Isaías 52
52
Jerusalénta salvananpaq ninqan
1¡Sión, rikchay, rikchay!
¡Alli kallpayuq kay!
¡Santu Jerusalén marka, kuyakuypaq llatapaykita shukukuy!#Apoc. 21.2, 27.
Diosta mana cäsuq juklä runakuna imaypis manam atacayäshunkinatsu.
2¡Jerusalén, sharkur janaykichö taqrata tapsikuy!
Prësu kaykaq Sión, kunkaykichö wataraq cadenakunata jipiskir trönuykiman jamakuy.
3 Dios Yayam nin:
<<Juklä nacionman prësu apayäshunaykipaq manam ni ima pägutapis chaskishkätsu.
Tsaymi kanan jipiyämurnikipis ni imata pägakushaqtsu>>.
4 Dios Yayam nin: <<Ñawpatam kuyanqä runakuna Egiptuman aywaykur tsaychö täkuyarqan. Qepatanam pipis achäquita mana ashipaykäyaptin Asiria runakuna sufritsiyashqa. 5Tsaymi nï: Kanan ¿imatatan rurashaq? Mana pägamarmi kuyanqä runakunata juklä nacionman apayashqa. Poderninchö katsiqkunam alli tukur asipäyan. Qoyay qoyaymi manakaqman churayäman.#Rom. 2.24. 6Tsaymi tiempu chämuptin kuyanqä runakuna rikäyanqa poderösu kanqäta. Prometinqänölla salvaptïmi tantiyayanqa yanapaykanqäta>>.
7Jirkakunapa shamur alli willakuyta apamuq runam alläpa kushikuypaq kaykan.#Nah. 1.15; Rom. 10.15; Efe. 6.15.
Tsay shamuq runam alli kawakunapaq y salvashqana kanapaq willakun.
Sióntam nin: <<¡Dios Yayam llapanta mandan!>>
8Tsayta wiyarmi rikachakuqnikikuna kushikuypita qayaykachaykäyan.
Siónman Dios Yaya kutimuqta rikarmi alläpa kushikuyan.
9Jerusalénchö raqäkuna, ¡kushishqa cantayay!
Kuyanqan runankunatam Dios Yaya yanapanqa.
Jerusaléntam chikiqninkunapita salvanqa.
10Tsaynö salvarmi maytsay nación runakunata Dios Yaya musyatsinqa poderösu kanqanta.
Karu nación runakunam rikäyanqa Diosnintsik salvamanqantsikta.
11¡Babiloniapita witikuyay, witikuyay!
¡Imatapis impüruyätsikuqkunata ama yatayaytsu!
¡Juklä markachö täkuyanqaykipita yarqukuyay!
¡Dios Yayapa manëjunkunata kutitsiqkuna, purificäkuyay!#2Cor. 6.17.
12Manam jananta rurintatsu yarquyanki.
Manam tsinkayllapatsu aywayanki.
Sinöqa kikin Dios Yayam jipiyäshurniki puntaykikunata aywanqa.
Qepaykikunatam Israel runakunata kuyaq Dios Yaya aywanqa.
Serviqnin sufrinanpaq ninqan
13Serviqninpaqmi Dios Yaya nin:
<<Tantiyayay. Servimaqnï ruranqanmi llapan alli kanqa.
Paytam llapanpita mas poderösu kananpaq churanqa.
Paymanqa manam pipis iwalanqatsu.
14Chikiqninkuna maqayaptinmi qaqllanpis mana reqiypaq karqan.
Tsaymi payta rikar runakuna alläpa mantsakäyarqan.
15Tsaypitanam maytsay nación runakuna mantsakäyanqa.
Reykunapis manam ni ima niyta puëdiyanqatsu.
Pipis mana willakunqantam musyayanqa.
Imaypis mana wiyayanqantam wiyayanqa>>.#52.15 Imaypis mana wiyayanqanmi Diospa serviqnin alläpa ñakanqan y tsaypita respitar adorayanqan.#Rom. 15.21.
Currently Selected:
Isaías 52: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
