Miqueas 2
2
Mana alli rïcu runakunata castigananpaq ninqan
1¡Allaw! Qamkunaqa puñurpis mana allikunata rurayänaykillapaqmi yarparaykäyanki.
Munayanqaykita rurayänaykipaq poderyuq karmi patsa waraskiptin yarpäyanqaykinö llutankunata ruraykäyanki.
2Jukpa chakrankunatam munapar qechuykäyanki.
Runa majikikunapa wajintam qechuykäyanki.
Tsaynö rurarmi warminta y tsurinkunatapis sufriykätsiyanki.
Herenciankunatapis mana llakiparmi qechuykäyanki.
3Tsaymi Dios Yaya nin:
<<Noqapis yarpaykämi qamkunata castigayänaqpaq.
Castïgüpita manam ni imanöpapis qeshpiyankitsu.
Alläpa ñakatsiyaptiq orgullösu kayanqaykipis mayparaq aywanqa.
4Venciskiyäshurnikim kushipäyarniki y cantapäyarniki niyäshunki:
<Jankatmi ushakäyashkanki.
Diosnikikunam chakraykikunatapis entregamashqa.
Qamkunata venciskiyarnikim qechuyashkaq.
Chakraykikunam noqakunapana kaykan>.
Tsaynö wiyatsipäyäshurnikim cantapäyäshunki>>.
5Tsaymi Dios Yaya entregamanqantsik nacionchö ni pipis posesionta aypuyäshunkinatsu.
6Dios Yaya tsaynö castigananpaq kanqanta willakuptïmi runakuna niyäman:
<<Qam niyämanqaykinöqa manam ni imaypis päsayämanqatsu.#Isa. 30.10.
7Jacobpita miraqkuna kayaptïmi Dios Yaya noqakunawan rabyantsu.
Castigayämänanpaq willakuptikipis manam castigayämanqatsu.
Alli ruraq runakuna kaykäyaptïqa imaypis yanapayämanqam>>.
8Dios Yayam nin:
<<Qamkunam kuyanqä runakuna kaykar conträ shäriyanki.
Guërrapita wajinkunaman tranquïlu kutikuq runakunatam llatapankunatapis qechuykäyanki.
9Kuyakuypaq wajinkunata qechurmi warmikunata qarquykäyanki.
Tsaynöllam wamrankunapa herenciankunatapis qechuykäyanki.
10<<¡Manam rikaytapis munayaqtsu!
¡Kaypita sas waqranyäyay!
Kay nacionchö mananam täkuyankinatsu.
Qamkunam jutsayuq kaykäyanki kay nacionchö jutsa ruraylla kananpaq.
Jankatmi ushakätsiyäshayki.
11Wakinkunam llullakur niyan:
<Dios Yayam bendicionninta churamunqa vïnupis y ima machätsikuqpis atska kananpaq>.
Tsaynö nir pipis willakuptinmi profëtaykikuna kananpaq kushishqa chaskiyanki>>.
Kuyanqan runakunata Dios Yaya salvananpaq ninqan
12<<Jacobpita miraq runakuna,
kawaykar quëdaqkunatam imayka üshakunata juk patsaman qoriqnö nacionnikikunaman yapay qoriyämushayki.
Qoriyämuptiqmi wallkaqlla karpis atskaqnöraq kushishqa büllata rurayanki.
13Juklä nacionchö kayanqaykipitam nacionnikikunaman kikï pushayämushayki.
Markapa punkunpa yarquyaptikipis manam ni pï tsapäyäshunkitsu.
Mandakuqnikikuna rey karmi puntaykikunata kikï aywashaq>>.
Currently Selected:
Miqueas 2: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
