Jonás 4
4
Jonás rabyakunqan
1Nínive runakunata Dios Yaya mana ushakätsiptinmi Jonás alläpa piñakurqan. 2Tsaymi Dios Yayaman mañakur nirqan: <<Ay Dios Yaya, musyämi llakipäkuq y perdonakuq Dios kanqaykita. Alläpa kuyakuq karmi sasqa rabyankitsu. <Castigashaq> niskirpis jutsankunata dëjar arrepentikuyaptinqa manam castigankitsu.#Éxo. 34.6. Markächö kaykarmi maliciarqä Nínive runakunata llakipänaykipaq kanqanta. Tsaynöpam Tarsis markaman qeshpir aywakuyta munarqä. 3Willakaskatsimar mana ushakaykätsirqa mejor sas qorikamay. Kay munduchö kawanqäpa rantin mejorqa sas wañukushaq>>.
4Peru Dios Yayanam nirqan: <<Tsaynö rabyanqayki ¿allitsuraq?>>
5Nínive markapita Jonás yarquskirmi rupay yarqamunan kaqläman aywarqan. Tsaychö ramädata ruraskirmi Nínive markata imapis päsanqanta rikänanpaq llantukur jamarqan.
6Tsaymi Jonás mas llantukunanpaq ramäda jananpa calabäsuta Dios Yaya wiñätsimurqan. Calabäsupa rapran allish llantuptinmi Jonás alläpa kushikurqan. 7Peru waränin alliqnam calabäsupa yuranta kaptunanpaq shiwrita Dios Yaya yuritsirqan. Kaptuskiptinmi calabäsu tsakiskirqan. 8Tsaymi rupay yarqamuptin achaq wayrata Jonás kaqman Dios Yaya wayrätsimurqan. Rupaypa achaynin umanman alläpa achaptinmi desmayänanpaq kanqanta Jonás yarparqan. Tsaymi wañuyta munar nirqan: <<¡Kawanqäpa rantin jina wañuküman!>>
9Peru Dios Yayam nirqan: <<Calabäsu tsakiskiptin rabyakunqayki ¿allitsuraq?>>
Jonásnam nirqan: <<Awmi. Wañuypam rabyashqa kaykä>>.
10Tsaynam Dios Yaya nirqan: <<Tsay calabäsutaqa manam qamtsu murushkanki ni wiñätsimushkanki. Juk paqasmi wiñämushqa y waränin junaqmi tsakishqa. Tsaynö kaykaptinpis tsay calabäsutam llakinki llantukunaykipaq manana kaptin. 11Nínive markachömi pachak ishkay chunka waranqapita (120,000) mas runakuna kayan. Paykunam musyayantsu alli o mana alli ima kanqantapis. Tsaymi tsay calabäsupaq llakinqaykipitapis mas llakikü Nínive markachö runakunapaq y wätakunapaq>>.
Currently Selected:
Jonás 4: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
