Isaías 57
57
1Dios Yayata serviq alli runakuna wañuyaptin manam ni pipis llakikuntsu.
Manana sufriyänanpaq Dios Yaya qorikunqanta manam ni pipis tantiyantsu.
2Dios munanqannö kawaqkuna wañukurpis mananam ñakayanqanatsu.
Ïdulukunata adoraqkunapa contran parlanqan
3Dios Yayam nin:
<<¡Jutsasapakuna, shumaq cäsukuyay!
¡Qamkunaqa brüja castam kaykäyanki!
¡Majanta mana respitar jukwan purikuqnömi ïdulukunata adorar Dios Yayata cäsuyankitsu!
4¿Imanirtan cäsumaqkunata asipäyanki?
¿Imanirtan manakaqman churar yachapäyanki?
¿Imanirtan aqtupäyanki?
¡Qamkunam llullakuq y jutsasapa kayanki!
5<<Qamkunam roble jacha chakinkunachö, rämasapa jachakuna chakinkunachö ïduluykikunata adorar warmikunawan kakuykäyanki.
Tsaynöllam kallkikunachö y qaqakunachö sacrificiuta waykar wamraykikunatapis rupaykätsiyanki.#Lev. 18.21; Jer. 7.31; 19.5.
6Qamkunapa diosnikikunam mayukuna kuchunchö qolluyta rumikunalla.
Tsaykunachö suertikikuna kanqanta yarparmi vïnutapis wiñapuyanki.
Tsaki mikuy ofrendakunatapis apayanki.
Tsaynö rurayanqaykipita manam upällakümantsu.
7<<Adulteriu jutsata ruraqnömi jatusaq jirkakunachö juk dioskunata adoraykäyanki.
Tsay jirkakunamanmi witsäyanki sacrificiukunata waykayänaykipaq.
8Punku waqtankunamanmi ïdulukunata churayanki.
Noqata mana väliqman churayämarmi adulteriu jutsata ruraqnö tsay ïdulukunawan pactuta rurar adoraykäyanki.
Qalapätu warmita rikäpaqnömi tsay ïdulukunata rikapaykäyanki.
9<<Aceitita aparkurmi diosnikikuna Molocman cörriykäyanki.
Maytsika perfümitam apaykäyanki.
Mana reqiyanqayki ïdulukunata adorayta munarmi apayämunanpaq runakunatapis mandaykäyanki.
Mayjina karumanpis chätsiyankim.
10Ïdulukunata adorayänaykipaq maytsaypa aywarpis manakaqllapaq adorayanqaykita manam tantiyakuyankitsu.
Pishiparpis mana ajayaypam sïguiyanki.
11<<¿Ïduluykikunapita mantsakurku noqaman confiakayämunkinatsu?
¿Ïduluykikunata respitarku qonqayämashkanki?
¿Unaypita mana parlapäyanqaqta yarparku respitayämankinatsu?
12Kananmi imanö kawayanqaykitapis pïmayta musyatsishaq.
Llapan rurayanqaykim manakaqllapaq kanqa.
13Salvayäshunaykipaq qayaykachäyaptikipis ïduluykikuna manam salvayäshunkitsu.
Peru tsaykunatam wayra llapanta apanqa.
Juk pükayllachömi wayra ushakätsinqa.
Peru noqaman creyikamuqkunam sïqa prometinqä nacionchö täkuyanqa.
Paykunam sagrädu lömächö adorayämanqa>>.
Israel runakunata salvanqan
14Dios Yayam nin:
<<Nänita shumaq arur pitsaqnö jutsaykikunata dëjayay.
Kuyanqä runakuna noqaman kutiyämunanpaq nänita shumaq allitsayay>>.
15Ciëluchö täkuq imayyaqpis kawaq santu Dios Yayam nin:
<<Noqam janaq sagrädu patsachö täkü.
Tsaynöllam jutsankunapita llakikuqkunawan kaykä.
Paykuna mana llakikuyänanpaqmi animatsishaq.
16Kuyanqä runakunata manam castigashaqnatsu.
Paykunawanmi imayyaqpis rabyashqanatsu kaykäshaq.
Imayyaqpis rabyashqalla kaptïqa llapan kamanqä runakunam ushakäyanman.
17<<Kuyanqä runakuna jutsata rurayaptinmi rabyar juk tiempu castigarqä.
Alläpa castigaykurmi paykunata dëjaskirqä.
Peru tsaynö castigaykaptïpis mana cäsuyämarmi kikinkuna munayanqannö kawakuyashqa.
18Tsaynö kawaykäyaptinpis cäsukuq kayänanpaqmi yanapashaq.
Shumaq rikar yanapaptïmi llakishqa kawaqkunapis kushikuyanqa.
19Kushishqa alabayämänanpaqmi yanapashaq.
Karuchö y cercachö kaykaqkunamanmi willakatsishaq alli kawayta tariyänanpaq.#Efe. 2.17.
Kuyanqä runakunatam yanapashaq.
20<<Peru mana alli ruraq runakunam sïqa lamar laqchikaqnö kaykäyan.
Mana päraypa laqchikar qetäwan y taqrawan putkaqnömi kayan.
21Mana alli ruraq runakunaqa manam imaypis alli kawakuyanqatsu>>.#Isa. 48.22.
Dios Yayam nin.
Currently Selected:
Isaías 57: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
