Isaías 58
58
Ayünu imanö kananpaq ninqan
1Dios Yayam nimarqan:
<<¡Mana mantsakur llapan kallpaykiwan qayaykachar willakuy!
¡Cornëta waqaqnöraq willakunqayki wiyakätsun!
¡Jacobpita miraq kuyanqä runakuna jutsa rurayanqanta tantiyatsiy!
2Paykunam cäsuyämayta munar waran waran ashiyäman.
<Dios munanqannö kawashun> nirmi yanapanäpaq mañakayäman.
Peru tsaynö karpis mandamientükunata cäsuq tukurllam kayan.
Manam munanqänötsu kawayan.
3Mana yanapaptïmi niyäman:
<Ayunaptïpis ¿imanirtan mana wiyayämankitsu?
Mallaqayta awantaykäyaptï ¿imanirtan cäsuyämankitsu?>
<<Tsaynö niyämaptinmi nï:
Qamkuna mana alli kawayaptikim ayunayaptikipis cäsuyaqtsu.
Ayunayanqayki junaqpis rïcuyayta munarmi aruqnikikunata mana pägaypa arutsiyanki.
4Ayunarpis piñanakurmi kaykäyanki.
Tsaynöllam mana llakipänakur maqanakuykäyanki.
Tsaynö kaykäyaptikiqa ayunar mañakayämaptikipis manam wiyayäshaykitsu.
5<<Qamkunam ayunar äjusyashqa jaranö aywapakashqa kaykäyanki.
Tsaynöllam lütu llatapaykikuna shukushqa uchpa jananchö chacharaykäyanki.
¿Tsaynötsuraq munanqänö ayunay junaq kanman?
6Noqa munanqänö ayunarqa manakaqta tumpar prësu qaykatsiyanqayki runata dëjayanki,
runa majikikunata ama sufritsiyankitsu
y alläpa arutsiyanqayki runakunata yüguta paskaqnö jamatsiyanki.
7Tsaynöllam munä waktsakunata mikuynin qarayänaykita,
wajinnaqkunata patsatsiyänaykita,
llatapannaqkunata shukutsiyänaykita
y runa majikikunata llakipäyänaykita.
8<<Tsaynö kayaptikim patsa waraqnö qamkunapaq salvación kanqa.
Kushishqa kawakuyänaykipaqmi yanapayäshayki.
Allita ruraq kayanqaykim puntaykikunata aywanqa.
Qepaykikunapitanam podernïwan imaykapitapis tsapäyäshayki.
9Mañakayämaptikim alistapäyäshayki.
Yanapayänaqpaq qayayämaptikim yanapayäshayki.
<<Runa majikikunata amana sufritsiyaytsu ni ashayaynatsu.
Pitapis llutallaqa amana tumpayaynatsu.
10Mallaqaqkunata mikuynin qarayay.
Llakikuqkunata kushikatsiyay.
Tsaynö karqa tutapaychö atsikyaqnömi kayanki.
Tutapäpukushqanö kayanqaykipis pullan junaqnömi atsikyanqa.
11 Noqam mitsikuqnö imaypis cuidayäshayki.
Llapan wanayanqaykitam alistapäyäshayki.
Kallpaykikuna kananpaqmi yanapayäshayki.
Tsaymi alli parqushqa huertanö y imaypis mana tsakiq pukyunö kayanki.
12Unay raqäkunatam perqar allitsayanki.
Unay kaq cimientu jananman perqarmi yapay shäritsiyanki.
Tsaymi niyäshunki: <Juchushqa perqakunata y wajikunata allitsaq maestrum kayan> >>.
Jamay junaqpaq yachatsikunqan
13<<Jamay junaqta respitayay.#Éxo. 20.8-11; Isa. 56.2; Jer. 17.19-27.
Tsay junaqqa ama imatapis rantiyaytsu ni rantikuyaytsu.
Tsaypa rantin tantiyakuyay tsay junaq kushikuypaq kanqanta y akranqä sagrädu junaq kanqanta.
Tsay junaqta respitar imaykatapis dëjaykur jamayay.
Shonquykikuna yarpanqanta ama rurayaytsu.
Mana allikunata ama parlayaytsu.
14<<Tsaykunata cumplirmi kushishqa kawakuyanki.
Pïmay respitayäshunaykipaqmi churayäshayki.
Unay castaykikuna Jacobta entreganqä nacionchömi kushishqa täkuyanki>>.
Kikin Dios Yayam tsaynö nishqa.
Currently Selected:
Isaías 58: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
