YouVersion Logo
Search Icon

Juan 19

19
1Tsaynö niyaptinmi Jesústa Pilato astatsirqan. 2Soldädukunanam kashapita corönata awaskir Jesúspa umanman shukutsiyarqan. Tsaynöllam granäti cäpata ashqutsiyarqan.#19.2 Granäti cäpataqa mandakuq reykunallam shukukuyaq. 3Tsaypitanam Jesústa laqyar niyarqan: <<¡Alabashqa katsun Israel runakunapa mandakuqnin rey!>>
4Tsaypitanam despächunpita yapay yarqaskamur Pilato nirqan: <<Tantiyakuyay. Apayämunqayki runapa ima jutsantapis manam tarïtsu. Tsaymi jutsannaq kanqanta musyayänaykipaq jipimushaq>>.
5Tsaynö nirmi Jesústa jipimurqan kasha corönan shukushqata y granäti cäpan shukushqata. Tsaymi Pilato nirqan: <<¡Kay runata rikäyay!>>
6Jesústa rikaskirmi mandakuq sacerdötikunawan templu täpaq wardiakuna qayaykachar niyarqan: <<¡Crucificay! ¡Crucificay!>>
Tsaynö niyaptinmi Pilato nirqan: <<Kikikikuna crucificäyay. Noqaqa manam ima jutsantapis tarïtsu>>.
7Tsaymi niyarqan: << <Diospa Tsurinmi kä> niqkunata wañutsiyänäpaqmi leynïkunachö nin. ¡Tsaynö kaykaptinqa tsay runa wañutsishqa katsun!>>
8Tsaynö niyaptinmi Pilato alläpa mantsakarqan. 9Tsaymi despächunman kutiskir Jesústa yapay tapurqan: <<¿Maypitatan kanki?>>
Peru tsaynö tapuptinpis Jesús manam ni imata parlakurqantsu. 10Pilatunam nirqan: <<¿Manaku ni imatapis contestamanki? Crucificätsinaqpaq o dëjanaqpaqpis poderyuq kanqäta ¿manaku musyanki?>>
11Jesúsnam nirqan: <<Qampa podernikiman Dios Yaya mana churamaptinqa imata ruramänaykipaqpis manam poderniki kanmantsu. Tsaymi podernikiman entregamaq runa qampita mas jutsayuq kaykan>>.
12Tsaynö niptinmi Pilato dëjayta munarqan. Peru Israel runakunapa autoridäninkunam masraq qayaykachar niyarqan: <<¡Kay runaqa rey tukurmi mandaq Césarpa contran kaykan! ¡Payta dëjarqa qampis Césarpa contranmi kanki!>>
13Tsaynö niyaptinmi Jesústa waqtaman jipiskatsimur Gábata niyanqan coredorchö Pilato jamarqan. (Hebreo idiömachömi Gábata ninanqa <<parara rumikunawan rurashqa>> ninan.) 14Tsay höraqa pullan junaqnömi karqan. Tsay tardim Pascua fiestachö jamay junaq qallananpaqna karqan.#19.14 Israel runakunapaqmi mushuq junaq las seis de la tardi qallarqan. Tsaychömi Pilato nirqan: <<¡Mandayaqniki reyta rikäyay!>>
15Paykunanam jinchi niyarqan: <<¡Wañutsun! ¡Wañutsun! ¡Crucificay!>>
Pilatunam nirqan: <<¿Mandaqnikikuna reytaku crucificätsishaq?>>
Mandakuq sacerdötikunanam niyarqan: <<¡Noqakunapa mandaqnïkuna reyqa Césarllam! ¡Paypita masqa manam juk rey kantsu!>>
16Tsaynö niyaptinmi munayanqannö Jesústa crucificäyänanpaq soldädukunata Pilato entregarqan. Tsaymi Jesústa apayarqan.
Jesústa crucificäyanqan
Mateo 27.32-44; Marcos 15.21-32; Lucas 23.26-43
17Cruzta matankarkatsirmi Calavëra niyanqan sitiuman Jesústa apayarqan. Hebreo idiömachömi Calavëra ninqanta Gólgota niyan. 18Tsayman chaykatsirmi Jesústa crucificäyarqan. Tsaynöllam ishkay runakunatapis Jesúspa lädunkunaman crucificäyarqan.
19Tsaypitanam juk letrëruta qellqaskir cruzpa puntanman Pilato clävatsirqan. Tsay letrëruchömi nirqan: <<Nazaretpita Jesús, Israel runakunapa mandakuqnin rey>>.
20Jerusalénpa cercanllachö crucificashqa kaptinmi tsay letrëruta Israel runakuna atskaq liyiyarqan. Tsay letrërum hebreo, latín y griego idiömakunachö qellqashqa karqan. 21Tsaymi mandakuq sacerdötikuna Pilatuta niyarqan: << <Israel runakunapa mandakuqnin rey> nirqa ama qellqaytsu. Tsaypa rantinqa <Israel runakunapa mandakuqnin rey kanqantam kay runaqa nirqan> nir qellqay>>.
22Pilatunam nirqan: <<Qellqanqäqa qellqashqanam>>.
