Isaías 54
54
Israel runakunata imaypis Dios Yaya kuyanqan
1 Dios Yayam nin:
<<Qolluq warmi,#54.1 Kay versïculukunachömi Jerusalén markata qolluq warmiman iwalatsin. Wawannaq kanqanta nin Jerusalénchö täkuqkuna nacionninkunapita qarqushqa kayaptinmi. Wawan kananpaq kanqanta nin Diosman creyikuqkuna atska kayänanpaq kaptinmi. ¡kushikuy!
Wawayki mana kaptinpis ¡kushikur cantay!
Ollquyki dëjashuptikipis ollquyuq warmipita masraqmi wawaykikuna kanqa.#Gál. 4.27.
2Atska wawaykikuna yurinanpaq carpaykita jatunyätsiy.
Estäcakunata jawir waskakunawan carpaykikunata seguray.
3Atskaqman mirarmi derëcha kaqläpa y itsuq kaqläpa juntäyanki.
Qampita miraqkunam atska nacionkunata qechuyanqa.
Raqällana markakunata allitsaskirmi tsaychö täkuyanqa>>.
4Ama mantsakuytsu. Manam pipis musyapäshunkinatsu.
Ama penqakuynatsu. Manam pipis ashashunkinatsu.
Wawannaq kar penqakunqaykitam qonqanki.
Viüdayäkur penqakunqaykitapis mananam yarpankinatsu.
5Kamashuqniki Dios Yayam majanpaq qorishunki.#Eze. 16; Ose. 1—3.
Paypa shutinmi llapanta mandaq Yahweh.
Paymi imaykapitapis tsapäshunki.
Israel runakunapa santu Diosninmi kaykan.
Tsaymi pïmaypis musyanqa entëru munduta poderninchö katsiq Dios kanqanta.
6Ollqun dëjashqa warminö llakishqa kaykaptikim Dios Yaya qayashushkanki.
Jöven kanqan warminta juk runa qoriqnömi qorishushkanki.
Diosnikim nin:
7<<Qamta juk rätullam dëjarqaq.
Peru kananmi sïqa alläpa llakiparniki yapay qorikushayki.
8Alläpa rabyarmi qampita witikurqä.
Peru kananpitam sïqa imaypis llakipäshayki>>.#Sal. 30.5; Isa. 60.10; Lam. 3.31-33.
Salvashuqniki Dios Yayam tsaynö nin.
9<<Noé kawanqan witsaymi jurarqä kay patsata yakuwan manana ushakätsinäpaq.#Gén. 9.8-17.
Tsaynöllam kananpis jurä yapay rabyarpis manana castiganaqpaq.
10Jirkakuna kuyuyaptinpis lömakuna tsuktsukyaptinpis qamtam imaypis llakipäshayki.
Imaypis allilla kawakunaykipaq pactu ruranqantsiktam cumplishaq>>.#Jer. 32.40; Mar. 13.31.
Llakipäshuqniki Dios Yayam tsaynö nin.
Mushuq Jerusalénpaq ninqan
11Jerusalén markatam Dios Yaya nin:
<<¡Alläpa llakipaypaq marka!
¡Ñakatsiyäshuptiki manam ni pipis llakipäshunkitsu!
Tsaynö kaptinpis kikïmi carbunclo rumikunawan cimientuyki rurashaq.
Tsay jananmanmi zafiro rumikunawan perqashaq.
12Rubí rumipitam rikachakuna törrikikunatapis rurashaq.
Carbunclo rumipitam punkuykikunatapis rurashaq.
Entëru kuchunpa murällaykitapis kuyakuypaq rumikunawanmi perqashaq.#Apoc. 21.18-21.
13<<Kikïmi wamraykikunatapis yachatsishaq.#Juan 6.45.
Yanapaptïmi pïmaywanpis alli kawakuyanqa.
14Reypis munanqänömi mandakunqa.
Mananam ni pipis sufritsishunkinatsu.
Tranquïlu kawakurmi mantsakunkinatsu.
15Manam mayqan nación runakunatapis kachamushaqnatsu ushakätsishunaykipaq.
Shayämuptinqa kikinkunatam ushakätsinki.
16<<Noqam herrërutapis kamashkä shanshawan waritsir fiërruta takar armakunata rurananpaq.
Noqam soldädukunatapis kamashkä llapanta ushakätsiyänanpaq.
17Tsaymi mayqan soldädu venciyäshunaykitapis permïtishaqtsu.
Yanapaptiqmi imatapis culpatsayäshuqnikikunata upällatsinki.
Llapan servimaqkunatam kikï salvashaq>>.
Dios Yayam tsaynö nin.
Currently Selected:
Isaías 54: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
