Miqueas 4
4
Maytsay nacionpitapis Jerusalénman Diosta adoraq aywayänanpaq ninqan
Isaías 2.2-4
1Shamuq watakunachömi Dios Yayapa wajin kaykanqan lömaqa wakin lömakunapita mas respitashqa kanqa.
Tsaymanmi maytsay nacionkunapitapis Dios Yayata adoraq aywayanqa.
2Tsaynöllam Sión lömapita Dios Yayapa yachatsikuyninta maytsayman apayanqa.
Jerusalénpitam maytsaymanpis palabranta willakuyanqa.
Maytsay nacionpita runakuna aywarmi niyanqa:
<<Dios Yaya akranqan lömaman llapantsik witsäshun.
Jacobpita miraq runakuna confiakuyanqan Dios Yayapa wajinman yaykushun.
Tsaychömi kikin yachatsimäshun mandamientunkunata imanö cumplinapaq kanqanta.
Tsaynöpam pay munanqannö llapantsik kawakushun>>.#Isa. 56.6-7; Zac. 8.20-22.
3Atska nación runakuna piñanakuyaptinpis Dios Yayam justiciata ruranqa.
Tsay nacionkuna jatun y mayjina karuchö kayaptinpis paymi juzganqa.
Juk markawan juk markapis guërrata manam rurayanqanatsu.
Maytsaychö runakunapis espädankunapitam planchonkunata ruratsiyanqa.
Lanzankunapitanam ösita ruratsiyanqa.#Joel 3.10.
Guërrachö pelyayänanpaqpis manam previnikuyanqanatsu.
4Tsaynöpam runakuna manana ni imapita mantsakur kawakuyanqa.
Üva jachapa y hïgus jachapa chakinchöpis tranquïlum jamaykuyanqa.#Zac. 3.10.
Llapanta mandaq Dios Yayam tsaynö kananpaq nin.
5Wakin kaq marka runakuna diosninkunaman confiakuyaptinpis noqantsikqa poderösu Diosnintsikmanmi imaypis confiakushun.
Israel runakuna markankunaman kutikuyänanpaq ninqan
6 Dios Yayam nin:
<<Tsay junaqmi imayka chakin pakishqa y oqrakashqa üshakunata qorimuqnö castiganqä Israel runakunata qorimushaq.
7Chakin pakishqa üshanö kaykäyaptin
y juklä markaman qarqushqa kaykäyaptinmi
yanapashaq markankunaman kutiykur mas poderyuq kayänanpaq.
Tsaynöpam Sión lömapita imayyaqpis mandaqnin reykuna kashaq.#Sof. 3.19.
8<<Sión marka, üshakunata rikachakuna törrinö karmi Dios Yaya kuyanqan runakunata alli rikaykanki.
Qamqa yapaymi poderyuq kanki.
Kuyanqä Jerusalénpitam yapay reykuna mandakuyanqa.
9Peru tsaynö kananpaq kaykaptinqa ¿imanirtan qeshyakunanpaq nanakuq warminö qayaraykachaykanki?
¿Manaku mandaqniki rey kan?
¿Yachayyuq runakuna wañuyashqaku?
10Tsaynö kaykäyaptinpis qamchö täkuq runakunata tsunya jirkakunapa aparmi Babilonia nacionman prësu chätsiyanqa.
Ay Sión, tsaynö kananpaq kaykaptinqa llakikur qeshyakunanapaq nanakuq warmi qochpaqnö qayaraykachay.
Juklä nacionman apayäshuptikipis contraykikunapa poderninpitam Dios Yaya salvayäshunki>>.
11Kananmi atska nación runakuna qorikaskir contrayki shäriyashqa.
Paykunam willanakur nikäyan:
<<¡Sión ushakaqta rikar kushipäshun!>>
12Peru tsay runakunaqa manam musyayantsu Dios Yaya imata yarpaykanqantapis.
Tsaynöllam musyayantsu trïguta wirunanpaq ëraman qoriqnö paykunata qorimur castigananpaq kanqanta.
13Dios Yayam nin:
<<Sión, trïguta jarutsir ushakätsiqnö tsay nacionkunata ushakätsiy.
Noqam yanapashayki fiërru waqrayuq y bronci shilluyuq törunö kar atska nacionkunata ushakätsiyänaykipaq.
Tsaypitam qechukur apamunqayki riquëzankunatapis qorimunki.
Tsaytanam kay mundupa ämun kaptï noqa Dios Yayapaq apamunki>>.
Currently Selected:
Miqueas 4: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