23Crucificaskirnam Jesúspa llatapankunata chuskuq soldädukuna rakipunakuyarqan. Rurin kaq llatapan costürannaq kaptinmi 24niyarqan: <<Kaytaqa ama rachishuntsu. Tsaypa rantinqa mayqantsikpis apakunapaq sortiyashun>>.
Tsaynöpam Dios Yayapa palabran ninqanta cumpliyarqan. Tsaychömi nin: <<Llatapätam rakipunakuyashqa. Mayqanpis apananpaqmi sortiyayashqa>>.#Sal. 22.18. Tsay ninqannöllam soldädukuna rurayarqan.
25Crucificäyanqan kaqchömi kaykäyarqan Jesúspa maman, mamanpa ñañan, Cleofaspa warmin María y María Magdalena. 26Mamanta y kuyanqan discïpulun puntanchö kaykäyaqta rikaykurmi Jesús nirqan: <<Mamay, paynam wawayki kanqa>>.
27Tsaypitanam kuyanqan discïpuluntana nirqan: <<Kananpitaqa mamaykitanö rikaykullanki>>.
Tsaynö ninqanpitam wajinman pushaykur mamantanö rikarqan.
Jesús wañunqan
Mateo 27.45-56; Marcos 15.33-41; Lucas 23.44-49
28Llapan cumplishqana kanqanta musyarmi Dios Yayapa palabranta cumplinanpaq Jesús nirqan: <<¡Yakunämi!>>#Sal. 69.21.
29Tsaychömi järra junta puchquq vïnu kaykarqan. Tsaymi hisöpu jachaman esponjata watarkur tsay puchquq vïnuman tullpurkur Jesúspa shiminman wititsiyarqan. 30Tsay vïnuta yawarkurnam Jesús nirqan: <<Llapannam cumplishqa kaykan>>.
Tsaynö niskirnam wañuskirqan.
Jesústa tuksinqan
31 Pascuachö jamay junaq qallananpaqna kaptinmi#19.31a Pascuam las seis de la tardi qallarqan. Israel runakunapa autoridäninkuna pipis crucificashqa quëdananta munayarqantsu. (Pascuachö jamay junaqmi alläpa sagrädu karqan.) Tsaymi Pilatuta mañayarqan cruzchö clävaraykaqkunapa chankankunata pakiskir cruzpita jipiyänanpaq.#19.31b Cruzchö clävaraykaqkunapa chankankunatam pakiyaq sas wañuyänanpaq. Chankankunata pakiskiyaptinmi shütayänanpaq derechakayta manana puëdir wañuyaq. 32Mañayanqanta äniptinmi soldädukuna aywaykur Jesúswan crucificashqa kaykaq runakunapa chankankunata pakiskiyarqan. 33Jesús wañushqana kaptinmi paypa chankankunataqa pakiyarqannatsu. 34Tsaypa rantinmi juk soldädu lanzawan costädunpa tuksirqan. Tuksiskiptinmi yawarwan yaku sas yarqaskamurqan.
35Llapan tsaykunatam rikarqä. Tsaymi imanö kanqanta qellqä salvamaqnintsik Cristo kanqanta qamkunapis creyiyänaykipaq. Llapan qellqanqäkunaqa rasun kaqmi. 36Dios Yayapa palabranmi nin: <<Manam ni juk tullunllatapis pakinqatsu>>.#Éxo. 12.46; Núm. 9.12; Sal. 34.20.
Llapan tsaykunam päsarqan Dios Yayapa palabran cumplinanpaq. 37Tsaynöllam Dios Yayapa palabran nin: <<Tuksiyanqantam rikäyanqa>>.#Zac. 12.10.
Jesústa pampayanqan
Mateo 27.57-61; Marcos 15.42-47; Lucas 23.50-56
38Tsaypitanam Arimatea markapita José shutiyuq runa Pilatuta rugakur nirqan: <<Jesúspa ayanta pampanäpaq dëjapaykallämay>>.
Josépis Jesúspa discïpulunmi karqan. Peru Israel autoridäkunapita mantsakurmi musyatsikurqantsu. Mañakunqanta Pilato äniptinmi Jesúspa ayanta pampaq aparqan. 39Tsaymanmi Nicodemupis aywarqan kimsa arröbanö mïrrawan áloe takushqata#19.39 Mïrraqa jachapa weqinmi karqan. Áloepis juk jacham karqan. Tsaykunatam Israel runakuna tsakiskatsir ñutu aqayaq. Tsaytam ayaman wiñäyaq mana asyänanpaq. aparkur. Ñawpatam Nicodemo paqasllapa Jesúswan parlaq aywarqan.#Juan 3.1-2. 40Israel runakunapa costumbrinkunamannömi Joséwan Nicodemo tsay apayanqankunata säbanasman wiñaparkur Jesúspa ayanta pituyarqan.
41Jesústa crucificäyanqan lädunchömi juk huerta karqan. Tsaychömi pitapis manaraq pampayanqan mushuq sepultüra karqan.#Mat. 27.60. 42Jamay junaq qallananpaqna kaptinmi tsay sepultürallamanna Jesústa pampayarqan.

Currently Selected:

Juan 19: qxn

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy