ¿kushikunqatsuraq?
8 Dios Yayam imata munanqantapis nimashkantsikna.
Payqam munan alli kaqllata ruranantsikta, runa majintsikta kuyar llakipänantsikta y mana allish tukur pay mandakunqanta cäsukunantsikta.#1Sam. 15.22; Prov. 21.3; Ose. 2.19-20; 6.6; Amós 5.22-24; Zac. 7.9-10.
Jerusalén runakunata Dios Yaya castigananpaq ninqan
9Jerusalén runakuna, Dios Yayam qayaykäyäshunki.
Tantiyakuq runa karqa paypita mantsakuyay.
Paymi nin:
<<Markachö kaqkuna y mayor runakuna, llapayki cäsukuyay.
10Wajikikunachöpis suwakuyanqaykillam kaykan.
Runa majikikunata engañayänaykipaqmi pësuykikunapis wajikikunachö kaykan.
11¿Imanötan perdonäman pishiq pësuwan engañaqta?#Lev. 19.35-36; Deut. 25.13-16; Amós 8.5.
12Kay markachö rïcu runakunaqa runa majinta ñakatsiq, runa majinta engañaq y llullakuqllam kayan.
13<<Tsaynö kayanqaykipitam castigayäshayki.
Jutsata rurayanqaykipitam ushakätsiyäshayki.
14Mikuyaptikipis pachaykikuna mana juntaptinmi mallaqaykarlla kayanki.
Cosëcha qoriyanqaykipis manam churayänaykipaq paqtäyäshunkitsu.
Churakuyanqaykitapis guërrachö venciskiyäshurnikim apakuyanqa.
15Murukuyanqaykitapis manam cosechayankitsu.
Aceitünasta aqarpis aceitinwan manam llushikuyankitsu.
Üvata jarurpis manam vïnuta upyayankitsu.
16<<Qamkunaqa rey Omri yachatsikunqan costumbrinkunata rurarmi jutsayuq kaykäyanki.
Rey Acab jutsata rurar kanqannömi kawaykäyanki.#1Rey. 16.29-30; 21.25-26.
Tsaynö kayanqaykipitam mana llakipaypa castigar desgraciakunaman qarpuyäshayki.
Alläpa sufriyanqaykita rikarmi asipäyäshurniki manakaqman churayäshunki>>.
Currently Selected:
Miqueas 6: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
