Eclesiastés 9
9
Llapantsikpis ushakaqlla kanqantsik
1Kay patsachö imanir llapan päsanqankunata musyanäpaqmi llapan shonqüwan shumaq yarpachakushkä. Tsaynö yarpachakurmi nishkä: Alli runa karpis y tantiyakuq runa karpis manam musyantsiktsu arunqantsikman Dios Yaya bendicionninta churamunanpaq o mana churamunanpaq kanqanta.#Prov. 16.1, 9; 19.21. Tsaynöllam musyantsiktsu waray warantinkuna imanö kanapaq kanqantapis.
2Peru musyantsikmi llapantsik ushakänapaq kanqanta. Ushakäshunmi alli runa o mana alli runa karpis, Dios munanqannö kawarpis o pay mana munanqannö kawarpis, Diospaq sacrificiuta waykashqa o mana waykashqa karpis, jutsannaq o jutsayuq karpis, allita ruranapaq Diosta prometirpis o mana prometirpis. 3Kay patsachö llapan runapis wañukuqlla kanqanmi llakikuypaq. <<Wañukurmi ushakäshaq>> nirmi runakuna shonqun munanqannö mana allikunata rurayan. 4Tsaynö kaptinpis wañunqantsikpitaqa kawanqantsikmi mas alli. Parlam nin: <<Wañushqa leonpitaqa kawaq allqullapis mas allim>>.
5Wañunapaq kanqantaqa llapantsikmi musyantsik. Peru wañuskirqa imatapis manam musyashunnatsu ni munashunnatsu. Wañuskishqaqa manam pipis yarpämäshunnatsu. 6Tsaynöllam kuyakuq kaynintsikpis, chiki kaynintsikpis y imata munanqantsikpis ushakanqa. Tsaymi kay patsachö ni imatapis rurashunnatsu.
7Tsaynö kaykaptinqa kawanqaykiyaq mikuyta kushishqa mikunki y vïnuta kushishqa upyanki. Tsaynö ruranqaykim Dios Yaya munanqannö. 8Manana llakikur alli llatapata shukukur perfümita umaykiman wiñäkunki.
9Kay patsachö Dios Yaya qaramanqantsik kaway päsaqlla kaykaptinqa warmikiwan kuyanakur waran waran kushishqa kawakunki.#Prov. 5.15-19. Tsaynö kawanqaykim päguyki kaykan kay patsachö alläpa ñakar arunqaykipita. 10Tsaymi llapan imaykatapis kushishqa ruranki. Wañuskirqa manam ni imata rurankinatsu, yachankinatsu ni musyankinatsu.
11Kay patsachö ima masta rikanqäta kanan willashayki.
Allish cörriqpis llallinakuychö manam siempritsu gänan.
Mas kallpasapa karpis guërrachö manam siempritsu vencin.
Mas tantiyakuqpis manam siempritsu imaykayuq.
Mas alli yarpayyuqpis manam siempritsu mas qellayta gänan.
Mas yachayyuq karpis manam siempritsu kuyashqa.
Llapantsikpam alli o mana allipis suertintsik.
12Tsaynöllam musyantsiktsu imay höra desgracia päsamänapaq kanqanta. Mällawan pescäduta illaqpita achkuqnö y toqllawan pishquta illaqpita achkuqnömi runatapis desgracia illaqpita päsan.
13Kay patsachömi juk mastapis rikashkä. Kanan tantiyatsishayki imata rikanqäta y imata tantiyanqäta. 14Rikashkämi juk taksha markachö wallkaqlla runakuna kaykäyaqta. Tsaymanmi poderyuq rey atacananpaq chaykur kunchawaskirqan. Markaman yaykuyänanpaqmi soldädunkunawan alistakuyarqan. 15Tsay markachömi yachayyuq waktsa runa täkurqan. Tsay runam yachayyuq kar marka majinkunata yätsirqan imanöpapis salvakuyänanpaq. Yätsinqannö salvakaskirpis waktsa kaptinmi payta pipis cäsurqannatsu.
16Tsayta rikarmi nï: Yachayyuq kayqa kallpasapa kanqaykipitapis mas allim.#Prov. 24.5. Peru yachayyuq kaptinpis waktsa runatam manakaqman churayan y shumaq yätsiptinpis manam cäsuyantsu.
17Mana yachayyuq mandakuq runa jinchi parlanqanpitam mas alli yachayyuq runa yachayllapa parlanqan.
18Alli armapitapis yachayyuq kaymi mas alli.
Peru imallatapis pantashqam sïqa llapanpis mana alli tikran.
Currently Selected:
Eclesiastés 9: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
