Isaías 55
55
Llapan runakunata Dios Yaya qayanqan
1Dios Yayam nin:
<<Yakunaqkuna, yaku upyaq llapayki shayämuy.#Juan 7.37; Apoc. 21.6; 22.17.
Mikuyta rantiyänaykipaq qellaynikikuna mana kaptinpis mikuq shayämuy.
Vïnuta y lichita dembaldilla apayänaykipaq shayämuy.
2Mikuyta rantiyanqaykipa rantin ¿imanirtan qellaynikikunata manakaqkunachö ushayanki?
Arupukur gänayanqaykita ¿imanirtan mana allikunachö ushayanki?
Shumaq wiyayämay.
Cäsuyämarqa alli mikuytam tariyanki.
Alli allillata mikurmi kushishqa kawakuyanki.
3<<Wiyayämar noqaman shayämuy.
Niyanqaqta cäsuyämarqa allim kawakuyanki.
Rey Davidta kuyar prometinqäta cumplirmi#2Sam. 7.4-16; Hech. 13.34. yanapayänaqpaq pactuta rurashun.
Tsay pactutam imaypis cumplishaq.
4<<Poderösu kanqäta maytsay nación runakuna musyayänanpaqmi rey Davidta churashkä.
Nacionkunapa mandakuqnin y yachatsiqnin kananpaqmi churashkä.
5Tsaynöllam qamkunapis mana reqiyanqayki nación runakunata qayatsiyanki.
Mana reqiyäshuqniki runakunam qamkunaman cörrilla shayämunqa.
Tsaynömi kanqa Diosnikikuna kar qamkunata yanapayaptiq.
Noqam Israel runakunapa santu Diosnin kä>>.
6Kawayanqaykiyaq Dios Yayata ashiyay.
Llakipäyäshunqaykiyaq rugakuyay.
7Jutsa rurayanqaykita dëjayay.
Manakaqkunapaq yarpachakuyanqaykipa rantin Dios Yayaman kutiyay.
Diosnintsik karmi llakipäyäshunki.
Paymi imaypis perdonayäshunki.#Lam. 3.40-42; Zac. 1.3; Mal. 3.7.
8 Dios Yayam nin:
<<Yarpaynïqa manam qamkunapa yarpaynikikunanötsu.
Ruraynïkunapis manam qamkunapa ruraynikikunanötsu.
9Kay patsapita mas altuchö ciëlu kanqannömi
ruranqäkunapis qamkuna rurayanqaykipita mas alli.
Yarpanqäkunapis qamkunapa yarpaynikikunapita mas allim.
10<<Ciëlupita tamyamur y rashtamurpis manam altupa kutintsu.
Tsaypa rantinmi allpata oqutsir murupakushqakuna alli wayunanpaq wiñatsimun.
Tsaynöpam muruyänanpaqpis muru kan.
Mikuyänanpaqpis mikuy kan.#2Cor. 9.10.
11Palabräpis tamyanömi kaykan.
Mandamuptïmi imaypis munanqänö ruran.
Manam manakaqllapaqtsu maymanpis chätsï.
12<<Qamkunam maypa aywarpis kushishqa kawayanki.
Jirkakunawan lömakunapis rikäyäshurnikim kushishqa cantayanqa.
Llapan jachakunam rämankunata kushikur kuyutsiyanqa.
13Kashakunapa rantinmi ciprés jachakunana wiñayämunqa.
Shinwäkunapa rantinmi arrayán jachakuna wiñayämunqa.
Tsaynöpam maytsaychöpis adorayämanqa.
Tsaytaqa manam ni pipis qonqanqatsu>>.
Currently Selected:
Isaías 55: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
