Miqueas 3
3
Mana alli autoridäkunata castigananpaq ninqan
1Tsaypitam nirqä:
¡Jacobpita miraq runakunapa autoridäninkuna!
¡Israel runakunapa mandaqninkuna!
¡Shumaq wiyayämay!
Alli kaqta rurayänaykipaq ¿manaku tantiyayanki?
2Qamkunaqa allita rurayanqaykipa rantinmi mana allikunata ruraykäyanki.
Tsaymi runa majikikunapa qaranta shipraqnö y tullunpita aytsanta shiptiqnö kaykäyanki.
3Dios Yaya kuyanqan runankunata mikuqnömi kaykäyanki.
Qaranta shipraskir tullunta pakiqnömi kaykäyanki.
Calduyänaykipaq aytsanta prësaqnömi maltrataykäyanki.
4Tsaynö kayanqaykipitam mañakuyaptikipis Dios Yaya yanapayäshunkitsu.
Rabyatsir jutsata rurayanqaykipitam rikaytapis munayäshunkitsu.
Llulla profëtakunata castigananpaq ninqan
5Llulla profëtakunam Dios Yaya kuyanqan runankunata engañaykäyan.
Paykunaqa imantapis apapaq kaqllapaqmi bendición kananpaq niyan.
Peru mana apapaqnin kaqpaqmi sïqa maldición kananpaq niyan.
Tsaymi llulla profëtakunata Dios Yaya nin:
6<<Qamkunataqa mananam ni imata rurayänaykipaqpis musyatsiyäshaykinatsu.
Imanö kananpaq kaqtapis mananam willayäshaykinatsu.
Tsaymi tutapäpukushqanö kar imata willakuyänaykipaqpis musyayankitsu>>.
7Tsay llulla profëtakunaqa alläpa penqakuychömi kayanqa.
Dios Yaya mana tantiyatsiptinqa imata willakur parlayänanpaqpis manam shiminkuna pashtanqatsu.
8Peru noqatam sïqa Dios Yayapa Espïritun yanapaman pay munanqannö willakunäpaq.
Tsaymi valornï kan Israel runakuna mana cäsukuq kayanqanta y jutsayuq kayanqanta mana mantsakur willakunäpaq.
Jerusalén marka ushakänanpaq ninqan
9¡Jacobpita miraq runakunapa autoridäninkuna!
¡Israel runakunapa mandaqninkuna!
¡Shumaq wiyayämay!
¿Imanirtan demandanakuyanqanta shumaq arreglayankitsu?
¿Imanirtan leykunatapis cumpliyankitsu?#Amós 5.7.
10Tsaynö kayaptikim Jerusalénchö mana alli ruraykunawan wañutsinakuylla kaykan.
11Mandakuq autoridäkunapis qaraynin apapuq kaqllapam janan shäriyan.
Sacerdötikunapis qellay raykullam yachatsikuyan.
Profëtakunapis qellay raykullam willakuyan.
Tsaynö kaykarmi niyan: <<Dios Yayam yanapamantsik.
Manam ni ima desgraciapis päsamäshuntsu>>.
12Tsaynö kayanqaykipitam Sión löma#3.12 Sión lömachöqa templum karqan. imayka barbichashqa chakranö quëdanqa.
Jerusalén markata ushakätsiyaptinmi raqällana quëdanqa.
Templutapis juchuskatsiyaptinmi jachakunallana tsaychö wiñanqa.#Jer. 26.18.
Currently Selected:
Miqueas 3: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
