Juan 4
4
Samaria warmiwan Jesús parlanqan
1Juan bautizanqanpita mas atskaq runakunata Jesús bautizaykanqanta y discïpulunkuna mas atskaq kayanqantam fariseukuna musyayarqan. 2(Peru Jesúsqa manam kikintsu bautizarqan, sinöqa discïpulunkunallam.) 3Fariseukuna tsaynö parlayanqanta musyaskirmi Judeapita Galileaman Jesús kutirqan.
4Galileaman chäyänanpaqmi Samariaparaq päsayänan karqan. 5Tsaynö aywarmi Sicar markaman chäyarqan. Tsay markaqa Jacob tsurin Joséta qaranqan chakrapa lädunchömi kaykan.#Gén. 33.19; Jos. 24.32. 6Tsaychömi Jacob uchkutsinqan pözu kaykan. Pullan junaqnöna kaykaptinmi tsay pözuman chaykur pishipashqa Jesús jamaykurqan. 7Tsayman Samaria warmi yaku apaq chaykuptinmi Jesús nirqan: <<Yakuta qaraykallämay>>.
8(Jesús jamanqanyaqmi discïpulunkuna mikuy rantiq markapa aywayarqan.)
9Tsay warminam nirqan: <<Israel runa kaykarqa ¿imanirtan Samaria warmi kaykaptï yakuta mañakamanki?>>
Samaria runakunawan Israel runakuna chikinakuyaptinmi tsaynö nirqan.
10Jesúsnam nirqan: <<Dios Yayapita imata chaskinaykipaq kanqanta musyar y noqa pï kanqäta musyarqa qammi yakuta mañakamankiman. Mañakamaptikiqa kawatsikuq yakutam qaraqman>>.#Isa. 44.3; Jer. 2.13; 17.13; Juan 7.37-39.
11Tsay warminam nirqan: <<Taytay, kay pözuqa jundum. Jipinaykipaq imaykipis mana kaykaptinqa ¿maypitatan tsay kawatsikuq yakuta jipimunkiman? 12Unay aylluntsik Jacobmi kay pözuta uchkutsirqan. Kay pözupitam wätankuna, tsurinkuna y kikinpis upyayarqan. Tsay yakupita mas alli yakuta qaramänaykipaq manam paypita mas poderyuqtsu kanki>>.
13Jesúsnam nirqan: <<Kay pözupita yakuta upyaq kaqqa yapaymi yakunanqa. 14Peru noqa qaranqä yakuta upyaq kaqmi sïqa imaypis yakunanqanatsu. Tsay qaranqä yaku shonqunchö pukyunö kaptinmi imayyaqpis kawanqa>>.
15Warminam nirqan: <<Taytay, imaypis mana yakunänäpaq ni kay pözuman manana kutimunäpaq tsay yakuta qaraykallämay>>.
16Jesúsnam nirqan: <<Ayway ollquykita qayamuy>>.
17Niptinmi warmi nirqan: <<Taytay, manam ollqü kantsu>>.
Jesúsnam nirqan: <<Rasun kaqtam nimashkanki. 18Qamqa pitsqa runawannam täkushkanki. Kanan täkunqayki runaqa manam ollquykitsu. Tsaymi <ollqü manam kantsu> nimarqa rasun kaqta nimashkanki>>.
19Warminam nirqan: <<Taytay, Diospa profëtanmi kanki, ïllu. 20Noqakunapa unay ayllükunam taqay jirkachö Dios Yayata adorayaq. Peru qamkunaqa Jerusalénchöraq adoranapaq kanqantam niyanki>>.
21Jesúsnam nirqan: <<Rasun kaqtam niq: Taqay jirkaman ni Jerusalénman mana aywar Dios Yayata adorayänaykipaq tiempu chaykämunnam. 22Qamkunaqa Diosta adorarpis willakuyninta manam musyayankitsu. Salvakuq runa Israelpita kaptinmi noqakunaqa willakuyninta musyayä.
23<<Tiempu chämushqanam Dios Yayata rasunpa adoraqkuna Espíritu Santu munanqannö llapan shonqunkunawan adorayänanpaq. Tsaynö adoranatam Dios Yaya munan. 24Dios Yayaqa Espïritum. Tsaymi payta adoraqkuna Espíritu Santu yanapaptin llapan shonqunkunawan adorayänan>>.
25Tsay warminam nirqan: <<Taytay, Cristo shamunanpaq kanqantam musyä. Pay shamurnam tsaykunata tantiyatsimäshun>>.
26Jesúsnam nirqan: <<Tsay shamunanpaq kaq runam noqa kä>>.
27Discïpulunkuna kutirnam warmiwan parlaykaqta tariskir alläpa mantsakäyarqan. Peru manam ni mayqanpis tapuyarqantsu imata parlayanqanta o imata tapunqantapis.
28Warminam puyñunta#4.28 Wakin runakunaqa uyllunta niyan. dëjaskir markaman aywar runakunata willarqan: 29<<Juk runam pözu kaqchö kaykan. Paymi nimashqa imanö kanqäta. Aku rikaq aywashun. ¿Manatsuraq Dios Yaya kachamunqan Cristo?>>
30Tsaynö niptinmi Jesús kaykanqan kaqman runakuna aywayarqan. 31Manaraq chäyaptinmi discïpulunkuna Jesústa niyarqan: <<Rabí, imallatapis mikuskishunraq>>.
32Jesúsnam nirqan: <<Noqapa mikuynïqa mana reqiyanqayki mikuymi>>.
33Tsaymi discïpulunkuna kikinkunapura ninakuyarqan: <<¿Piraq mikuynin apakamushqa?>>
34Tsaynö yarpäyanqanta tantiyarmi Jesús nirqan: <<Noqapa mikuynïqa kachamaqnï nimanqanta cumplinqäyaq ruranqämi. 35Musyayankim runakuna niyanqanta: <Murunqantsikpita chusku killataraqmi cosechantsik>. Tsaynö niyaptinpis noqam niyaq: Rikäyay. Chakrakunachö mikuykuna poqushqanam. Qoriypaqnam kaykan.#4.35 Poqushqa mikuytam Jesús iwalatsirqan payman creyikuyänanpaq listu kaykaq runakunaman. 36Tsay cosëchachö aruqkunam runakuna mana ushakaq kawayta tariyänanpaq aruyanqa. Tsaynö aruyanqanpitam Dios Yaya päganqa. Tsaymi murukuqpis y cosëcha qoriqpis kushikuyanqa.#4.36 Murukuqkuna y cosëcha qoriqkunaqa Diospa willakuyninta willakuqkunam kayan. Murukuqkuna willakuptinqa manam creyiyanraqtsu. Cosëcha qoriqkuna willakuyaptinnam creyiyan.
37<< <Juk murunqantaqa juknam cosechan> niyanqanqa rasun kaqmi kaykan. 38Tsaynöllam qamkunatapis kachayashkaq juk murunqanta cosechayämunaykipaq. Tsaymi wakin kaqkuna sufrir murukuyanqanta qamkunana qoriyämunki>>.
39<<Imanö kanqäta Jesús nimashqa>> nir tsay warmi willakuptinmi atskaq Samaria runakuna Jesúsman creyikuyarqan. 40Tsaymi Jesús kaqman chaykur paykunawan quëdananpaq rugayarqan. Tsaynö rugayaptinmi paykunawan ishkay junaq quëdarqan. 41Tsaychö willakuptinmi mas atskaq runakuna Jesúsman creyikuyarqan. 42Tsaymi tsay warmita niyarqan: <<Manam qam niyämanqaykillapitatsu creyikuyä, sinöqa kikïkuna wiyarmi llapan runakunata salvaq Cristo rasunpa kanqanta musyayä>>.
Autoridäpa tsurinta Jesús kutikätsinqan
Mateo 8.5-13; Lucas 7.1-10
43Tsaychö ishkay junaq qoyaskirmi Galileaman Jesús kutirqan. 44Jesús ninqannöllam Dios Yayapa profëtantapis markanchö chaskiyantsu.#Mat. 13.57; Mar. 6.4; Luc. 4.24. 45Tsaynö kaptinpis marka majinkuna Pascua fiestapaq Jerusalénman aywar milagrukunata ruranqanta rikashqa karmi#Juan 2.23-24. payta chaskiyarqan.
46Galileachö kaykarnam Caná markaman Jesús yapay kutirqan. Tsaychömi yakuta vïnuman ñawpata tikratsirqan.#Juan 2.1-11. Capernaúm markachönam reyta yanapaq juk autoridäpa tsurin qeshyaykarqan. 47Judeapita Galileaman Jesús chanqanta musyaskirmi tsay autoridä rugakuq aywarqan. Chaykurmi rugakurqan wajinman aywar antsa qeshyaykaq tsurinta kutikätsinanpaq. 48Jesúsnam nirqan: <<Milagru ruranqäkunata mana rikarqa manam creyiyankitsu>>.
49Tsay autoridänam nirqan: <<Taytay, tsurï wañuykannam. Saslla aywaykulläshun>>.
50Jesúsnam nirqan: <<Wajikipa kutikuy. Tsuriki kutikashqanam>>.
Jesús ninqanta creyirmi kutikurqan. 51Capernaúmman chaykaptinnam serviqninkuna tinkupaykur niyarqan: <<¡Taytay, tsuriki kutikashqanam!>>
52Tsaynö niyaptinmi serviqninkunata tapurqan imay höra kutikanqanta. Tsaymi niyarqan: <<Qanyan tardi la ünam achachaynin päraskirqan>>.
53Tsaynö willayaptinmi tsay runa tantiyarqan Jesús tsay höra <<tsuriki kutikashqanam>> ninqanta. Tsaymi wajinchö kaqkunawan Jesúsman creyikuyarqan.
54Judeapita Galileaman kutir tsay wamrata kutikätsinqanwanqa ishkay kutinam milagruta Jesús rurarqan.
Currently Selected:
Juan 4: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.